(vovworld) - ກອງປະຊຸມສຳມະນາສາກົນດ້ວຍຫົວຂໍ້ “ບົດຮຽນບັນດາປະເທດເວທີປາໄສຮ່ວມມືອາຊີ ຕາເວັນອອກ - ອາເມລິກາ ລາຕີງ (FEALAC) ກ່ຽວກັບການປ່ຽນແປງຮູບແບບເຕີບໂຕເພື່ອພັດທະນາແບບຍືນຍົງ” ຖືກຈັດຂຶ້ນໃນຕອນເຊົ້າວັນທີ 6/6, ຢູ່ ຮ່າໂນ້ຍ, ຕາມຂໍ້ລິເລີ່ມຂອງຫວຽດນາມ, ໃນຖານະເປັນປະທານຮ່ວມກຸ່ມປະຕິບັດງານເສດຖະກິດ - ສັງຄົມ ແລະ ທ່ອງທ່ຽວຂອງ FEALAC, ອາຍຸການ 2011 – 2013. ກ່າວຄຳເຫັນທີ່ກອງປະຊຸມສຳມະນາ, ທ່ານລັດຖະມົນຕີການຕ່າງປະເທດ ຫວຽດນາມ ຟ້າມນິນມິງ ຊີ້ແຈ້ງວ່າ: ຫວຽດນາມ ເອົາໃຈໃສ່ທ່ີສຸດເຖິງບັນຫາປ່ຽນແປງຮູບແບບການເຕີບໂຕ, ໃນນັ້ນໄດ້ກຳນົດ 3 ເນື້ອໃນສ້າງໂຄງປະກອບເສດຖະກິດຫຼັກແຫຼ່ງຄືນໃໝ່ ແມ່ນສ້າງໂຄງປະກອບການລົງທຶນແຫ່ງລັດຄືນໃໝ່, ສ້າງໂຄງປະກອບລັດວິສາຫະກິດຄືນໃໝ່, ສ້າງກົນໄກການເງິນ - ທະນາຄານຄືນໃໝ່. ທ່ານລັດຖະມົນຕີ ຟ້າມບິນມິນ ກໍ່ຖືວ່າ: ໃນສະພາບເສດຖະກິດໂລກພວມມີການປ່ຽນແປງຢ່າງແຂງແຮງ ພາຍຫລັງວິກິດການແມ່ນໂອກາດເພື່ອໃຫ້ບັນດາປະເທດ ອາຊີຕາເວັນອອກ ແລະ ອາເມລິກາ ລາຕີງ ເຂົ້າຮ່ວມຢ່າງມີປະສິດທິຜົນ ແລະ ຈັດແບ່ງແຮງງານທົ່ວໂລກ. ທ່ານກ່າວວ່າ:
“ໃນໄລຍະຜ່ານມາ, ບາງປະເທດສະມາຊິກ FEALAC ໄດ້ເອົາໃຈໃສ່ປະຕິບັດບັນດາມາດຕະການປະຕິຮູບ, ປັບປຸງນະໂຍບາຍພັດທະນາເພື່ອແນໃສ່ມຸ້ງໄປເຖິງການພັດທະນາແບບຍືນຍົງ ແລະ ເຊື່ອມໂຍງເຂົ້າກັບສາກົນຢ່າງມີປະສິດທິຜົນ. ມາຮອດປະຈຸບັນ, ໝາກຜົນທີ່ບັນລຸໄດ້ແມ່ນຕັ້ງໜ້າພໍສົມຄວນ. ດ້ວຍບັນດາຈຸດທີ່ຄ້າຍຄືກັນກ່ຽວກັບດ້ານເສດຖະກິດ - ສັງຄົມ, ອາດຈະຢືນຢັນຄວາມສາມາດບົ່ມຊ້ອນຮ່ວມມືລະຫວ່າງບັນດາປະເທດ FEALAC ແມ່ນໃຫຍ່ຫຼວງທີ່ສຸດ”
ໂດຍແມ່ນໜຶ່ງໃນບັນດາປະເທດສ້າງຕັ້ງ FEALAC, ໃນຕະຫລອດ 14 ປີຜ່ານມາ, ຫວຽດນາມ ໄດ້ເຂົ້າຮ່ວມການເຄື່ອນໄຫວ, ລາຍການ, ໂຄງການຮ່ວມມືຕ່າງໆຢ່າງຄົບຖ້ວນ, ຕັ້ງໜ້າປະກອບຄຳເຫັນກໍ່ສ້າງ, ປະກອບສ່ວນສ້າງຕັ້ງ, ສ້າງສຳເລັດກົນໄກ, ຈັດຕັ້ງ ແລະ ເຄື່ອນໄຫວຂອງເວທີປາໄສ ແລະ ບັນດາກຸ່ມປະຕິບັດງານ.
ໝາກຜົນຂອງການປຶກສາຫາລີທີ່ກອງປະຊຸມສຳມະນາໄດ້ຖືກບັນດາຜູ້ແທນທີ່ມາຈາກ 36 ປະເທດສະມາຊິກຮັບຮອງເອົາ ແລະ ຈະຖືກສ່ອງແສງຢູ່ກອງປະຊຸມລັດຖະມົນຕີການຕ່າງປະເທດບັນດາປະເທດ FEALAC ຄັ້ງທີ 6 ຊຶ່ງຈະດຳເນີນໃນອາທິດຈະມາເຖິງ, ຢູ່ ບາລີ, ອິນໂດເນເຊຍ.