(vovworld) - ຕອນເຊົ້າວັນທີ 28/03 (ຕາມເວລາຫວຽດນາມ), ຢູ່ນະຄອນຫຼວງ La Habana. ທ່ານປະທານສະພາແຫ່ງລັດ ແລະ ສະພາລັດຖະມົນຕີສ.ກູບາ Raul Castro Ruz ໄດ້ມີການເຈລະຈາກັບທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸງ. 2 ຝ່າຍຢືນຢັນຄວາມຕັດສິນໃຈປັບປຸງ ແລະ ເຮັດໃຫ້ການພົວພັນສາມັກຄີຖານອ້າຍນ້ອງ, ມິດຕະພາບທີ່ເປັນມູນເຊື້ອ ແລະ ຮ່ວມມືຢ່າງຮອບດ້ານລະຫວ່າງຫວຽດນາມ ກູບາ ເລິກເຊິ່ງຂຶ້ນຕື່ມ, ເພື່ອຮັບໃຊ້ພາລະກິດປົກປັກຮັກສາປະເທດຊາດ ແລະ ສ້າງລັດທິສັງຄົມນິຍົມຂອງແຕ່ລະປະເທດ.
ທ່ານນາຍົກລັດຖະມົນຕີຫງວຽນເຕີນຢຸງ ແລະ ທ່ານປະທານ Raul Castro Ruz ໄດ້ແລກປ່ຽນ ແລະ ເປັນເອກະພາບນຳກັນທິດທາງໃຫຍ່ ແລະ ບັນດາມາດຕະການເພີ່ມທະວີການພົວພັນລະຫວ່າງຫວຽດນາມ - ກູບາ ໃນໄລຍະຈະມາເຖິງ, ໂດຍສະເພາະແມ່ນໃນບັນດາຂົງເຂດເຊິ່ງ 2 ຝ່າຍມີຄວາມສາມາດບົມຊ້ອນ ແລະ ມີທ່າແຮງ ເພື່ອເພີ່ມເຕີມໃຫ້ກັນຄື: ການຄ້າ, ກະສິກຳ, ເອເລັກໂຕນິກ - ໂທລະຄົມ, ພະລັງງານ, ເຕັກໂນໂລຊີຊີວະສາດ - ການຢາ....
ການນຳ ກູບາ ໄດ້ຕີລາຄາສູງບັນດາຜົນງານອັນໃຫຍ່ຫຼວງໃນພາລະກິດປ່ຽນໃໝ່ຂອງຫວຽດນາມ, ສະແດງໃຫ້ເຫັນການຖືເປັນສຳຄັນການແລກປ່ຽນບັນດາບົດຮຽນໃນວິວັດແຫ່ງການປ່ຽນໃໝ່ຢູ່ຫວຽດນາມ ແລະ ຊອກຮູ້ຮູບແບບພັດທະນາເສດຖະກິດຢູ່ກູບາ. ທ່ານປະທານ Raul Castro Ruz ເນັ້ນໜັກວ່າ ພັກ, ລັດ ແລະ ປະຊາຊົນກູບາ ຕີລາຄາສູງການຢ້ຽມຢາມກູບາ ຢ່າງເປັນທາງການຂອງທ່ານນາຍົກລັດຖະມົນຕີ ຫງວຽນເຕີນຢຸງ ແລະ ຄະນະຜູ້ແທນຂັ້ນສູງຫວຽດນາມ ຄັ້ງນີ້; ຢືນຢັນການຢ້ຽມຢາມຄັ້ງນີ້ແມ່ນໂອກາດທີ່ດີ ເພື່ມມທະວີການພົວພັນມິດຕະພາບທີ່ເປັນມູນເຊື້ອຖານອ້າຍນ້ອງລະຫວ່າງຫວຽດນາມ - ກູບາ ໃນທຸກຂົງເຂດລະອຽດ, ເພື່ອຜົນປະໂຫຍດຂອງທັງ 2 ປະເທດ ແລະ ປະຊາຊົນ 2 ຊາດ.
ພາຍຫຼັງການເຈລະຈາ, ທ່ານປະທານ Raul Castro Ruz ໄດ້ຕາງໜ້າໃຫ້ລັດກູບາ ປະດັບຫຼຽນໄຊ Jose marti, ເຊິ່ງແມ່ນຫຼຽນໄຊອັນສູງສົ່ງທີ່ສຸດຂອງພັກ ແລະ ລັດ ສ.ກູບາ ໃຫ້ທ່ານນາຍົກລັດຖະມົນຕີ ຫງວຽນເຕີນຢຸງ. ເນື່ອງໃນໂອກາດນີ້, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ມອບເຂົ້າສານ 5.000 ໂຕນ, ເຄື່ອງກອມພິວເຕີ 100 ຊຸດໃຫ້ປະຊາຊົນກູບາ ເປັນຂອງຂວັນ. ຕໍ່ຈາກນັ້ນທ່ານນາຍົກລັດຖະມົນຕີ ຫງວຽນເຕີນຢຸງ ແລະ ທ່ານປະທານ Raul Castro Ruz ໄດ້ເປັນສັກຂີພິຍານພິທີລົງນາມໂຄງການດຳເນີນງານເສດຖະກິດໄລຍະກາງ ລະຫວ່າງ 2 ລັດຖະບານ ແລະ ບົດບັນທຶກຊ່ວຍຈຳຮ່ວມມືໃນຂົງເຂດສາທາລະນະສຸກ. ໃນຂອບເຂດການຢ້ຽມຢາມ, ບັນດາກະຊວງ, ຂະແໜງການຂອງ 2 ປະເທດໄດ້ລົງນາມຂໍ້ຕົກລົງຮ່ວມມືໃນຂົງເຂດກະສິກຳ, ປ້ອງກັນຊາດ. ສິ້ນສຸດການຢ້ຽມຢາມກູບາ ຂອງທ່ານນາຍົກລັດຖະມົນຕີ ຫງວຽນເຕີນຢຸງ, 2 ຝ່າຍໄດ້ອອກແຈ້ງຂ່າວໜັງສືພິມຫວຽດນາມ - ກູຍບາ.
