(vovworld) – ວັນທີ 10/9, ຢູ່ສຳນັກງານສູນກາງພັກ, ຕາງໜ້າຄະນະເລຂາສູນກາງພັກ, ທ່ານເລຂາທິການໃຫຍ່ ຫງວຽນຟູ໋ຈ້ອງ ໄດ້ເປັນເຈົ້າພາບການເຮັດວຽກກັບຄະນະປະຈຳຄະນະພັກແຂວງຮ່າຢາງ ກ່ຽວກັບສະພາບການພາຍຫຼັງເຄິ່ງອາຍຸການປະຕິບັດມະຕິກອງປະຊຸມໃຫຍ່ຄັ້ງທີ 11 ຂອງພັກ, ມະຕິກອງປະຊຸມໃຫຍ່ຄັ້ງທີ 15 ຂອງອົງຄະນະພັກແຂວງ ກໍ່ຄືແຜນນະໂຍບາຍພັດທະນາເສດຖະກິດ - ສັງຄົມຈຳນວນໜຶ່ງຂອງແຂວງເຖິງປີ 2020. ສະຫຼຸບການເຮັດວຽກ, ທ່ານເລຂາທິການໃຫຍ່ ຫງວຽນຟູ໋ຈ້ອງ ໄດ້ເຫັນດີຕໍ່ທິດທາງກໍ່ສ້າງ ແລະ ພັດທະນາຂອງຮ່າຢາງເຖິງປີ 2020. ທ່ານເນັ້ນໜັກວ່າ ເພື່ອປະຕິບັດທິດທາງດັ່ງກ່າວ, ອົງຄະນະພັກແຂວງ ຕ້ອງໃກ້ຊິດກັບຈຸດພິເສດສະເພາະ, ຂຸດຄົ້ນ, ເສີມຂະຫຍາຍທ່າສະດວກ, ຄວາມສາມາດບົ່ມຊ້ອນຂອງທ້ອງຖີ່ນ ເພື່ອປັບປຸງບັນດາຈຸດໝາຍ, ຕົວເລກຄາດໝາຍເຊິ່ງກອງປະຊຸມໃຫຍ່ຄັ້ງທີ 15 ຂອງແຂວງໄດ້ວາງອອກ; ສືບຕໍ່ກໍ່ສ້າງພື້ນຖານໂຄງລ່າງ, ໄຟຟ້າ, ທາງຄົມມະນາຄົມ, ໂຮງຮຽນ, ສຸກສາລາ, ຕະຫຼາດ, ບຳລຸງສ້າງແຫຼ່ງຊັບພະຍາກອນມະນຸດ, ແກ້ໄຂວຽກເຮັດງານທຳຢູ່ກັບທີ່. ຮ່າຢາງຄວນເອົາໃຈໃສ່ເປັນພິເສດເຖິງການລະດົມທຸກແຫຼ່ງກຳລັງສັງຄົມ, ເພີ່ມທະວີການຮ່ວມສຳພັນກັບແຂວງອື່ນໆ, ສຸມໃສ່ລົງທຶນໃຫ້ແກ່ການພັດທະນາ, ພັດທະນາເສດຖະກິດສັງຄົມຕ້ອງຕິດພັນກັບການປ້ອງກັນຊາດ, ປ້ອງກັນຄວາມສະຫງົບ. ພິເສດແຂວງຮ່າຢາງ ຄວນສຸມໃສ່ການຊີນຳນຳພາຍູ້ແຮງວຽກງານກໍ່ສ້າງພັກ, ກໍ່ສ້າງລະບົບການເມືອງໃນທົ່ວອົງຄະນະພັກ.