(vovworld) - ຕອນບ່າຍວັນທີ 03/05, ຢູ່ດ່ານັ້ງ, ທ່ານລັດຖະມົນຕີຊ່ວຍວ່າການກະຊວງປ້ອງກັນປະເທດຫວຽດນາມ, ພົນໂທ ຫງວຽນຈິ໋ວິ້ງ ແລະ ທ່ານເອກອັກຄະລັດຖະທູດອາເມລິກາ ປະຈຳຫວຽດນາມ Ted Osius ປະກາດໝາກຜົນການກຳຈັດດິນມົນລະພິດດີໂອຊິນຢູ່ສະໜາມບິນດ່ານັ້ງ ສຳເລັດຜົນ, ຕໍໜ້າການເປັນສັກຂີພິຍານຂອງທ່ານຮອງນາຍົກລັດຖະມົນຕີ ວູດຶກດາມ. ທີ່ພິທີປະກາດປະຕິບັດສຳເລັດໄລຍະທີ່ໜຶ່ງຂອງໂຄງການ. ທ່ານ ພົນໂທ ຫງວຽນຈິ໋ວິ້ງ ໃຫ້ຮູ້ວ່າ.
“ບັນຫາສຳຄັນທີ່ສຸດຂອງໂຄງການໃຫຍ່ຄືແນວນີ້ແມ່ນງົບປະມານ ກໍ່ໄດ້ແກ້ໄຂໂດຍພື້ນຖານແລ້ວ. ທີ່ 2 ແມ່ນບັນຫາເຕັກໂນໂລຊີ, ທຳອິດພວກເຮົາປະສົບກັບຄວາມຫຍຸ້ງຍາກກ່ຽວກັບເຕັກໂນໂລຊີບາງຢ່າງ, ແຕ່ຜ່ານໄລຍະ ທີ 1 ນີ້, ພວກເຮົາໄດ້ມີປະສົບການທີ່ດີກ່ຽວກັບເຕັກໂນໂລຊີກຳຈັດມົນລະພິດດີິໂອຊິນແລ້ວ. ພວກເຮົາເຊື່ອໝັ້ນວ່າ, ໂຄງການຈະໄດ້ຮັບການປະຕິບັດຢ່າງດີງາມ”.
ກ່າວຄຳເຫັນທີ່ພິທີ, ທ່ານຮອງນາຍົກລັດຖະມົນຕີ ວູດຶກດາມ ຖືວ່າ, ການສົມທົບກັນແກ້ໄຂຜົນຮ້າຍຢ້ອນຫຼັງຈາກສົງຄາມ, ພິເສດແມ່ນທາດພິດເຄມີ ໄດ້ກາຍເປັນເນື້ອໃນສຳຄັນຍິ່ງໃນການພົວພັນລະຫວ່າງຫວຽດນາມ ແລະ ອາເມລິກາ. ທ່ານຮອງນາຍົກລັດຖະມົນຕີ ໄດ້ຕີລາຄາສູງຜົນສຳເລັດເບື້ອງຕົ້ນຂອງໂຄງການ ແລະ ສະເໜີໃຫ້ຝ່າຍອາເມລິກາ ຊຸກຍູ້ບັນດາໂຄງການແກ້ໄຂຜົນຮ້າຍຢ້ອນຫຼັງຈາກສົງຄາມຢ່າງແຮງກວ່າອີກ, ສືບຕໍ່ກຳຈັດດິນມົນລະພິດດີໂອຊິນຢູ່ສະໜາມບິນບຽນຮ່ວາ (ດົ່ງນາຍ) ແລະ ສະໜາມບິນຟຸ່ກ໋າດ (ບິ່ງດິ້ງ).