ກ່ອນໜ້ານັ້ນ, ຕອນຄໍ່າວັນທີ 27/03, ທ່ານນາຍົກລັດຖະມົນຕີ ຫງວຽນເຕີນຢຸງ ແລະ ຄະນະຜູ້ແທນຫວຽດນາມ ໄດ້ໄປສຳຫຼວດຕົວຈິງລະດັບຄວາມຄືບໜ້າ ແລະ ປະສິດທິຜົນຂອງການຜັນຂະຫຍາຍຮູບແບບໂຄງການຮ່ວມມືພັດທະນາເຂົ້າສານຫວຽດນາມ - ກູບາ ຢູ່ນິຄົມກະເສດ Cubancan ຢູ່ແຂວງ Pinar del Rio.
ສື່ມວນຊົນກູບາສືບຕໍ່ໃຫ້ຂ່າວກ່ຽວກັບການຢ້ຽມຢາມຂອງນາຍົກລັດຖະມົນຕີຫງວຽນເຕິນຢຸງ
ທ່ານນາຍົກລັດຖະມົນຕີຫງວຽນເຕິນຢຸງ ແລະ ປຊຊ ນະຄອນຫຼວງລາຮາວານ
(ພາບ: Đức Tám/TTXVN)
ໜັງສືພິມ Gramma ສຽງຂອງພັກກອມມູນິດກູບາ ແລະ ໜັງສືພິມ “ຊາວໜຸ່ມລຸກຮຶ້ຂຶ້ນ“ ສຽງຂອງຄະນະຊາວໜຸ່ມກອມມູນິດກູບາສະບັບອອກວັນທີ 27/3, ລ້ວນແຕ່ໃຫ້ຂ່າວການນຳກູບາ Fidel Castro ໃຫ້ການຕ້ອນຮັບ ແລະ ໂອ້ລົມກັບທ່ານນາຍົກລັດຖະມົນຕີຫງວຽນເຕິນຢຸງ ຢ່າງສະໜິດສະໜົມໃນໜ້າທຳອິດ.
ໜັງສືພິມຕ່າງໆໄດ້ຊີ້ແຈ້ງວ່າ, ໃນການພົບປະຢ່າງສະໜິດສະໜົມ ແລະ ມິດຕະພາບຖານອ້າຍນ້ອງ ແລະ ຄວາມເຂົ້າອົກເຂົ້າໃຈຊື່ງກັນ ແລະ ກັນ, ສອງຝ່າຍໄດ້ແລກປ່ຽນກ່ຽວກັບສາຍພົວພັນປະຫວັດສາດລະຫວ່າງຫວຽດນາມ-ກູບາ ກໍ່ຄືບົດຮຽນຂອງສອງປະເທດໃນການພັດທະນາເສດຖະກິດ-ສັງຄົມ. ໜັງສືພິມ Gramma ໄດ້ລົງພິມຊີວະປະຫວັດຫຍໍ້ຂອງທ່ານນາຍົກລັດຖະມົນຕີຫງວຽນເຕິນຢຸງ ພ້ອມກັບຂ່າວ ແລະ ພາບການພົບປະ, ເຮັດວຽກລະຫວ່າງທ່ານນາຍົກລັດຖະມົນຕີ ຫງວຽນເຕິນຢຸງ ແລະ ທ່ານຮອງປະທານຜູ້ທີ 1 ສະພາແຫ່ງລັດ ແລະ ສະພາລັດຖະມົນຕີກູບາ Miguel Dias Canel ແລະ ການພົບປະກັບທ່ານປະທານສະພາແຫ່ງຊາດກູບາ Esteban Lazo Hernandez ຢູ່ນະຄອນຫຼວງລາຮາວານ. ໃນບົດຂຽນດ້ວຍຫົວຂໍ້ “ກູບາ ແລະ ຫວຽດນາມ ພ້ອມແລ້ວທີ່ຈະເພີ່ມທະວີການພົວພັນດ້ານເສດຖະກິດ-ການຄ້າ ແລະ ວິທະຍາສາດ-ເຕັກນິກ“, ໜັງສືພິມ “ຊາວໜຸ່ມລຸກຮຶ້ຂຶ້ນ“ ໄດ້ເນັ້ນຫນັກວ່າ: ທ່ານນາຍົກລັດຖະມົນຕີຫງວຽນເຕິນຢຸງ ໄດ້ຕີລາຄາສູງບັນດາຜົນງານໃນຫຼາຍຂົງເຂດຂອງກູບາ ແລະ ສະແດງຄວາມຂອບອົກຂອບໃຈຕໍ່ການສະໜັບສະໜູນຂອງກູບາ ຕໍ່ຫວຽດນາມ ໃນພາລະກິດຕໍ່ສູ້ປົດປ່ອຍຊາດ, ປົກປັກຮັກສາປະເທດຊາດໃນເມື່ອກ່ອນ ກໍ່ຄືພາລະກິດສ້າງສາປະເທດຊາດໃນປະຈຸບັນ./.