ທ່ານຮອງນາຍົກລັດຖະມົນຕີ ຫວູວັນນິງ ແລະ ປະທານອົງການພັດທະນາ ສເກົາຫຼີ ກິມຢອງມົກ
(vovworld) - ໃນຂອບເຂດການຢ້ຽມຢາມ ແລະ ເຮັດວຽກຢູ່ ສເກົາຫຼີ, ຕອນເຊົ້າວັນທີ 19/5, ຢູ່ນະຄອນຫຼວງເຊີອູນ, ທ່ານຮອງນາຍົກລັດຖະມົນຕີ ຫວູວັນນິງ ໄດ້ໃຫ້ການຕ້ອນຮັບປະທານອົງການພັດທະນາ ສເກົາຫຼີ (KOICA) ກິມຢອງມົກ ແລະ ພົບປະເຈລະຈາກັບປະທານສະພາແຫ່ງຊາດ ສເກົາຫຼີ ຈູງອູຍອວາ. ທີ່ການພົບປະເຈລະຈາກັບທ່ານປະທານສະພາແຫ່ງຊາດ ສເກົາຫຼີ, ທ່ານຮອງນາຍົກລັດຖະມົນຕີ ຫວູວັນນິງ ເນັ້ນໜັກວ່າ, ຫວຽດນາມ ສະເໜີ ສເກົາຫຼີເພີ່ມທຶນໜູນຊ່ວຍໃຫ້ຫວຽດນາມ ຕື່ມອີກເພື່ອປະຕິບັດບັນດາໂຄງການພັດທະນາພື້ນຖານໂຄງລ່າງເສດຖະກິດ - ສັງຄົມ. ຄຽງຂ້າງນັ້ນ, ລັດຖະບານສອງປະເທດຈະສືບຕໍ່ລົງນາມໃນສັນຍາໜູນຊ່ວຍດ້ານນິຕິກຳ, ຊຸກຍູ້ການພົວພັນແລກປ່ຽນປະຊາຊົນເພື່ອເພີ່ມທະວີຄວາມສະໜິດຕິດພັນລະຫວ່າງສອງປະເທດນຳກັນ. ທ່ານປະທານສະພາແຫ່ງຊາດ ຈູງອູຍອວາ ຢືນຢັນວ່າ, ສະພາແຫ່ງຊາດ ສເກົາຫຼີ ຈະອະນຸມັດຜ່ານສັນຍາການຄ້າເສລີຫວຽດນາມ ສເກົາຫຼີ ເພື່ອປັບປຸງດ້ານນິຕິກຳ, ຍູ້ແຮງການເຄື່ອນໄຫວລົງທຶນ, ການຄ້າລະຫວ່າງສອງປະເທດ.
ໃຫ້ການຕ້ອນຮັບປະທານອົງການພັດທະນາ ສເກົາຫຼີ (KOICA) ກິມຢອງມົກ, ທ່ານຮອງນາຍົກລັດຖະມົນຕີ ຫວູວັນນິງ ເນັນໜັກວ່າ, ຫວຽດນາມ ໃຫ້ຄຳໝັ້ນສັນຍາສືບຕໍ່ນຳໃຊ້ແຫຼ່ງທຶນ ODA ຈາກ KOICA ຢ່າງມີປະສິດທິຜົນ. ສ່ວນທ່ານປະທານ KOICA ກໍ່ໃຫ້ຮູ້ວ່າ, ຄຽງຂ້າງຜົນແຫ່ງການລົງທຶນກໍ່ສ້າງພື້ນຖານໂຄງລ່າງຢູ່ຫວຽດນາມ, KOICA ກໍ່ເອົາໃຈໃສ່ເປັນພິເສດເຖິງບັນດາໂຄງການກຳຈັດຂີ້ເຫຍື່ອໃຫ້ເໝາະສົມກັບການເຕີບໂຕຂຽວ.