(vovworld) - ຕອນເຊົ້າວັນທີ 27/11, ຢູ່ຮ່າໂນ້ຍ, ສະມາຄົມມິດຕະພາບຫວຽດນາມ - ລາວ ໄດ້ຈັດພິທີສະເຫຼີມສະຫຼອງ 37 ປີແຫ່ງວັນສະຖາປະນາ ສປປ ລາວ (2/12/1975 – 2/12/2012). ເຂົ້າຮ່ວມພິທີມີທ່ານເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳຫວຽດນາມ ສົມພອນ ສີຈະເລີນ, ຜູ້ຕາງໜ້າສະຫະພັນບັນດາອົງການຈັດຕັ້ງມິດຕະພາບຫວຽດນາມ, ຄະນະພົວພັນຕ່າງປະເທດສູນກາງພັກ, ສະມາຄົມມິດຕະພາບຫວຽດນາມ - ລາວ ພ້ອມກັບພະນັກງານສະຖານທູດ, ນັກສຶກສາລາວທີ່ພວມປະຕິບັດງານ ແລະ ຮໍ່າຮຽນຢູ່ຫວຽດນາມ ເຂົ້າຮ່ວມເປັນຈຳນວນຫຼວງຫຼາຍ.
ກ່າວຄຳເຫັນທີ່ພິທີ, ທ່ານເອກອັກຄະລັດຖະທູດລາວປະຈຳຫວຽດນາມ ສົມພອນ ສີຈະເລີນ ເນັ້ນໜັກວ່າ ວັນສະຖາປະນາປະເທດສປປ ລາວ ຄືວັນທີ 2/12/1975 ໄດ້ເປີດສັງກະລາດໃໝ່ ແຫ່ງການສ້າງສາ ແລະ ພັດທະນາປະເທດຊາດ. ໃນຕະຫຼອດ 37 ປີຜ່ານມາ, ສປປ ລາວ ໄດ້ພັດທະນາປະເທດຢ່າງຕໍ່ເນື່ອງ ມີການປ່ຽນໃໝ່ຢ່າງເຫັນໄດ້ຊັດ. ໃນການພັດທະນານັ້ນ ສປປ ລາວ ກໍຮູ້ສຶກເອກອ້າງທະນົງໃຈ ຍ້ອນມີສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກກຄີແບບພິເສດ ແລະ ການຮ່ວມມືຮອບດ້ານກັບຫວຽດນາມ. ທ່ານເອກອັກຄະລັດຖະທູດສົມພອນ ສີຈະເລີນ ເນັ້ນໜັກວ່າ:
ຕາງໜ້າໃຫ້ພັກ ແລະ ລັດ ຫວຽດນາມ, ທ່ານຫງວຽນຮຸຍກວາງ (Nguyen Huy Quang), ຮອງປະທານສະມາຄົມມິດຕະພາບຫວຽດນາມ - ລາວ ໄດ້ສົ່ງພອນໄຊອັນປະເສີດທີ່ສຸດມາຍັງບັນດາການນຳພັກ, ລັດ ແລະ ປະຊາຊົນລາວ ເນື່ອງໃນໂອກາດວັນສະຖາປະນາ ສປປ ລາວ, ພ້ອມທັງສະແດງຄວາມປິຕິຊົມຊື່ນຕໍ່ບັນດາການພັດທະນາທີ່ນັບມື້ນັບເລິກເຊິ່ງ, ກວ້າງຂວາງຂອງສາຍພົວພັນລະຫວ່າງຫວຽດນາມ - ລາວ ໃນໄລຍະຜ່ານມາ ແລະ ເຊື່ອໝັ້ນວ່າ ພາຍໃຕ້ການນຳພາຂອງພັກປະຊາຊົນປະຕິວັດລາວ, ປະຊາຊົນລາວ ຈະສືບຕໍ່ຍາດໄດ້ບັນດາຜົນງານໃໝ່ທີ່ໃຫຍ່ຫຼວງໃນພາລະກິດສ້າງສາ ແລະ ປົກປັກຮັກສາປະເທດຊາດກວ່າອີກ.