ທ່ານປະທານປະເທດ Truong Tan Sang ພົບປະເຈລະຈາກັບນາຍົກລັດຖະມົນຕີລັດເຊຍ

ວັນສຸກ ທີ 27 ກໍລະກົດ ຄ.ສ. 2012 | 15:40:00

ທ່ານປະທານປະເທດ Truong Tan Sang
ພົບປະເຈລະຈາກັບທ່ານນາຍົກລັດຖະມົນຕີລັດເຊຍ Dmitry Medvedev
( ພາບ: truongtansang.net )

( vovworld ) - ຕອນບ່າຍວັນທີ 26/7, ທ່ານປະທານປະເທດຫວຽດນາມ Truong Tan Sang ໄດ້ເດີນທາງໄປເຖິງນະຄອນຫຼວງມົດສກູ, ສະຫະພັນລັດເຊຍ, ເລີ່ມຕົ້ນການຢ້ຽມຢາມສັນຖະວະໄມຕີສະຫະພັນລັດເຊຍ ຢ່າງເປັນທາງການ, ຕາມຕຳເຊື້ອເຊີນຂອງທ່ານປະທານາທິລໍດີລັດເຊຍ Vladimir Putin. ພາຍຫຼັງພິທີ່ຕ້ອນຮັບຢູ່ສະໜາມບິນ Vnukovo 2, ທ່ານປະທານປະເທດ Truong Tan Sang ໄດ້ມີການພົບປະເຈລະຈາກັບທ່ານນາຍົກລັດຖະມົນຕີລັດເຊຍ Dmitry Medvedev. ທີ່ການພົບປະເຈລະຈາ, ສອງຝ່າຍໄດ້ເຫັນດີໂດຍຖືວ່າ ໃນໄລຍະທີ່ຜ່ານມາ, ການພົວພັນຄູ່ຮ່ວມມືຍຸດທະສາດລະຫວ່າງຫວຽດນາມ ແລະ ລັດເຊຍ ໄດ້ມີບາດກ້ວາພັດທະນາຢ່າງແຂງແຮງ, ນັບມື້ນັບແທດຈິງ ແລະ ມີປະສິດທິຜົນ. ຄວາມໄວ້ເນື້ອເຊື່ອໃຈດ້ານການເມືອງໄດ້ຮັບການເພີ່ມທະວີຢ່າງບໍ່ຢຸດຢັ້ງ, ການພົວພັນຮ່ວມມືເສດຖະກິດ - ການຄ້າ, ວິທະຍາສາດເຕັກໂນໂລຊີ, ປ້ອງກັນຊາດປ້ອງກັນຄວາມສະຫງົບ... ສືບຕໍ່ໄດ້ຮັບການເປີດກວ້າງ ແລະ ມີບາດກ້າວຫັນປ່ຽນທີ່ໃຫຍ່ຫຼວງ. ສອງຝ່າຍໄດ້ຕີລາຄາສູງບັນດາໂຄງການຮ່ວມມືຍຸດທະສາດເຊິ່ງຫວຽດນາມ ແລະ ລັດເຊຍ ພວມປະຕິບັດ, ໃນນັ້ນໄດ້ເນັ້ນໜັກເຖິງຄວາມສຳຄັນຂອງການຮ່ວມມືໃນຂົງເຂດນ້ຳມັນອາຍແກັດ, ໄຟຟ້ານິວເຄຼຍ ດ້ວຍເລື່ອງສອງຝ່າຍພວມຜັນຂະຫຍາຍໂຄງການກໍ່ສ້າງໂຮງງານໄຟຟ້ານິວເຄຼຍ ນິງທ້ວນເລກ 1.

ທ່ານນາຍົກລັດຖະມົນຕີ Dmitry Medvedev ໄດ້ຢືນຢັນວ່າ ລັດຖະບານສະຫະພັນລັດເຊຍ ຈະສືບຕໍ່ເອົາໃຈໃສ່ຊີ້ນຳການຜັນຂະຫຍາຍບັນດາໂຄງການໃນຂົງເຂດພະລັງງານເປັນຢ່າງດີ, ສ້າງທຸກເງື່ອນໄຂສະດວກ ເພື່ອໃຫ້ບັນດາວິສາຫະກິດນ້ຳມັນອາຍແກັດຂອງສອງປະເທດຜັນຂະຫຍາຍປະຕິບັດບັນດາສັນຍາທີໄດ້ຮັບການລົງນາມໂດຍໄວ ກໍຄືເປີດກວ້າງການເຄື່ອນໄຫວສຳຫຼວດ, ຂຸດຄົ້ນນ້ຳມັນອາຍແກດຢູ່ລັດເຊຍ.

ທ່ານປະທານປະເທດ Truong Tan Sang ໄດ້ຢືນຢັນວ່າ ຫວຽດນາມ ຈະສ້າງທຸກເງື່ອນໄຂສະດວກເພື່ອໃຫ້ບັນດາບໍລິສັດ ແລະ ກຸ່ມບໍລິສັດນຳມັນອາຍແກັດຂອງລັດເຊຍ ສືບຕໍ່ສຳຫຼວດ ຂຸດຄົ້ນຢູ່ໄຫຼ່ທະວີບຂອງຫວຽດນາມ. ການນຳສອງປະເທດໄດ້ເຫັນດີຊຸກຍູ້ການເຈລະຈາລົງນາມໃນສັນຍາການຄ້າເສລີ (FTA) ລະຫວ່າງການນຳຫວຽດນາມ ແລະ ພັນທະພາບພາສີ, ຖືນີ້ແມ່ນມາດຕະການທີ່ມີຄວາມສຳຄັນຍິ່ງ ແລະ ຈຳເປັນເພື່ອເພີ່ມວົງເງິນການຄ້າສອງສົ້ນ, ເປີດແງ່ວັງທີ່ໃຫຍ່ຫຼວງໃຫ້ການພົວພັນຮ່ວມມືເສດຖະກິດ, ການຄ້າ, ການລົງທຶນ, ການບໍລິການລະຫວ່າງສອງປະເທດໃນໄລຍະຈະມາເຖິງ.

ທ່ານປະທານປະເທດ Truong Tan Sang ແລະ ທ່ານນາຍົກລັດຖະມົນຕີ Dmitry Medvedev ໄດ້ຕີລາຄາສູງໝາກຜົນຂອງການຮ່ວມມືດ້ານປ້ອງກັນຊາດ, ເຕັກນິກການທະຫານລະຫວ່າງສອງປະເທດໃນໄລຍະຜ່ານມາ, ສອງຝ່າຍໄດ້ຢືນຢັນວ່າຈະສືບຕໍ່ເພີ່ມທະວີການຮ່ວມມືກ່ຽວກັບດ້ານສຶກສາບຳລຸງສ້າງ, ວິທະຍາສາດ, ເຕັກໂນໂລຊີ...

ແລະກໍໃນຕອນຄໍ່າວັນດຽວກັນ, ທ່ານປະທານປະເທດ Truong Tan Sang ໄດ້ໄປຢ້ຽມຢາມ ແລະ ໂອ້ລົມກັບພະນັກງານສະຖານທູດ, ວົງຄະນະຍາດຊາວຫວຽດນາມ ແລະ ວິສາຫະກິດຫວຽດນາມ ຢູ່ສະຫະພັນລັດເຊຍ...