 |
(vovworld)-ໃນລະຫວ່າງວັນທີ 14-15/1, ຄະນະປະຕິບັດງານຂອງສະຖານທູດຫວຽດນາມ ປະຈຳ ຍີ່ປຸ່ນ ໂດຍອຸປະທູດຊົ່ວຄາວ ຫງວຽນເຈື່ອງເຊີນ ນຳຫນ້າ ໄດ້ໄປຢ້ຽມຢາມ ແລະ ເຮັດວຽກຢູ່ ແຂວງ Gunma. ໃນການໄປຢ້ຽມຢາມ ແລະ ເຮັດວຽກນັ້ນ, ຄະນະໄດ້ພົບປະກັບຜູ້ວ່າການແຂວງ, ທ່ານ Osawa Masaaki ແລະ ປະທານສະພາປະຊາຊົນ ແຂວງ Iwai Hitoshi ແລະ ຢ້ຽມຢາມວິສາຫະກິດດີເດັ່ນຈຳນວນຫນຶ່ງຂອງແຂວງ ທີ່ພວມລົງທຶນດຳເນີນທຸລະກິດຢູ່ຫວຽດນາມ. ທີ່ການພົບປະ, ທ່ານ ຫງວຽນເຈື່ອງເຊີນ ໄດ້ຢືນຢັນວ່າ: ລັດຖະບານ, ບັນດາກະຊວງຂະແຫນງການ, ທ້ອງຖິ່ນຕ່າງໆ ແລະ ບັນດາວິສາຫະກິດ ຫວຽດນາມ ປາດຖະຫນາຢາກເພີ່ມທະວີການຮ່ວມມືກັບບັນດາທ້ອງຖິ່ນຂອງ ຍີ່ປຸ່ນ, ຕີລາຄາສູງຄວາມຂະຫຍັນຂັນເຄື່ອນຂອງບັນດາວິສາຫະກິດແຂວງ Gunma ແລະ ຄຳໝັ້ນສັນຍາ ສະຖານທູດ ຈະຕັ້ງຫນ້າຮ່ວມມືພ້ອມກັບອຳນາດການປົກຄອງ ແລະ ວິສາຫະກິດ ແຂວງ Gunma ເພື່ອຊຸກຍູ້ບັນດາແນວຄວາມຄິດຮ່ວມມືທີ່ຕ່າງຝ່າຍຕ່າງມີຜົນປະໂຫຍດ. ສ່ວນທ່ານ Osawa ຜູ້ວ່າການແຂວງດັ່ງກ່າວ ໃຫ້ຮູ້ວ່າ: ທ່ານຈະນຳຫນ້າຄະນະຜູ້ແທນອຳນາດການປົກຄອງ ແລະ ວິສາຫະກິດຂອງແຂວງ ໄປຢ້ຽມຢາມ ແລະ ເຮັດວຽກຢູ່ ຫວຽດນາມ ແຕ່ວັນທີ 15-18/2 ຈະມາເຖິງ.