vovworld)- ປະຊາຄົມອາຊຽນໄດ້ຮັບການສ້າງຕັ້ງຢ່າງເປັນທາງການໂດຍອີງໃສ່ 3 ເສົາຄ້ຳ ນັ້ນແມ່ນ ການເມືອງ - ຄວາມໝັ້ນຄົງ, ເສດຖະກິດ ວັດທະນະທຳ ສັງຄົມ, ປະຊາຄົມ ອາຊຽນ ຈະນຳມາເຊິ່ງຜົນປະໂຫຍດໃຫ້ພົນລະເມືອງກວ່າ 600 ລ້ານຄົນ ຢູ່ 10 ປະເທດສະມາຊິກໃນກຸ່ມ ອາຊຽນ. ເຖິງຢ່າງໃດກໍຕາມ, ຄຽງຄູ່ບັນດາກາລະໂອກາດໃຫຍ່, ບັນດາປະເທດຍັງ ຕ້ອງຜ່ານຜ່າສິ່ງທ້າທາຍຫລາຍຢ່າງ ເພື່ອຢັ້ງຢືນບົດບາດຂອງປະເທດຕົນ ແລະນຳປະຊາຄົມພັດທະນາແບບຍືນຍົງໃນອະນາຄົດ. ກ່ຽວກັບບັນຫານີ້ ທ່ານ Sofian Akmal Abd Karim, ຫົວຫນ້າສະຖານກົງສູນໃຫຍ່ ມາເລເຊຍ ປະຈຳ ນະຄອນ ໂຮ່ຈິມີນ ຖືວ່າ:
“ເລື່ອງສ້າງຕັ້ງປະຊາຄົມເສດຖະກິດ ອາຊຽນ ແລະ ປະຊາຄົມ ອາຊຽນ ແມ່ນເຫດການສຳຄັນ ມີລັກສະນະປະຫວັດສາດສຳລັບພາກພື້ນ ແລະ ແມ່ນຄວາມເອກອ້າງທະນົງໃຈຂອງພົນລະເມືອງບັນດາປະເທດອາຊຽນ. ຂ້າພະເຈົ້າຄິດວ່າ ບັນດາປະເທດສະມາຊິກ ອາຊຽນ ລ້ວນແຕ່ມີຄວາມຮັບຮູ້ບົດບາດຂອງປະຊາຄົມ ເສດຖະກິດ ອາຊຽນ ຢ່າງຈະແຈ້ງ ແລະ ແນ່ນອນວ່າ ຈະເຮັດຈົນສຸດຄວາມສາມາດຂອງຕົນເພື່ອຍາດແຍ່ງບັນດາກາລະໂອກາດຈາກປະຊາຄົມອາຊຽນ. ແຕ່ເຖິງຢ່າງໃດກໍຕາມ ຍັງມີສິ່ງທ້າທາຍ ແຕ່ນີ້ກໍແມ່ນໂອກາດເພື່ອໃຫ້ແຕ່ລະປະເທດສະມາຊິກມີບັນດາຈຸດໝາຍພັດທະນາສະເພາະໃຫ້ຕົນ.”
ໃນຂະນະນັ້ນ, ທ່ານ Sim Sokhom, ຫົວຫນ້າສະຖານກົງສູນໃຫຍ່ ກຳປູເຈຍ ຢູ່ ນະຄອນ ໂຮ່ຈິມີນ ໃຫ້ຮູ້ວ່າ:
“ພວກຂ້າພະເຈົ້າກຳນົດວ່າ ນີ້ແມ່ນຜົນປະໂຫຍດຂອງປະຊາຊົນບັນດາປະເທດ ອາຊຽນ. ນັບແຕ່ມື້ນີ້ເປັນຕົ້ນໄປ, ສອງປະເທດຫວຽດນາມ ແລະ ກຳປູເຈຍ ເວົ້າສະເພາະ ແລະ ບັນດາປະເທດ ອາຊຽນ ເວົ້າລວມ ຈະເພີ່ມທະວີການພັດທະນາກ່ຽວກັບເສດຖະກິດ ກໍຄືບັນດາການເຄື່ອນໄຫວອື່ນ ເພື່ອຮັບໃຊ້ຜົນປະໂຫຍດໃຫ້ທຸກປະເທດໃນກຸ່ມ ອາຊຽນ.”