ທ່ານປະທານສະພາສູງລັດເຊຍຮຽກຮ້ອງຝ່າຍຕາເວັນຕົກສົນທະນາກ່ຽວກັບສະພາບການຢູແກຼນ

ວັນພະຫັດ ທີ 6 ມີນາ ຄ.ສ. 2014 | 16:43:14

ສະພາບການຢູ່ ຢູແກຼນ ຄວນແກ້ໄຂຜ່ານການສົນທະນາ
ພາບປະກອບ

(vovworld) - ວັນທີ 5/3, ທ່ານນາງປະທານສະພາສູງລັດເຊຍ Valentia Matvienko ໄດ້ຮຽກຮ້ອງບັນດາປະເທດຝ່າຍຕາເວັນຕົກປະລະການກະທຳນາບຂູ່ ແລະ ຫັນມາສົນທະນາກັບລັດເຊຍກ່ຽວກັບ ສະພາບການ ຢູແກຼນ. ກ່າວຄຳເຫັນກັບນັກຂ່າວພາຍຫລັງກອງປະຊຸມຄົບຄະນະ, ທ່ານປະທານສະພາສູງລັດເຊຍ ໄດ້ເນັ້ນຫນັກວ່າ: ການນາບຂູ່ຈະບໍ່ມີປະສິດທິຜົນໃນສະພາບການໂລກປະຈຸບັນ ຫາກຄວນຫັນໄປສູ່ການສົນທະນາ. ປະຈຸບັນ, ພື້ນຖານເສດຖະກິດຂອງ ລັດເຊຍ ໄດ້ເຊື່ອມໂຍງຢ່າງເລິກເຊິ່ງເຂົ້າກັບພື້ນຖານເສດຖະກິດໂລກ ຍາກທີ່ເຮັດໃຫ້ລັດເຊຍ ຕົກຢູ່ໂດດດຽວໄດ້. ຕາມທ່ານນາງ Matvienko, ຕະຫລາດລັດເຊຍ ພວມຈຳຫນ່າຍ 40% ປະລິມານສິນຄ້ານຳເຂົ້າຈາກ ອີຢູ ແລະ 50% ປະລິມານສິນຄ້າຂອງລັດເຊຍ ສົ່ງໄປຍັງບັນດາປະເທດ ອີຢູ, ສະນັ້ນ ການນຳໃຊ້ບັນດາມາດຕະການປັບໄຫມດ້ານເສດຖະກິດທີ່ມີຕໍ່ລັດເຊຍ ຈະກໍ່ຄວາມເສຍຫາຍດ້ານເສດຖະກິດອັນໃຫຍ່ຫລວງໃຫ້ທັງສອງຝ່າຍ. ກ່ອນຫນ້ານັ້ນ, ໃນວັນດຽວກັນ, ປະທານາທິບໍດີ ລັດເຊຍ Vladimir Putin ຖະແຫລງວ່າ ລັດເຊຍ ບໍ່ຢາກໃຫ້ຄວາມເຄັ່ງຕຶງດ້ານການເມືອງເຮັດໃຫ້ການຮ່ວມມືເສດຖະກິດກັບບັນດາຄູ່ຮ່ວມມືຂອງປະເທດນີ້ຊົ່ວຮ້າຍລົງ ແລະ ສະແດງຄວາມຫວັງຫລິກລ້ຽງການຖົກຖຽງກັບຝ່າຍຕາເວັນຕົກກ່ຽວກັບບັນຫາ ຢູແກຼນ.

ລັດເຊຍ, ອາເມລິກາ, ອີຢູ ເຫັນດີແກ້ໄຂວິກິດການຢູ່ຢູແກຼນຜ່ານການສົນທະນາ

ພາຍຫລັງການພົບປະຂັ້ນລັດຖະມົນຕີຢູ່ ປາຣີ ປະເທດ ຝລັ່ງ ກ່ຽວກັບສະພາບການ ຢູແກຼນ, ວັນທີ 5/3, ທ່ານ John Kerry ລັດຖະມົນຕີການຕ່າງປະເທດ ລັດເຊຍ ໄດ້ຖະແຫລງຕໍ່ວົງການນັກຂ່າວວ່າ: ອາເມລິກາ, ລັດເຊຍ ແລະ ສະຫະພາບເອີລົບ(ອີຢູ) ລ້ວນແຕ່ເຫັນດີວ່າ: ວິກິດການຢູ່ ຢູແກຼນ ກໍຄືສະພາບການສັບສົນທີ່ເກີດຂຶ້ນ ຄວນແກ້ໄຂຜ່ານການສົນທະນາ.

ທຸກຝ່າຍເຫັນດີເປັນເອກະສັນກັນວ່າ: ສືບຕໍ່ສູ້ຢັນກັນຈະບໍ່ນຳມາຜົນປະໂຫຍດໃຫ້ບໍ່ວ່າຝ່າຍໃດ. ສ່ວນຜູ້ຕາງຫນ້າລັດຖະມົນຕີການຕ່າງປະເທດ ລັດເຊຍ ໃຫ້ຮູ້ວ່າ: ບັນດາຝ່າຍເຫັນດີ ຄວນຫນູນຊ່ວຍປະຊາຊົນ ຢູແກຼນ ປະຕິບັດຂໍ້ຕົກລົງທີ່ໄດ້ລົງນາມເມື່ອວັນທີ 21/2 ກ່ຽວກັບການປະຕິຮູບລັດຖະທຳມະນູນ, ສ້າງລັດຖະບານໄກເກ່ຍປອງດອງຊາດ ແລະ ດຳເນີນການເລືອກຕັ້ງປະທານາທິບໍດີ.