(vovworld) - ຕອນບ່າຍວັນທີ 30/10, ຢູ່ສຳນັກງານລັດຖະບານຫວຽດນາມ, ທ່ານນາຍົກລັດຖະມົນຕີຫວຽດນາມ Nguyen Tan Dung ໄດ້ໃຫ້ການຕ້ອນຮັບທ່ານອະດີດນາຍົກລັດຖະມົນຕີມາເລເຊຍ Tun Ahdullah Ahmad Badawi ທີ່ພວມຢ້ຽມຢາມ ແລະ ເຮັດວຽກຢູ່ຫວຽດນາມ. ນະທີ່ນີ້, ທ່ານນາຍົກລັດຖະມົນຕີ Nguyen Tan Dung ປາດຖະໜາວ່າ ດ້ວຍອິດທິພົນຊື່ສຽງຂອງຕົນ, ທ່ານອະດີດນາຍົກລັດຖະມົນຕີ Tun Ahdullah Ahmad Badawi ຈະຕັ້ງໜ້າປະກອບສ່ວນເຂົ້າໃນການຊຸກຍູ້ການພົວພັນຮ່ວມມືອັນດີງາມລະຫວ່າງສອງປະເທດ, ໂດຍສະເພາະແມ່ນການຮ່ວມມືດ້ານເສດຖະກິດ, ການຄ້າ, ການລົງທຶນ, ການສຶກສາ, ການທ່ອງທ່ຽວ, ການກໍ່ສ້າງ ກໍຄືການປະກອບສ່ວນເຂົ້າໃນການສ້າງປະຊາຄົມອາຊຽນ ພັດທະນາຢ່າງເຂັ້ມແຂງ; ປະກອບສ່ວນເຂົ້າໃນການປົກປັກຮັກສາສັນຕິພາບ, ສະຖຽນລະພາບ, ຄວາມເສລີໃນການເດີນທະເລຢູ່ເຂດທະເລຕາເວັນອອກ.
ທ່ານອະດີດນາຍົກລັດຖະມົນຕີ Tun Ahdullah Ahmad Badawi ຢືນຢັນວ່າ ຈະສືບຕໍ່ມານະພະຍາຍາມຈົນສຸດຄວາມສາມາດຂອງຕົນເຂົ້າໃນການເພີ່ມພູນຄຸນສ້າງໃຫ້ການພົວພັນຮ່ວມມືອັນດີງາມລະຫວ່າງຫວຽດນາມ ແລະ ມາເລເຊຍ. ທ່ານອະດີດນາຍົກລັດຖະມົນຕີມາເລເຊຍ ໃຫ້ຮູ້ວ່າ ໃນການຢ້ຽມຢາມ ແລະ ເຮັດວຽກຢູ່ຫວຽດນາມ ຄັ້ງນີ້, ທ່ານຈະພ້ອມກັບຄະນະພະນັກງານ, ວິສາຫະກິດທີ່ເຄື່ອນໄຫວໃນຂົງເຂດກໍ່ສ້າງຂອງມາເລເຊຍ ຢາກເພີ່ມທະວີການຮ່ວມມືກັບຫວຽດນາມ ໃນຂົງເຂດກໍ່ສ້າງ, ພິເສດແມ່ນການພັດທະນາເຮືອນຢູ່ສັງຄົມ. ກ່ຽວກັບບັນຫາດັ່ງກ່າວ, ທ່ານນາຍົກລັດຖະມົນຕີ Nguyen Tan Dung ໄດ້ເນັ້ນໜັກວ່າ, ຫວຽດນາມ ຖືເປັນສຳຄັນການພັດທະນາເຮືອນຢູ່ສັງຄົມຊຶ່ງມີຄວາມໝາຍຫຼາຍດ້ານ, ພິເສດໃນສະພາບທີ່ປະສົບກັບຄວາມຫຍຸ້ງຍາກ, ເຮືອນຢູ່ສັງຄົມຈະມີຄວາມໝາຍສຳຄັນທີ່ໃຫຍ່ຫຼວງສຳລັບປະຊາຊົນ. ດ້ວຍຈິດໃຈຄືດັ່ງກ່າວ, ຫວຽດນາມ ຊົມເຊີຍ, ຕ້ອນຮັບ ແລະ ສ້າງເງື່ອນໄຂສະດວກເພື່ອໃຫ້ບັນດານັກລົງທຶນຂອງມາເລເຊຍ ຍູ້ແຮງການຮ່ວມມື, ລົງທຶນເຂົ້າໃນຂົງເຂດກໍ່ສ້າງ ແລະ ພັດທະນາເຮືອນຢູ່ສັງຄົມທີ່ຫວຽດນາມ.