ການເຈລະຈາລະຫວ່າງ 2 ຝ່າຍ
(ພາບ: Nhan Sáng-TTXVN)
|
(vovworld) – ຕອນເຊົ້າວັນທີ 18/3, ທ່ານປະທານສະພາແຫ່ງຊາດ Claude Bartolone ແລະ ຄະນະຜູ້ແທນຂັ້ນສູງສະພາແຫ່ງຊາດ ສາທາລະນະລັດ ຝຣັ່ງ ເລີ່ມຕົ້ນການຢ້ຽມຢາມ ຫວຽດນາມ ຢ່າງເປັນທາງການ, ຕາມຄຳເຊີນຂອງທ່ານປະທານສະພາແຫ່ງຊາດ ຫງວຽນຊິງຮູ່ງ. ພາຍຫຼັງພິທີຕ້ອນຮັບ, ການນຳ 2 ທ່ານໄດ້ດຳເນີນການເຈລະຈາ ແລະ ເຫັນດີເປັນເອກະພາບເນື້ອໃນສຳຄັນຫຼາຍຢ່າງເພື່ອແນໃສ່ຊຸກຍູ້ການພົວພັນຮ່ວມມືໃນຂົງເຂດລັດຖະສະພາ ແລະ ຄູ່ຮ່ວມມືຍຸດທະສາດລະຫວ່າງ 2 ປະເທດ.
ທ່ານປະທານສະພາແຫ່ງຊາດ Claude Bartolone ໄດ້ຊົມເຊີຍຜົນສຳເລັດຢ່າງດີງາມຂອງກອງປະຊຸມໃຫຍ່ຄັ້ງທີ 12 ຂອງພັກກອມມູນິດ ຫວຽດນາມ, ຫວັງວ່າການນຳພັກ, ສະພາແຫ່ງຊາດ, ລັດຖະບານຊຸດໃໝ່ຂອງ ຫວຽດນາມ ຈະສືບຕໍ່ຊຸກຍູ້ການພົວພັນ 2 ປະເທດໃນທຸກຂົງເຂດຄື: ການເມືອງ, ການທູດ ກໍຄືເສດຖະກິດ, ວັດທະນະທຳ, ສັງຄົມ. ທ່ານປະທານສະພາແຫ່ງຊາດ ຫງວຽນຊິງຮູ່ງ ໃຫ້ຮູ້ວ່າ: ສະພາແຫ່ງຊາດພວມຄ່ອຍໆສ້າງລະບົບກົດໝາຍໃຫ້ສົມບູນແບບ ແລະ ສອດຄ່ອງກັບລັດຖະທຳມະນູນປີ 2013, ໃນນັ້ນມີກົດໝາຍຫຼາຍສະບັບກ່ຽວຂ້ອງເຖິງເສດຖະກິດ, ການຄ້າ ແລະ ການລົງທຶນ. ທ່ານປະທານປະເທດ ສະເໜີວ່າ: ໃນໄລຍະຈະມາເຖິງ, 2 ຝ່າຍຄວນເພີ່ມທະວີການຮ່ວມມືດ້ານເສດຖະກິດ, ພິເສດແມ່ນໃນຂົງເຂດຄົມມະນາຄົມ, ກະສິກຳ, ການຢາ… ກ່ຽວກັບບັນຫາທະເລຕາເວັນອອກ, ທ່ານປະທານສະພາແຫ່ງຊາດ ຫງວຽນຊິງຮູ່ງ ຫວັງວ່າ: ສະພາແຫ່ງຊາດ ຝຣັ່ງ ຕັ້ງໜ້າສະໜັບສະໜູນ ຫວຽດນາມ ໃນການຮັບປະກັນຄວາມໝັ້ນຄົງໃນການເດີນທະເລ ແລະ ຕໍ່ສູ້ເພື່ອຄັດຄ້ານການເຄື່ອນໄຫວນຳໃຊ້ກຳລັງການທະຫານຢູ່ທະເລຕາເວັນອອກ, ພ້ອມກັນແລກປ່ຽນ, ປຶກສາຫາລື ແລະ ເຄົາລົບກົດໝາຍສາກົນໃນການແກ້ໄຂບັນດາຄວາມບໍ່ລົງລອຍກັນບົນທະເລ.
ສ່ວນທ່ານປະທານສະພາແຫ່ງຊາດ Claude Bartolone ຢັ້ງຢືນການເຄົາລົບກົດໝາຍສາກົນແມ່ນຈຳເປັນທີ່ສຸດເພື່ອຫຼີກລ້ຽງບັນດາຜົນເສຍຫາຍສຳລັບການແລກປ່ຽນຄ້າຂາຍຢູ່ທະເລຕາເວັນອອກ. ທ່ານປະທານສະພາແຫ່ງຊາດ ຝຣັ່ງ ເນັ້ນໜັກວ່າ: ການເຄົາລົບກົດໝາຍສາກົນກໍ່ເປັນວິທີເພື່ອຫຼີກລ້ຽງຄວາມເຄັ່ງຕຶງ. ທ່ານ Claude Bartolone ໃຫ້ຮູ້ວ່າ: ພະລັງງານ, ນຳ້, ການແກ້ໄຂມົນລະພິດສິ່ງແວດລ້ອມ ແມ່ນບັນດາຂົງເຂດເຊິ່ງ ຝຣັ່ງ ມີທ່າແຮງ ແລະ ພ້ອມແລ້ວໃຫ້ການທີ່ຮ່ວມມືກັບ ຫວຽດນາມ. ຝຣັ່ງ ຈະຊຸກຍູ້ການຮ່ວມມືບຳລຸງສ້າງແຫຼ່ງຊັບພະຍາກອນມະນຸດກັບ ຫວຽດນາມ, ກຽມພ້ອມບຳລຸງສ້າງ ແລະ ຖ່າຍທອດເຕັກໂນໂລຢີກ່ຽວກັບສາທາລະນະສຸກ, ບຳລຸງສ້າງດ້ານພາສາ ຝຣັ່ງ, ສ້າງເງື່ອນໄຂສະດວກໃຫ້ແກ່ນັກສຶກສາ ຫວຽດນາມ ໄປຮຳ່ຮຽນ ແລະ ຄົ້ນຄ້ວາ.