( vovworld ) – ໃນຂອບເຂດການຢ້ຽມຢາມອົດສຕາລີ ຢ່າງເປັນທາງການ, ວັນທີ 11/4, ທ່ານຮອງນາຍົກລັດຖະມົນຕີ Nguyen Xuan Phuc ໄດ້ມີການພົບປະເຈລະຈາກັບທ່ານຮອງນາຍົກລັດຖະມົນຕີທັງເປັນລັດຖະມົນຕີຄັງເງິນປະເທດເຈົ້າພາບ Wayne Swan. ສອງຝ່າຍໄດ້ຢືນຢັນຄວາມຕັດສິນໃຈປະຕິບັດສຳເລັດໂຄງການດຳເນີນງານຫວຽດນາມ - ອົດສຕາລີ ໄລຍະ 2010 – 2013 ໃຫ້ຖືກຕາມກຳນົດເວລາ ແລະ ຈະສົມທົບກັນຈັດຕັ້ງບັນດາການເຄື່ອນໄຫວຢ່າງແທດຈິງເນື່ອງໃນໂອກາດສະເຫຼີມສະຫຼອງ 40 ປີແຫ່ງວັນສ້າງຕັ້ງສາຍພົວພັນທາງການທູດ ( 1973 – 2013 ). ອົດສຕາລີ ໃຫ້ຄຳໝັ້ນສັນຍາວ່າຈະຕັ້ງໜ້າພິຈາລະນາຂໍ້ສະເໜີຂອງຫວຽດນາມກ່ຽວກັບການເປີດສາຍການບິນໂດຍກົງຮ່າໂນ້ຍ - Sydney ໂດຍໄວ, ສອງຝ່າຍຢັ້ງຢືນຈະສືບຕໍ່ຮ່ວມມື ແລະ ສົມທົບກັນຢ່າງແໜ້ນແຟ້ນຢູ່ບັນດາເວທີປາໄສຮ່ວມມືຫຼາຍຝ່າຍ ກໍຄືການສະໜັບສະໜູນເຊິ່ງກັນ ແລະ ກັນອອກສະໝັກຮັບເລືອກຕັ້ງເຂົ້າໃນບັນດາອົງການໃນພາກພື້ນ ແລະ ສາກົນ, ໃນນັ້ນມີບັນດາອົງການຂອງສະຫະປະຊາຊາດ. ຜູ້ຕ່າງໜ້າລັດຖະບານຫວຽດນາມ ແລະ ອົດສຕາລີ ກໍ່ຢືນຢັນຄວາມສຳຄັນຂອງເລື່ອງຮັບປະກັນສັນຕິພາບ, ສະຖຽນລະພາບ, ຄວາມສະຫງົບປອດໄພ ແລະ ຄວາມເສລີການເດີນທະເລຢູ່ທະເລຕາເວັນອອກ ພ້ອມກັນນັ້ນກໍຖືວ່າ ບັນດາການແກ່ງແຍ້ງລະຫວ່າງຝ່າຍຕ່າງໆທີ່ກ່ຽວຂ້ອງຄວນໄດ້ຮັບການແກ້ໄຂໂດຍສັນຕິວິທີໂດຍໄວ, ບົນພື້ນຖານເຄົາລົບກົດໝາຍສາກົນ, ໂດຍສະເພາະແມ່ນສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982.