ທ່ານປະທານປະເທດຫງວຽນຊວັນຟຸກ ເຂົ້າຢ້ຽມຂ່ຳນັບ ທ່ານພົນເອກ Raul Castro Ruz  (ພາບ: TTXVN)

ວັນທີ 22 ກັນຍາ, ເມື່ອແລກປ່ຽນກັບສື່ມວນຊົນເນື່ອງໃນໂອກາດ ທ່ານປະທານປະເທດ ຫງວຽນຊວັນຟຸກ ແລະ ຄະນະຜູ້ແທນຂັ້ນສູງ ຫວຽດນາມ ສິ້ນສຸດການຢ້ຽມຢາມ ກູບາ ໃນລະຫວ່າງວັນທີ 18 – 21 ກັນຍາ ຢ່າງຈົບງາມ, ທ່ານເອກອັກຄະລັດຖະທູດ ກູບາ ປະຈຳ ຫວຽດນາມ Orlando Nicolás Hernández Guillén ໄດ້ຕີລາຄາສູງ ໝາກຜົນຂອງການຢ້ຽມຢາມ, ພ້ອມທັງເນັ້ນໜັກເຖິງຄວາມໝາຍຂອງການຢ້ຽມຢາມຄັ້ງທຳອິດຂອງປະມຸກລັດ ໄປຍັງ ກູບາ ນັບແຕ່ເວລາ ເກີດໂລກລະບາດໂຄວິດ - 19.

ໃນສະພາບການກູບາ ຍັງສືບຕໍ່ຖືກ ອາເມລິກາ ປິດລ້ອມ, ຂວ້ຳບາດດ້ານເສດຖະກິດ, ການຄ້າ ແລະ ການເງິນ, ທ່ານເອກອັກຄະລັດຖະທູດ Orlando Nicolás Hernández Guillén ໄດ້ຢັ້ງຢືນວ່າ ການຢ້ຽມຢາມສະແດງໃຫ້ເຫັນນ້ຳໃຈສາມັກຄີຖານອ້າຍນ້ອງ, ການພົວພັນມິດຕະພາບທີ່ສະໜິດຕິດພັນ, ມີຄວາມໄວ້ເນື້ອເຊື່ອໃຈ ແລະ ສະໜັບສະໜູນເຊິ່ງກັນ ແລະ ກັນ ລະຫວ່າງສອງປະເທດ.

ທ່ານເອກອັກຄະລັດຖະທູດ Orlando Nicolás Hernández ຢັ້ງຢືນວ່າ ກູບາ ຈະຮ່ວມມືກັບ ຫວຽດນາມ ໃນເລື່ອງສະໜອງ ແລະ ຖ່າຍທອດເຕັກໂນໂລຢີໃນການຜະລິດວັກຊິນກັນໂຄວິດ - 19, ສະຫງວນບຸລິມະສິດສູງທີ່ສຸດ ເພື່ອສະໜອງ ກໍ່ຄືຖ່າຍທອດເຕັກໂນໂລຢີຜະລິດວັກຊິນກັນໂຄວິດ - 19 ໃຫ້ແກ່ ຫວຽດນາມ.

ກ່ຽວກັບເນື້ອໃນ “ຮັກສາຄວາມຊົງຈຳປະຫວັດສາດ” ທີ່ໄດ້ເຕື້ອງເຖິງໃນຖະແຫຼງການຮ່ວມ ຫວຽດນາມ ກູບາ. ທ່ານເອກອັກຄະລັດຖະທູດ Orlando Nicolás Hernández Guillén ຖືວ່າ, ນ້ຳໃຈສາມັກຄີດ້ານການເມືອງ ແລະ ເສດຖະກິດ ໃນອະດີດຕະການ ໄດ້ ແລະ ພວມພັດທະນາ, ຍັງມີຄຸນຄ່າເໝືອນເດີມມາຮອດປັດຈຸບັນ, ນັບທັງໃນບັນດາຈຸດເວລາທີ່ປະສົບກັບຄວາມຫຍຸ້ງຍາກທີ່ສຸດ.