ຈຸດເວລາດີທີ່ສຸດ ເພື່ອລົງທຶນເຂົ້າຕະຫຼາດເຕັກໂນໂລຢີຂໍ້ມູນຂ່າວສານຢູ່ຫວຽດນາມ
(VOVWORLD) - ໃນຂອບເຂດກອງປະຊຸມ ແລະ ງານວາງສະແດງໂລກດີຈີຕອນ (ITU Digital World 2020) ໂດຍກະຊວງຖະແຫຼງຂ່າວ ແລະ ສື່ສານ ຫວຽດນາມ ສົມທົບກັບ ສະຫະພັນ ໂທລະຄົມມະນາຄົມ ສາກົນ (ITU) ຈັດຕັ້ງຂຶ້ນ, ໃນວັນທີ 21 ຕຸລາ, ຢູ່ຮ່າໂນ້ຍ, ໄດ້ດຳເນີນການໂອ້ລົມສົນທະນາທາງອອນລາຍ ທີ່ມີຊື່ວ່າ “Why Viet Nam?”
 ການໂອ້ລົມສົນທະນາທາງອອນລາຍ “Why Viet Nam?” (ພາບ: TTXVN) |
ນີ້ແມ່ນການໂອ້ລົມສົນທະນາແບ່ງປັນກ່ຽວກັບຍຸດທະສາດຫັນເປັນດີຈີຕອນແຫ່ງຊາດຂອງ ຫວຽດນາມ, ຄວາມມຸ່ງຫວັງ, ເປົ້າໝາຍ, ວິທີການ, ຂັ້ນຕອນຫັນເປັນດີຕີຕອນ ແລະ ບັນດາຂົງເຂດບຸລິມະສິດ, ຕະຫຼາດດີຈີຕອນ ຫວຽດນາມ, ກາລະໂອກາດໃຫ້ແກ່ບັນດາກຸ່ມບໍລິສັດເຕັກໂນໂລຢີມາລົງທຶນເຂົ້າບັນດາຂົງເຂດບຸລິມະສິດທີ່ມີເງື່ອນໄຂຢ່າງຄົບຖ້ວນ, ແມ່ນກາລະໂອກາດໃຫ້ແກ່ບັນດາວິສາຫະກິດເຕັກໂນໂລຢີຕ່າງປະເທດເຂົ້າຮ່ວມວິວັດການພັດທະນາວິສາຫະກິດດີຈີຕອນຢູ່ຫວຽດນາມ…
ເມື່ອແບ່ງປັນກ່ຽວກັບຍຸດທະສາດຫັນເປັນດີຈີຕອນແຫ່ງຊາດ ແລະ ຕະຫຼາດດີຈີຕອນ ຫວຽດນາມ, ທ່ານໂດກົງແອັງ, ຮອງຫົວໜ້າກົມຫັນຄອມພິວເຕີ ສັງກັດ ກະຊວງຖະແຫຼງຂ່າວ ແລະ ການສື່ສານຫວຽດາມ ໃຫ້ຮູ້ວ່າ ບັນດາຂົງເຂດເຊິ່ງ ຫວຽດນາມ ຈະໃຫ້ບຸລິມະສິດປະຕິບັດການຫັນເປັນດີຈີຕອນຄື: ສາທາລະນະສຸກ, ການສຶກສາ, ການເງິນ, ທະນາຄານ… ເປົ້າໝາຍຮອດປີ 2025, ຫວຽດນາມໃຫ້ໄດ້ຢູ່ໃນກຸ່ມ 70 ປະເທດນຳໜ້າກ່ຽວກັບລັດຖະບານເອເລັກໂຕນິກ, ພ້ອມທັງພື້ນຖານເສດຖະກິດ ດີຈີຕອນກວມເອົາໃຫ້ໄດ້ 20% ຍອດຜະລິດຕະພັນພາຍໃນ (GDP). ຮອດປີ 2030, ຫວຽດນາມ ຕັ້ງເປົ້າໝາຍໃຫ້ໄດ້ຢູ່ໃນກຸ່ມ 50 ປະເທດນຳໜ້າກ່ຽວກັບລັດຖະບານເອເລັກໂຕນິກ.