ທ່ານນາຍົກລັດຖະມົນຕີ ຈີນ ພົບປະກັບທ່ານ ເລຂາທິການໃຫຍ່, ປະທານປະເທດ ລາວ
(VOVWORLD) -ວັນທີ 25 ເມສາ, ທ່ານນາຍົກລັດຖະມົນຕີ ຈີນ ຫຼີເຄີຊຽງ ໄດ້ມີການພົບປະກັບ ທ່ານ ບຸນຍັງ ວໍລະຈິດ ເລຂາທິການໃຫຍ່ ພັກປະຊາຊົນປະຕິວັດ ລາວ ທັງເປັນປະທານປະເທດ ລາວ ເຊິ່ງພວມມີການຢ້ຽມຢາມປັກກິ່ງ ແລະ ເຂົ້າຮ່ວມເວທີປາໄສ ການຮ່ວມມືສາກົນ “ໜຶ່ງແລວທາງ ແລະ ໜຶ່ງເສັ້ນທາງ” ຄັ້ງທີ 2.
 ທ່ານນາຍົກລັດຖະມົນຕີ ຈີນ ຫຼີເຄີຊຽງ ພົບປະກັບ ທ່ານ ບຸນຍັງ ວໍລະຈິດ ເລຂາທິການໃຫຍ່ ພັກປະຊາຊົນປະຕິວັດ ລາວ ທັງເປັນປະທານປະເທດ ລາວ (ພາບ: TTXVN) |
ທີ່ການພົບປະ, ທ່ານນາຍົກລັດຖະມົນຕີ ຈີນ ຫຼີເຄີຊຽງ ສະແດງວ່າ ຈີນ ພ້ອມແລ້ວທີ່ຈະຮ່ວມມືກັບ ລາວ ເພື່ອເພີ່ມທະວີການຈັດຕັ້ງປະຕິບັດຄວາມເຫັນດີເຫັນພ້ອມ ເຊິ່ງການນໍາສອງພັກ, ສອງລັດ ບັນລຸໄດ້; ສືບຕໍ່ປັບປຸງການພົວພັນມິດຕະພາບທີ່ເປັນມູນເຊື້ອ ແລະ ເພີ່ມທະວີການພົບປະແລກປ່ຽນຄະນະຜູ້ແທນຂັ້ນສູງ. ທ່ານ ຫຼີເຄີຊຽງ ກໍຢັ້ງຢືນວ່າ ຈີນ ພ້ອມແລ້ວທີ່ຈະສົມທົບ ຂໍ້ລິເລີ່ມ “ໜຶ່ງແລວທາງ ແລະ ໜຶ່ງເສັ້ນທາງ” (BRI) ກັບ ຍຸດທະສາດພັດທະນາຂອງລາວ ພ້ອມທັງບັນລຸໄດ້ຄວາມຄືບໜ້າໃໝ່ໃນບັນດາໂຄງການໃຫຍ່ ຄື ແລວເສດຖະກິດ ຈີນ - ລາວ ແລະ ເສັ້ນທາງລົດໄຟ ຈີນ - ລາວ.
ສ່ວນທ່ານເລຂາທິການໃຫຍ່, ປະທານປະເທດ ລາວ ບຸນຍັງ ວໍລະຈິດ ໃຫ້ຮູ້ວ່າ ລາວ ຖືເປັນສໍາຄັນ ແລະ ຕັ້ງໜ້າເຂົ້າຮ່ວມຂໍ້ລິເລີ່ມ “ໜຶ່ງແລວທາງ ແລະ ໜຶ່ງເສັ້ນທາງ” ແລະ ມີຄວາມເພິ່ງພໍໃຈຕໍ່ຄວາມຄືບໜ້າຂອງບັນດາໂຄງການໃຫຍ່ຄື ເສັ້ນທາງລົດໄຟ ຈີນ - ລາວ. ທ່ານກໍສະແດງຄວາມຂອບອົກຂອບໃຈ ຈີນ ທີ່ໄດ້ໜູນຊ່ວຍການພັດທະນາເສດຖະກິດ-ສັງຄົມ ຂອງລາວ ຢ່າງແຮງ, ພ້ອມທັງໃສ່ໃຈວ່າ ສອງປະເທດຄວນຮ່ວມມືກັນກໍ່ສ້າງປະຊາຄົມລວມອະນາຄົດ ແລະ ຊຸກຍູ້ການພົວພັນລະຫວ່າງ ສອງພັກ ແລະ ສອງລັດ ໃຫ້ຂຶ້ນສູ່ລະດັບສູງໃໝ່.