(VOVWORLD) - ວັນທີ 9 ມິຖຸນາ, ກະຊວງການຕ່າງປະເທດ ແລະ ສະພາແຫ່ງຊາດ ຈີນ ໄດ້ພ້ອມກັນສະແດງທັດສະນະຄັດຄ້ານຕໍ່ເລື່ອງ ສະພາສູງ ອາເມລິກາ ຮັບຮອງເອົາຮ່າງກົດໝາຍວ່າດ້ວຍການແກ້ງແຍ້ງ ແລະ ປະດິດຄິດສ້າງ, ພ້ອມທັງຮຽກຮ້ອງໃຫ້ ອາເມລິກາ ຢຸດຕິການຊຸກຍູ້ຮ່າງກົດໝາຍສະບັບດັ່ງກ່າວ.
 ທ່ານໂຄສົກກະຊວງການຕ່າງປະເທດ ຈີນ ຫວາງເວິ໊ນບິນ (ພາບ: ກະຊວງການຕ່າງປະເທດຈີນ) |
ທ່ານໂຄສົກກະຊວງການຕ່າງປະເທດ ຈີນ ຫວາງເວິ໊ນບິນ ໄດ້ສະແດງທັດສະນະຄັດຄ້ານຢ່າງແຮງຕໍ່ເລື່ອງສະພາສູງ ອາເມລິກາ ຮັບຮອງເອົາຮ່າງກົດໝາຍວ່າດ້ວຍການແກ້ງແຍ້ງ ແລະ ປະດິດຄິດສ້າງ 2021, ໂດຍຖືວ່າ ຮ່າງກົດໝາຍສະບັບນີ້ ໄດ້ບິດເບືອນຄວາມຈິງ, ໃສ່ຮ້າຍປ້າຍສີເສັ້ນທາງພັດທະນາ ແລະ ບັນດານະໂຍບາຍພາຍໃນ ແລະ ຕ່າງປະເທດຂອງ ຈີນ, ເວົ້າເກີນຄວາມຈິງກ່ຽວກັບ “ການນາບຂູ່ຂອງຈີນ” ແລະ ປຸກລະດົມສົ່ງເສີມການແກ້ງແຍ້ງຍຸດທະສາດກັບ ປັກກິ່ງ.
ໃນວັນດຽວກັນ, ກຳມາທິການພົວພັນຕ່າງປະເທດ, ສະພາແຫ່ງຊາດ ຈີນ ກໍໄດ້ຖະແຫຼງຄັດຄ້ານຢ່າງແຮງຕໍ່ຮ່າງກົດໝາຍສະບັບດັ່ງກ່າວເຊັ່ນດຽວກັນ.
ບິກທ້ວນ, ນັກຂ່າວ VOV ປະຈຳ ຈີນ.