(vovworld) - ໂດຍສືບຕໍ່ການຢ້ຽມຢາມ ສ ໂປໂລຍຢ່າງເປັນທາງການ, ຕອນຄຳ່ວັນທີ 15/3 (ຕາມເວລາ ຫວຽດນາມ), ທ່ານປະທານສະພາແຫ່ງຊາດ ຫວຽດນາມ ຫງວຽນຊິງຮູ່ງ ມີການພົບປະກັບທ່ານປະທານາທິບໍດີ ສ ໂປໂລຍ Bronislaw Komorowski, ເຈລະຈາກັບປະທານສະພາສູງ ໂປໂລຍ Bogdan Borusewicz ແລະ ຢ້ຽມຢາມ ສະຖານທູດ ຫວຽດນາມ ປະຈຳ ໂປໂລຍ.
ທີ່ການພົບປະກັບທ່ານປະທານາທິບໍດີ ສ ໂປໂລຍ Bronislaw Komorowski, ທ່ານປະທານສະພາແຫ່ງຊາດ ຫງວຽນຊິງຮູ່ງ ຢັ້ງຢືນວ່າ ຫວຽດນາມ ຖືເປັນສຳຄັນ ແລະ ປາດຖະໜາຢາກເຮັດໃຫ້ການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຫຼາຍດ້ານກັບ ໂປໂລຍ ເລິກເຊິ່ງກ່ວາອີກ, ຖືວ່ານີ້ແມ່ນໜຶ່ງ ໃນບັນດາບຸລິມະສິດຕົ້ນຕໍ່ໃນນະໂຍບາຍການຕ່າງປະເທດຂອງ ຫວຽດນາມ ຢູ່ເຂດເອີລົບກາງ, ເອີລົບຕາເວັນອອກ. ທ່ານປະທານສະພາແຫ່ງຊາດ ຫວັງວ່າ: 2 ປະເທດຊຸກຍູ້ການຮ່ວມມືຢ່າງມີປະສິດທິຜົນ, ຮອບດ້ານກ່ວາອີກ ໃນທຸກໆຂົງເຂດການເມືອງ, ເສດຖະກິດ, ປ້ອງກັນຊາດປ້ອງກັນຄວາມສະຫງົບ, ວັດທະນະທຳ, ການສຶກສາບຳລຸງສ້າງ, ເປັນປະຖົມປັດໄຈເພື່ອຍົກລະດັບການພົວພັນ 2 ຝ່າຍໂດຍໄວ. ທ່ານປະທານາທິບໍດີ ສ ໂປໂລຍ Bronislaw Komorowski ຖືວ່າ: ການຢ້ຽມຢາມຄັ້ງນີແມ່ນຂີດໝາຍສຳຄັນເພື່ອສືບຕໍ່ປັບປຸງ ແລະ ເປີດກາລະໂອກາດໃໝ່ໃນການພົວພັນຮ່ວມມືລະຫວ່າງ 2 ປະເທດ.
ທີ່ການເຈລະຈາກັບທ່ານປະທານສະພາສູງ ໂປໂລຍ Bogdan Borusewicz, ທ່ານປະທານສະພາແຫ່ງຊາດ ຫງວຽນຊິງຮູ່ງ ສະເໜີໃຫ້ 2 ຝ່າຍສືບຕໍ່ເພີ່ມທະວີການແລກປ່ຽນຄະນະຜູ້ແທນທຸກຂັ້ນ, ເສີມຂະຫຍາຍບົດບາດຂອງກຸ່ມສະມາຊິກມິດຕະພາບ ຫວຽດນາມ - ໂປໂລຍ ແລະ ໂປໂລຍ - ຫວຽດນາມ, ແບ່ງປັນບົດຮຽນໃນການສ້າງກົດໝາຍ, ພິເສດແມ່ນຂອງ ໂປໂລຍ ໃຫ້ແກ່ ຫວຽດນາມ ກ່ຽວກັບການຫັນປ່ຽນເສດຖະກິດ ແລະ ເຊື່ອມໂຍງເຂົ້າກັບສາກົນ. ທ່ານປະທານສະພາສູງ ໂປໂລຍ Bogdan Borusewicz ສະໜັບສະໜູນ ຫວຽດນາມ ເປີດກ້ວາງ, ພັດທະນາການພົວພັນກັບສະຫະພາບ ເອີລົບ, ພ້ອມທັງເຫັນດີຕໍ່ເລື່ອງເພີ່ມທະວີການຮ່ວມມືກັບສະພາແຫ່ງຊາດ ຫວຽດນາມ ເພື່ອຊຸກຍູ້, ຍົກລະດັບ ແລະ ເຮັດໃຫ້ການພົວພັນຮ່ວມມືລະຫວ່າງ 2 ປະເທດເລິກເຊິ່ງກ່ວາອີກ.
ກ່ອນທີ່ອອກເດີນທາງກັບເມືອປະເທດ, ສິ້ນສຸດການຢ້ຽມຢາມ ໂປໂລຍ ຢ່າງເປັນທາງການ, ທ່ານປະທານສະພາແຫ່ງຊາດ ຫງວຽນຊິງຮູ່ງ ໄດ້ໄປຢ້ຽມຢາມ ແລະ ໂອ້ລົມກັບພະນັກງານ, ພາລະກອນ ສະຖານທູດ ແລະ ວົງຄະນະຍາດຊາວ ຫວຽດນາມ ຢູ່ ໂປໂລຍ.