(vovworld) - ກ່າວຄຳເຫັນທີ່ວາລະໄຂການໂຕວາທີຄົບຄະນະຂອງກອງປະຊຸມສະມັດຊາໃຫຍ່ສະຫະປະຊາຊາດຄັ້ງທີ 68, ເຊິ່ງເລີ່ມດຳເນີນໃນຕອນຄໍ່າວັນທີ 24 ກັນຍາ (ຕາມເວລາຫວຽດນາມ), ທ່ານເລຂາທິການໃຫຍ່ສະຫະປະຊາຊາດ ບານກີມູນ ຖືວ່າໂຄງການດຳເນີນງານການພັດທະນາໃໝ່ “ຕ້ອງມີລັກສະນະທົ່ວໂລກ ດ້ວຍການໃຫ້ບຸລິມະສິດອັນດັບໜຶ່ງແມ່ນຢຸດຕິຄວາມທຸກຍາກ, ອຶດຫິວ”. ທ່ານເລຂາທິການໃຫຍ່ ບານກີມູນ ໄດ້ກະຕຸກຊຸກຍູ້ບັນດາການນຳໂລກ ມານະພະຍາຍາມສະກັດກັ້ນສະພາບສົງຄາມຢູ່ຊີຣີ ທີ່ພວມປິນຂັ້ນໄດ ດ້ວຍເລື່ອງຢຸດທິການສະໜອງອາວຸດໃຫ້ບັນດາຝ່າຍທີ່ກ່ຽວຂ້ອງ ແລະ ມຸ່ງໄປເຖິງການເຈລະຈາສັນຕິພາບເພື່ອຢຸດຕິ “ສິ່ງທ້າທາຍໃຫຍ່ກວ່າໝູ່ສຳລັບສັນຕິພາບ ແລະ ຄວາມສະຫງົບໃນໂລກ”. ທ່ານຮຽກຮ້ອງໃຫ້ສະພາຄວາມໝັ້ນຄົງສະຫະປະຊາຊາດ ອະນຸມັດຜ່ານມະຕິໜຶ່ງ ທີ່ສາມາດເປັນໄປໄດ້ເຊິ່ງກ່ຽວຂ້ອງເຖິງຂໍ້ຕົກລົງຂອງອາເມລິກາ - ລັດເຊຍ ເພື່ອແນໃສ່ອະນຸຍາດໃຫ້ປະຊາຄົມໂລກຄວບຄຸມອາວຸດເຄມີຂອງຊີຣີ.
ໃນຂະນະນັ້ນ, ກ່າວຄຳເຫັນຕໍ່ໜ້າກອງປະຊຸມສະມັດຊາໃຫຍ່ສະຫະປະຊາຊາດ, ທ່ານປະທານາທິບໍດີອາເມລິກາ Barack Obama ໃຫ້ຮູ້ວ່າ ບັນດາການເຄື່ອນໄຫວດ້ານການທູດໃນໄລຍະມໍ່ໆມານີ້ຂອງທ່ານປະທານນາທິບໍດີອີຣານ Hassan Rouhani ແມ່ນໜ້າຊົມເຊີຍ ເພື່ອແນໃສ່ແກ້ໄຂໂຄງການນິວເຄຼຍ ທີ່ກໍ່ການໂຕ້ຖຽນກັນຂອງປະເທດນີ້.
ກ່ຽວກັບບັນຫາຊີຣີ, ທ່ານປະທານາທິບໍດີ Obama ໄດ້ກ່າວເຕື່ອນລັດຖະບານຂອງທ່ານປະທານາທິບໍດີຊີຣີ Bashar al Assad “ຈະຕ້ອງຮັບບັນດາຜົນຮ້າຍຖ້າຫາກບໍ່ປະລະອາວຸດເຄມີ”. ທ່ານ Obama ກໍ່ໃຫ້ຄຳໝັ້ນສັນຍາ ສືບຕໍ່ມະນາພະຍາຍາມແກ້ໄຂການປະທະກັນລະຫວ່າງອິດສະຣາແອນ ແລະ ຊາວ ປາແລດສຕິນ.