(vovworld) - ໂດຍສືບຕໍ່ໂຄງການດຳເນີິນງານກອງປະຊຸມຂັ້ນສູງອາຊຽນຄັ້ງທີ 27 ແລະ ບັນດາກອງປະຊຸມຂັ້ນສູງທີ່ກ່ຽວຂ້ອງ, ຕອນເຊົ້າວັນທີ 22/11, ຢູ່ນະຄອນຫຼວງ ກົວລາລຳເປີ, ປະເທດມາເລເຊຍ, ທ່ານນາຍົກລັດຖະມົນຕີ ຫງວຽນເຕີນຢຸງ ພ້ອມກັບການນຳອາຊຽນ ໄດ້ລົງນາມໃນຖະແຫຼງການສ້າງຕັ້ງປະຊາຄົມອາຊຽນ ໃນວັນທີ 31/12/2015 ແລະ ຖະແຫຼງການກ່ຽວກັບວິໄສທັດປະຊາຄົມອາຊຽນ 2025 “ພ້ອມກັນກ້າວຂຶ້ນຢ່າງໝັ້ນຄົງ”. ນີ້ແມ່ນເອກະສານ 2 ສະບັບທີ່ມີລັກສະນະປະຫວັດສາດສຳລັບວິວັດທະນາການຮ່ວມສຳພັນ ແລະ ພັດທະນາຂອງອາຊຽນ ພາຍຫຼັງເກືອບເຄິ່ງສະຕະວັດແຫ່ງການສ້າງຕັ້ງ ແລະ ພັດທະນາ, ບໍ່ພຽງແຕ່ດຶງດູດຄວາມສົນໃຈຂອງປະຊາຊົນ 10 ປະເທດອາຊຽນເທົ່ານັ້ນ, ຫາກຍັງນັບທັງປະຊາຄົມໂລກອີກດ້ວຍ.
ດ້ວຍການເປັນສັກຂີພິຍານຂອງການນຳບັນດາປະເທດຄູ່ເຈລະຈາອາຊຽນ ແລະ ທ່ານເລຂາທິການໃຫຍ່ສະຫະປະຊາຊາດ, ທ່ານນາຍົກລັດຖະມົນຕີ ຫງວຽນເຕີນຢຸງ ພ້ອມກັບການນຳອາຊຽນ ໄດ້ລົງນາມໃນຖະແຫຼງການສ້າງຕັ້ງປະຊາຄົມອາຊຽນ ໃນວັນທີ 31/12/2015, ປະກາດກັບໂລກກ່ຽວກັບການສ້າງຕັ້ງປະຊາຄົມອາຊຽນ ຢ່າງເປັນທາງການ. ນີ້ແມ່ນບາດລ້ຽວປະຫວັດສາດຂອງອາຊຽນ, ຢືນຢັນທີ່ຕັ້ງໃໝ່ຂອງປະຊາຄົມອາຊຽນ ໃນປະຊາຄົມສາກົນ, ເປັນສັນຍາລັກໃນການໃຫ້ຄຳໝັ້ນສັນຍາຢ່າງແຮງຂອງອາຊຽນ ໃນຄວາມມານະພະຍາຍາມປັບປຸງປະຊາຄົມອາຊຽນ ໃຫ້ໝັ້ນຄົງເຂັ້ມແຂງ, ເພື່ອຄາດໝາຍລວມ ແມ່ນສັນຕິພາບ, ສະຖຽນລະພາບ ແລະ ພັດທະນາ. ຖະແຫຼງການສ້າງຕັ້ງປະຊາຄົມອາຊຽນ ເປັນຂີດໝາຍສຳຄັນໃນວິວັດທະນາການຮ່ວມສຳພັນຂອງອາຊຽນ. ພາຍຫຼັງ 48 ປີແຫ່ງວັນສ້າງຕັ້ງ ແລະ ພັດທະນາ, ອາຊຽນ ຈາກອົງການໜຶ່ງບໍ່ທັນມິທັດສະນະລວມຢູ່ພາກພື້ນອາຊີຕາເວັນອອກສ່ຽງໃຕ້ ໄດ້ປືນຕົວຂຶ້ນກາຍເປັນປະຊາຄົມອາຊຽນ ຮ່ວມສຳພັນຢ່າງແໜ້ນແຟ້ນໃນທັງ 3 ເສົ້າຄ້ຳຕົ້ນຕໍແມ່ນ ການເມືອງ-ຄວາມໝັ້ນຄົງ, ເສດຖະກິດ ແລະ ວັດທະນະທຳ - ສັງຄົມ ດ້ວຍທີ່ຕັ້ງນັບມື້ນັບສູງຢູ່ທັງພາກພື້ນ ແລະ ສາກົນ. ການຕົກລົງສ້າງຕັ້ງປະຊາຄົມອາຊຽນ ແມ່ນເປັນການພິສູດໃຫ້ເຫັນຢ່າງມີຊີວິດຊີວາທີ່ສຸດກ່ຽວກັບຄວາມມານະພະຍາຍາມ ຜ່ານຜ່າບັນດາຮົ້ວກີດຂວາງ ແລະ ຄວາມແຕກໂຕນກັນຂອງບັນດາປະເທດສະມາຊິກເພື່ອບັນລຸໄດ້ຄວາມຮັບຮູ້ລວມ, ພ້ອມກັນຮ່ວມແຮງຮ່ວມໃຈກໍ່ສ້າງປະຊາຄົມໜຶ່ງທີ່ມີຄວາມ “ເປັນເອກະພາບໃນຫຼາຍຮູບແບບ” ກໍຄືເຈດຈຳນົງ ແລະ ຄວາມຕັດສິນໃຈດ້ານການເມືອງຂອງບັນດາປະເທດອາຊຽນ ກ່ຽວກັບຄວາມຕ້ອງການເພີ່ມທະວີການຮ່ວມສຳພັນຢູ່ໃນລະດັບສູງກວ່າ ເພື່ອຮັບມືຢ່າງທັນການຕໍ່ກັບບັນດາກາລະໂອກາດ ແລະ ສິ່ງທ້າທາຍທີ່ວາງອອກໃຫ້ພາກພື້ນ. ທ່ານນາຍົກລັດຖະມົນຕີມາເລເຊຍ Najib Tun Abdul Razak ເນັ້ນໜັກວ່າ ເລື່ອງສ້າງຕັ້ງປະຊາຄົມອາຊຽນ 2015 ແມ່ນບາດກ້າວປະຫວັດສາດສຳຄັນຍິ່ງຂອງອາຊຽນ. ອາຊຽນ ໄດ້ກາຍເປັນປະຊາຄົມ “ເຊື່ອມຕໍ່ດ້ານການເມືອງ, ຮ່ວມສຳພັນດ້ານເສດຖະກິດ ແລະ ພ້ອມກັນແບ່ງປັນໜ້າທີ່ຮັບຜິດຊອບຕໍ່ສັງຄົມ” ຢ່າງເປັນທາງການ, ສ້າງພື້ນຖານສຳຄັນເພື່ອໃຫ້ອາຊຽນ ສືບຕໍ່ປັບປຸງ ແລະ ເຮັດໃຫ້ການຮ່ວມສຳພັນພາຍໃນກຸ່ມເລິກເຊິ່ງກວ່າ, ຍົກສູງກຳລັງຄວາມສາມາດຮັບມືລວມຕໍ່ບັນດາສິ່ງທ້າທາຍທີ່ພວມວາງອອກ, ໂດຍສະເພາະແມ່ນການຮັກສາສັນຕິພາບ, ຄວາມໝັ້ນຄົງ, ສະຖຽນລະພາບຢູ່ທະເລຕາເວັນອອກ, ບັນດາສິ່ງທ້າທາຍກ່ຽວກັບສິ່ງແວດລ້ອມ, ໄພພິບັດທຳມະຊາດ, ການກໍ່ການຮ້າຍ.
ທ່ານນາຍົກລັດຖະມົນຕີ ຫງວຽນເຕີນຢຸງ ພ້ອມກັບບັນດາການນຳອາຊຽນ ໄດ້ລົງນາມໃນຖະແຫຼງການວິໄສທັດອາຊຽນ 2025. ນີ້ແມ່ນເອກະສານຕົ້ນຕໍ, ເປັນພື້ນຖານ ແລະ ຂອບເຂດໃຫ້ແກ່ການຮ່ວມສຳພັນອາຊຽນ ໃນໄລຍະ 10 ປີຈະມາເຖິງ. ກຳນົດທິດທົ່ວໄປຂອງວິໄສທັດ ແມ່ນປັບປຸງ ແລະ ຍົກລະດັບການຮ່ວມສຳພັນອາຊຽນ ຢ່າງຮອບດ້ານ ແລະ ເລິກເຊິ່ງ, ກວ້າງຂວາງກວ່າໃນ 3 ເສົ້າຄ້ຳ ການເມືອງ - ຄວາມໝັ້ນຄົງ, ເສດຖະກິດ ແລະ ວັດທະນະທຳ - ສັງຄົມ. ອາຊຽນ ຈະສືບຕໍ່ເປີດກວ້າງການພົວພັນກັບບັນດາຄູ່ຮ່ວມມື, ໂດຍສະເພາະແມ່ນບັນດາຄູ່ເຈລະຈາ; ຍົກສູງປະສິດທິຜົນການເຄື່ອນໄຫວຂອງບັນດາເວທີປາໄສພາກພື້ນທີ່ມີຢູ່ແລ້ວ; ເສີມຂະຫຍາຍບົດບາດໃຈກາງໃນການກຳນົດໂຄງປະກອບພາກພື້ນ, ພ້ອມທັງເພີ່ມທະວີບົດບາດ ແລະ ການປະກອບສ່ວນໃຫ້ທົ່ວໂລກ.
ແລະກໍໃນຕອນເຊົ້າວັນດຽວກັນ, ທ່ານນາຍົກລັດຖະມົນຕີ ຫງວຽນເຕີນຢຸງ ພ້ອມກັບການນຳອາຊຽນ ໄດ້ເຂົ້າຮ່ວມບັນດາກອງປະຊຸມຂັ້ນສູງຄື: ສະເຫຼີມສະຫຼອງ 40 ປີແຫ່ງການພົວພັນອາຊຽນ - ນິວຊີແລນ ແລະ ກອງປະຊຸມຂັ້ນສູງອາຊີຕາເວັນອອກ ຄັ້ງທີ 10.