ທ່ານເວືອງດິ່ງເຫວ້ ໄດ້ຮັບການເລືອກຕັ້ງເປັນປະທານສະພາແຫ່ງຊາດຫວຽດນາມ
(VOVWORLD) - ບັນດາສະມາຊິກສະພາແຫ່ງຊາດທີ່ມີໜ້າໃນວາລະປະຊຸມເມື່ອຕອນເຊົ້າວັນທີ 31 ມີນາ ໃນຂອບເຂດກອງປະຊຸມສະໄໝສາມັນເທື່ອທີ 11 ສະພາແຫ່ງຊາດຫວຽດນາມຊຸດທີ XIV ໄດ້ເຫັນດີເລືອກຕັ້ງທ່ານ ເວືອງດິ່ງເຫວ້, ເລຂາຄະນະພັກນະຄອນ ຮ່າໂນ້ຍ ເປັນປະທານສະພາແຫ່ງຊາດ, ປະທານສະພາເລືອກຕັ້ງແຫ່ງຊາດ ແທນໃຫ້ ທ່ານນາງ ຫງວຽນທິກິມເງິນ ທີ່ສະພາແຫ່ງຊາດໄດ້ໃຫ້ພົ້ນຕຳແໜ່ງໃນຕອນບ່າຍວັນທີ 30 ມີນາ.
 ທ່ານ ເວືອງດິ່ງເຫວ້ ສາບານຕົວເຂົ້າຮັບດຳລົງຕຳແໜ່ງເປັນປະທານສະພາແຫ່ງຊາດ ຫວຽດນາມ ຫງວຽນທິກິມເງິນ (ພາບ: baochinhphu.vn) |
ກ່າວຄຳເຫັນພາຍຫຼັງພິທີສາບານຕົວເຂົ້າຮັບດຳລົງຕຳແໜ່ງ, ທ່ານ ເວືອງດິ່ງເຫວ້ ຢັ້ງຢືນວ່າ:
“ໃນຖານະເປັນປະທານສະພາແຫ່ງຊາດ, ຂ້າພະເຈົ້າຈະເຮັດຈົນສຸດຄວາມສາມາດຂອງຕົນ ພ້ອມກັບສະມາຊິກທັງໝົດໃນຄະນະປະຈຳສະພາແຫ່ງຊາດ, ບັນດາອົງການຈັດຕັ້ງຂອງສະພາແຫ່ງຊາດ, ບັນດາອົງການຂອງຄະນະປະຈຳສະພາແຫ່ງຊາດ ແລະ ບັນດາສະມາຊິກສະພາແຫ່ງຊາດ ສືບທອດ, ເສີມຂະຫຍາຍມູນເຊື້ອອັນດີງາມ ແລະ ຜົນງານອັນໃຫຍ່ຫຼວງຂອງສະພາແຫ່ງຊາດຜ່ານແຕ່ລະໄລຍະ, ສືບຕໍ່ປ່ຽນແປງໃໝ່ແບບວິທີ, ຍົກສູງຄຸນນະພາບ, ປະສິດທິຜົນຂອງການເຄື່ອນໄຫວຂອງສະພາແຫ່ງຊາດ ເພື່ອເປົ້າໝາຍອັນສູງສົ່ງ ຮັບໃຊ້ຜົນປະໂຫຍດຂອງປະເທດຊາດ, ເພື່ອຄວາມຜາສຸກຂອງປະຊາຊົນ.”
ກໍໃນຕອນເຊົ້າວັນທີ 31 ມີນາ, ຄະນະປະຈຳສະພາແຫ່ງຊາດ ໄດ້ຍື່ນສະເໜີສະພາແຫ່ງຊາດໃຫ້ພົ້ນຕຳແໜ່ງຮອງປະທານສະພາແຫ່ງຊາດບາງທ່ານ ແລະ ຕອນບ່າຍຂອງວັນດຽວກັນ, ສະພາແຫ່ງຊາດ ຈະໃຫ້ພົ້ນຕຳແໜ່ງຮອງປະທານສະພາແຫ່ງຊາດບາງທ່ານ ດ້ວຍຮູບການປ່ອນບັດລັບ.