ຕາແສງເຊີນໂລຍ, ແຂວງຫວິງຟຸກ ສິ້ນສຸດໄລຍະປະຕິບັດຄໍາສັ່ງປິດລ້ອມ (ພາບ: TTXVN)

        ຕາມທ່ານ Vojtěch Filip ແລ້ວ, ຫວຽດນາມ ບັນລຸໄດ້ຜົນສໍາເລັດ ເຊິ່ງຫຼາຍປະເທດພັດທະນາ ບໍ່ສາມາດເຮັດໄດ້. ຫວຽດນາມ ປະກາດວ່າຄວບຄຸມໂລກລະບາດໄດ້ສໍາເລັດແລ້ວ ແລະ ໃນຫຼາຍອາທິດມໍ່ໆມານີ້ ບໍ່ພົບກໍລະນີຕິດແປດໃນຊຸມຊົນຕື່ມອີກ ກໍຄື ໄລ່ມາຮອດປັດຈຸບັນ ຍັງບໍ່ທັນມີຜູ້ໃດເສຍຊີວິດ ຍ້ອນໂລກລະບາດດັ່ງກ່າວ. ເພາະສະນັ້ນ, ລັດຖະບານຫວຽດນາມ ຈຶ່ງໄດ້ເລີ່ມຫຼຸດຜ່ອນບັນດາມາດຕະການສຸກເສີນລົງ. ດ້ວຍບັນດາບາດກ້າວເດີນ ແລະ ວິທີເຮັດທີ່ຂ້ຽວຂາດໃນວຽກງານປ້ອງກັນ ແລະ ສະກັດກັ້ນໂລກລະບາດຂອງຫວຽດນາມ,ທ່ານເຊື້ອໝັ້ນວ່າ ນີ້ຈະແມ່ນບົດຮຽນໃຫ້ ສ.ເຊັກໂກ. ທ່ານກໍຖືວ່າ ປະຊາຄົມຊາວຫວຽດນາມ ຢູ່ ເຊັກໂກ ໄດ້ສວມບົດບາດເປັນແບບຢ່າງໃນບັ້ນປ້ອງກັນ ແລະ ສະກັດກັ້ນໂລກລະບາດໂຄວິດ - 19 ຢູ່ ປະເທດປະຈໍາຖ່ິນ.

        ນອກຈາກນັ້ນ, ໃນວັນດຽວກັນໜັງສືພິມ  ChosunBiz ຂອງ ສ.ເກົາຫຼີ ກໍໄດ້ລົງບົດຂຽນສະແດງຄວາມຊົມເຊີຍຕໍ່ຜົນສໍາເລັດຂອງຫວຽດນາມໃນບັ້ນປ້ອງກັນ ແລະ ສະກັດກັ້ນໂລກລະບາດໂຄວິດ - 19. ບົດຂຽນໄດ້ໃຫ້ຂໍ້ສັງເກດວ່າ ຫວຽດນາມແມ່ນໜຶ່ງໃນບັນດາປະເທດປະສົບຜົນສໍາເລັດທີ່ສຸດໃນໂລກໃນບັ້ນປ້ອງກັນ ແລະ ສະກັດກັ້ນໂລກລະບາດ. ຄວາມຕັດສິນໃຈຂອງລັດຖະບານຫວຽດນາມໃນໄລຍະປ້ອງກັນ ແລະ ສະກັດກັ້ນໂລກລະບາດ ໄດ້ຮັບຄວາມເຊື່ອໝັ້ນຢ່າງແຮງຈາກບັນດານັກລົງທຶນໃນທົ່ວໂລກ. ເຖິງວ່າ ບໍລິສັດເອເລັກໂຕນິກ Samsung ຕ້ອງຢຸດຕິການເຄື່ອນໄຫວຢູ່ໂຮງງານຫຼາຍແຫ່ງໃນໂລກກໍ່ຕາມ ແຕ່ຍັງຄົງສາມາດສືບຕໍ່ດໍາເນີນການຜະລິດຢູ່ຫວຽດນາມໄດ້.