( ພາບ: kplnet.net )
( vovworld ) - ຕອນເຊົ້າວັນທີ 2/3, ຢູ່ນະຄອນຫຼວງວຽງຈັນ, ທ່ານນາຍົກລັດຖະມົນຕີລາວ ທອງສິງ ທຳມະວົງ ແລະ ທ່ານນາງຮອງປະທານສະພາແຫ່ງຊາດລາວ ປານີ ຢາທໍ່ຕູ້ ໄດ້ໃຫ້ການຕ້ອນຮັບຄະນະຜູ້ແທນກຳມາທິການການຕ່າງປະເທດສະພາແຫ່ງຊາດຫວຽດນາມ ໂດຍທ່ານ ເຈີ່ນວັນຮັ່ງ, ກຳມະການສູນກາງພັກ, ຫົວໜ້າກຳມາທິການການຕ່າງປະເທດສະພາແຫ່ງຊາດຫວຽດນາມ ທີ່ພວມຢ້ຽມຢາມ ແລະ ເຮັດວຽກຢູ່ລາວ ແຕ່ວັນທີ 29/2 ຫາວັນທີ 3/3/2012. ບັນດາການນຳຂອງລາວ ໄດ້ຕີລາຄາສູງໝາກຜົນຂອງການເຈລະຈາລະຫວ່າງກຳມາທິການການຕ່າງປະເທດຂອງສະພາແຫ່ງຊາດສອງປະເທດ ແລະ ຖືວ່າ ການຮ່ວມມືຢ່າງແໜ້ນແຟ້ນ ແລະ ມີປະສິດທິຜົນລະຫວ່າງກຳມະທິການທັງສອງໄດ້ປະກອບສ່ວນເພີ່ມພູນຄຸນສ້າງສາຍພົວພັນແບບພິເສດລາວ - ຫວຽດນາມ. ບັນດາຂະແໜງການ, ຂັ້ນຕ່າງໆ, ໝູ່ຄະນະ ແລະ ປະຊາຊົນລາວ ລ້ວນແຕ່ຈັດຕັ້ງ ແລະ ເຂົ້າຮ່ວມການເຄື່ອນໄຫວຕ່າງໆຢ່າງລະອຽດເພື່ອຕອບສະໜອງ “ ປີແຫ່ງຄວາມສາມັກຄີມິດຕະພາບລາວ - ຫວຽດນາມ 2012 ”, ສະເຫຼີມສະຫຼອງ 50 ປີແຫ່ງວັນສ້າງຕັ້ງສາຍພົວພັນທາງການທູດ ແລະ 35 ປີ ແຫ່ງວັນເຊັນສົນທິສັນຍາມິດຕະພາບ ແລະ ການຮ່ວມມືລະຫວ່າງສອງປະເທດ.