(vovworld) - ທີ່ການຕອ້ນຮັບຜູ້ຕາງໜ້າກຸ່ມບໍລິສັດນ້ຳມັນອາຍແກັດ Exxonmobil ໃນຕອນເຊົ້າວັນທີ 22/5, ຮອງປະທານຂອງກຸ່ມບໍລິສັດນ້ຳມັນອາຍແກັດ Exxonmobil (ອາເມລິກາ) ສອງທ່ານແມ່ນ ທ່ານ Peter P.Clark ແລະ ທ່ານ Raymond E.Jones ໄດ້ແຈ້ງໃຫ້ທ່ານປະທານປະເທດ ເຈືອງເຕີ໋ນຊາງ ຊາບກ່ຽວກັບໝາກຜົນທີ່ຕັ້ງໜ້າໃນການຮ່ວມມື, ຜັນຂະຫຍາຍບັນດາໂຄງການລະຫວ່າງກຸ່ມບໍລິສັດນ້ຳມັນອາຍແກັດ Exxonmobil ກັບ ກຸ່ມບໍລິສັດນ້ຳມັນອາຍແກັດ ຫວຽດນາມ. ຜູ້ຕາງໜ້າຂອງກຸ່ມບໍລິສັດນ້ຳມັນອາຍແກັດ Exxonmobil ສະແດງຄວາມຫວັງວ່າບັນດາໂຄງການທີ່ໄດ້ຮັບການຜັນຂະຫຍາຍຢ່າງສະດວກສະບາຍຈະນຳມາເຊິ່ງຜົນປະໂຫຍດໃຫ້ທັງສອງຝ່າຍ. ທ່ານປະທານປະເທດ ເຈືອງເຕີ໋ນຊາງ ຕີລາຄາສູງການຮ່ວມມືຂອງບັນດາວິສາຫະກິດ ອາເມລິກາ, ປະກອບສ່ວນຍົກສູງວົງເງິນການຄ້າພ້ອມທັງສະໜັບສະໜູນ ຫວຽດນາມ ເຂົ້າຮ່ວມ TPP. ທ່ານປະທານປະເທດຢືນຢັນວ່າ ຫວຽດນາມ ສະໜັບສະໜູນບັນດາການເຄື່ອນໄຫວຮ່ວມມືຂອງວິສາຫະກິດ ອາເມລິກາ ກັບຄູ່ຮ່ວມມື ຫວຽດນາມ ໃນຂົງເຂດນ້ຳມັນອາຍແກັດ. ທ່ານປະທານປະເທດປາດຖະໜາວ່າທັງວິສາຫະກິດ ອາເມລິກາ ກໍ່ຄືບັນດາຄູ່ຮ່ວມມືຕ່າງປະເທດມາ ຫວຽດນາມ ລ້ວນແຕ່ບັນລຸໄດ້ຜົນສຳເລັດຫຼາຍຢ່າງ, ຕີລາຄາສູງເຈດຕະນາທີ່ຕັ້ງໜ້າຂອງກຸ່ມບໍລິສັດນ້ຳມັນອາຍແກັດ Exxonmobil ໃນວິວັດການສຳຫຼວດ, ປະຕິບັດສົມທົບກັບຄູ່ຮ່ວມມື ຫວຽດນາມ, ທ່ານປະທານປະເທດສະເໜີໃຫ້ສອງຝ່າຍພ້ອມກັນສຸມໃສ່ປະຕິບັດບັນດາສັນຍາການຄ້າໃນປີ 2014 ຢ່າງມີປະສິດທິຜົນ.