(vovworld) – ຕອນບ່າຍວັນທີ 5/3, ທີ່ ຮ່າໂນ້ຍ, ທີ່ການຕ້ອນຮັບສະມາຊິກສະພາແຫ່ງຊາດ ຍີ່ປຸນ ທ່ານ KeizoTakemi, ທ່ານປະທານປະເທດ ເຈືອງເຕີ໋ນຊາງ ສະແດງຄວາມພາກພູມໃຈເມື່ອໄດ້ເຫັນສາຍພົວພັນລະຫວ່າງສອງປະເທດໄດ້ມີບາດກ້າວພັດທະນະຢ່າງແຮງ, ເລິກເຊິ່ງ; ຄວາມເຊື່ອໝັ້ນດ້ານການເມືອງລະຫວ່າງ ຫວຽດນາມ ແລະ ຍີ່ປຸນ ນັບມື້ນັບໄດ້ຮັບການເພີ່ມທະວີ. ທ່ານປະທານປະເທດ ຂອບໃຈ ຍີ່ປຸນ ໄດ້ໜູນຊ່ວຍຢ່າງຕັ້ງໜ້າໃຫ້ແກ່ການພັດທະນາເສດຖະກິດ - ສັງຄົມ ຂອງ ຫວຽດນາມ ໂດຍຜ່ານແຫຼ່ງທຶນ ODA ໃນກວ່າ 20 ປີຜ່ານມາ. ທ່ານປະທານປະເທດ ຊົມເຊີຍຂໍ້ລິເລີ່ມໃນການຮ່ວມມືຂອງຂະແໜງການສາທາລະນະສຸກສອງປະເທດ, ໃນນັ້ນ ຍີ່ປຸນໄດ້ໜູນຊ່ວຍ ຫວຽດນາມ ກໍ່ສ້າງໂຮງໝໍ ເຈີ້ໄຣ, ຮ່ວມມືໃນການປ້ອງກັນຕ້ານໂລກມະເຮັງ, ແບ່ງປັນບົດຮຽນໃນການສ້າງໂຄງການປະກັນສຸຂະພາບທົ່ວປະຊາຊົນ, ລົງທຶນເຂົ້າໃນການຜະລິດພາຫະນະອຸປະກອນການແພດ. ທ່ານປະທານປະເທດ ເຈືອງເຕີ໋ນຊາງ ເຊື່ອໝັ້ນວ່າດ້ວຍຖານະຄືປັດຈຸບັນ, ທ່ານ KeizoTakemi ຈະສືບຕໍ່ປະກອບສ່ວນຢ່າງຕັ້ງໜ້າເຂົ້າໃນວຽກງານຜັນຂະຫຍາຍບັນດາເນື້ອໃນການຮ່ວມມື, ປະກອບສ່ວນປັບປຸງນ້ຳໃຈມິດຕະພາບທີ່ດີງາມລະຫວ່າງສອງປະເທດ.
ສ່ວນທ່ານ KeizoTakemi ຢືນຢັນວ່າສາຍພົວພັນຮ່ວມມືໃນຂົງເຂດສາທາລະນະສຸກ ລະຫວ່າງ ຍີ່ປຸນ ແລະ ຫວຽດນາມ ພວມນັບມື້ນັບໝັ້ນຄົງ ແລະ ເຊື່ອໝັ້ນວ່າ ຫວຽດນາມ ແລະ ຍີ່ປຸນ ພ້ອມກັນວາງອອກກົນໄກ, ນະໂຍບາຍເພື່ອເຮັດໃຫ້ວຽກງານປະກັນໄພສຸຂະພາບທົ່ວປະຊາຊົນບັນລຸຜົນດີ. ທ່ານສະມາຊິກສະພາສູງ ຍີ່ປຸນ ຢືນຢັນວ່າຈະສືບຕໍ່ປະກອບສ່ວນເຂົ້າໃນການພັດທະນາລວມຂອງສອງປະເທດ.