ທ່ານນາຍົກລັດຖະມົນຕີ Nguyen Tan Dung ເປັນປະທານວາລະປະຊຸມ
|
(vovworld) - ຕອນເຊົ້າວັນທີ 25/4, ທ່ານນາຍົກລັດຖະມົນຕີ Nguyen Tan Dung, ຫົວຫນ້າຄະນະຊີ້ນຳສູນກາງກ່ຽວກັບການປ້ອງກັນ, ຕ້ານການສໍ້ລາດບັງຫລວງ ແລະ ທ່ານຮອງນາຍົກລັດຖະມົນຕີ Nguyen Xuan Phuc ຮອງຫົວຫນ້າຄະນະຊີ້ນຳເປັນປະທານຮ່ວມວາລະປະຊຸມຄັ້ງທີ 17 ຂອງຄະນະຊີ້ນຳສູນກາງເພື່ອຕີລາຄາໝາກຜົນວຽກງານປ້ອງກັນ, ຕ້ານການສໍ້ລາດບັງຫລວງໄຕມາດ 1; ທິດທາງ,ຫນ້າທີ່ໄຕມາດ 2 ປີ 2012 ແລະ ປຶກສາຫາລືບັນດາເນື້ອໃນວຽກງານທີ່ກ່ຽວຂ້ອງ, ໃນນັ້ນມີເນື້ອໃນກ່ຽວກັບຮູບແບບຈັດຕັ້ງ, ການເຄື່ອນໄຫວຂອງຄະນະຊີ້ນຳ. ກ່າວຄຳເຫັນທີ່ວາລະປະຊຸມ, ທ່ານນາຍົກລັດຖະມົນຕີ Nguyen Tan Dung ຊີ້ແຈ້ງວ່າ: ຕ້ອງສຸມໃສ່ຊີ້ນຳການປະຕິບັດຢ່າງຄົບຊຸດ, ປະສິດທິຜົນບັນດາເນື້ອໃນການປ້ອງກັນ, ຕ້ານການສໍ້ລາດບັງຫລວງຕາມເນື້ອໃນຈິດໃຈກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 11 ຂອງພັກ, ຕິດພັນກັບການຜັນຂະຫຍາຍປະຕິບັດມະຕິຄະນະບໍລິຫານງານສູນກາງພັກຄັ້ງທີ 4 ຊຸດທີ 11 ກ່ຽວກັບບາງບັນຫາຮີບດ່ວນໃນການກໍ່ສ້າງພັກປະຈຸບັນ, ຖືວຽກງານຕໍ່ສູ້ປ້ອງກັນ, ຕ້ານການສໍ້ລາດບັງຫລວງແມ່ນຫນ້າທີ່ຈຸດສຸມ, ເປັນປະຈຳ, ຕໍ່ເນື່ອງຂອງບັນດາກະຊວງ, ຂະແຫນງການ, ທ້ອງຖິ່ນ. ທ່ານນາຍົກລັດຖະມົນຕີ Nguyen Tan Dung ເນັ້ນຫນັກວ່າ: ພ້ອມກັບການແກ້ໄຂບັນດາກໍລະນີກ່ຽວຂ້ອງເຖິງການສໍ້ລາດບັງຫລວງຢ່າງເຂັ້ມງວດ, ເປີດເຜີຍ ກະຈ່າງແຈ້ງ ຕ້ອງສຸມໃສ່ເຂົ້າໃນວຽກງານຄົ້ນພົບ ແລະ ປ້ອງກັນ. ທ່ານນາຍົກຍັງໃສ່ໃຈວ່າ: ບັນດາອົງການທີ່ມີຫນ້າທີ່ຮັບຜິດຊອບສືບຕໍ່ປະຕິບັດວຽກງານຖະແຫລງຂ່າວ, ໂຄສະນາ, ສຶກສາກ່ຽວກັບການປ້ອງກັນ ແລະ ຕ້ານການສໍ້ລາດບັງຫລວງເປັນຢ່າງດີ.