(vovworld) – ຕອນທ່ຽງວັນທີ 5/3, ທ່ານ Vladimir Churov, ປະທານຄະນະກຳມະການເລືອກຕັ້ງສູນກາງລັດເຊຍ (ຫຼື SIK) ໄດ້ປະກາດວ່າ: ທ່ານນາຍົກລັດຖະມົນຕີ Vladimir Putin, ຜູ້ອອກສະໝັກຮັບເລືອກຕັ້ງປະທານາທິບໍດີໄດ້ຮັບໄຊຊະນະໃນຮອບທຳອິດຂອງການປ່ອນບັດເລືອກຕັ້ງປະທານາທິບໍດີ ສະຫະພັນ ລັດເຊຍ ເຊິ່ງດຳເນີນໄປໃນວັນທີ 4/3. ກ່າວຄຳເຫັນໃນການປະຊຸມຂ່າວຢູ່ນະຄອນຫຼວງ ມົດສະກູ, ທ່ານ Churov ໃຫ້ຮູ້ວ່າ: ຕາມໝາກຜົນຂອງການກວດກ່ວາ 99,3% ຈຳນວນບັດເລືອກຕັ້ງແລ້ວ, ທ່ານ Putin ຍາດໄດ້ໄຊຊະນະດ້ວຍ 63,75% ຈຳນວນບັດສະໜັບສະໜູນ, ຍື່ນອັນດັບ 2 ແມ່ນທ່ານ Ghennady Zyuganov, ປະທານຄະນະກຳມະການສູນກາງພັກກອມມູນິດ ສະຫະພັນ ລັດເຊຍ (ຫຼື KPRF) ດ້ວຍ 17,19% ຈຳນວນບັດສະໜັບສະໜູນ. ຕາມການຕີລາຄາຂອງນັກສັງເກດການສາກົນເປັນຈຳນວນຫຼວງຫຼາຍແລ້ວ, ກ່ອນອື່ນໝົດແມ່ນຈາກ ວົງຄະນະຍາດບັນດາປະເທດເອກະລາດ (ຫຼື SNG), ແລະ ບັນດານັກສັງເກດການພາຍໃນປະເທດ ແລ້ວ, ການເລືອກຕັ້ງປະທານາທິບໍດີ ຢູ່ລັດເຊຍ ເມື່ອວັນທີ 4/3 ໄດ້ດຳເນີນໄປຢ່າງໂປ່ງໃສ, ປະຊາທິປະໄຕ ແລະ ເສລີ. ກ່າວຄຳເຫັນພາຍຫຼັງຮູ້ໝາກຜົນຂອງການກວດບັດໃນເບື້ອງຕົ້ນ, ທ່ານ Putin ໃຫ້ຄຳໝັ້ນສັນຍາຈະສືບຕໍເຮັດວຽກເພື່ອຜົນປະໂຫຍດຂອງປະເທດຊາດ, ພ້ອມກັນນັ້ນຢືນຢັນ ໂຄງການອອກສະໝັກຮັບເລືອກຕັ້ງຂອງທ່ານທີ່ກ່ຽວຂ້ອງເຖິງ 4 ຂົງເຂດຕົ້ນຕໍ່ເຊິ່ງລວມມີ: ການປະຕິຮູບລະບົບການເມືອງ ແລະ ເສີມຂະຫຍາຍປະຊາທິປະໄຕ, ຊຸກຍູ້ການພັດທະນາເສດຖະກິດ - ສັງຄົມ, ເພີ່ມທະວີການປ້ອງກັນຊາດ ແລະ ປັບປຸງການປ້ອງກັນຄວາມສະຫງົບ, ປະຕິບັດນະໂຍບາຍພົວພັນກັບຕ່າງປະເທດເປັນເອກະລາດ, ແມ່ນຈະໄດ້ນຳເຂົ້າຊີວິດການເປັນຢູ່ຢ່າງສະເໝີຕົ້ນສະເໝີປາຍໃນເວລາ 6 ປີ ທີ່ທ່ານດຳລົງຕຳແໜ່ງປະທານາທິບໍດີ ສະຫະພັນ ລັດເຊຍ ຈະມາເຖິງ.
ໂດຍໄດ້ຮັບຂ່າວວ່າ, ທ່ານ Putin ໄດ້ຮັບໄຊຊະນະໃນການເລືອກຕັ້ງປະທານາທິບໍດີສະຫະພັນລັດເຊຍ. ວັນທີ 5/3, ທານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ໋ຈ້ອງ, ທ່ານປະທານປະເທດ ເຈືອງເຕີ໋ນຊາງ, ແລະ ທ່ານນາຍົກລົດຖະມົນຕີ ຫງວຽນເຕີ໋ນຢຸງ ໄດ້ສົ່ງສານອວຍພອນເຖິງທ່ານ Putin, ປະທານພັກ (ລັດເຊຍເອກະພາບ), ນາຍົກລັດຖະມົນຕີລັດເຊຍ, ເນື່ອງໃນໂອກາດທີ່ທ່ານໄດ້ຮັບເລືອກຕັ້ງເປັນປະທານາທິບໍດີລັດເຊຍ. ໃນສານອວຍພອນ, ບັນດາຜູ້ນຳພັກ, ລັດ, ລັດຖະບານຫວຽດນາມໄດ້ຢືນຢັນຈະສືບຕໍ່ເພີ່ມທະວີການຮ່ວມມືກັບທ່ານ Putin ໃນຖານະເປັນປະທານາທິບໍດີສະຫະພັນລັດເຊຍ ເພື່ອຊຸກຍູ້ສາຍພົວພັນມິດຕະພາບທີ່ເປັນມູນເຊື້ອ ແລະການຮ່ວມມືຍຸດທະສາດລະຫວ່າງຫວຽດນາມ ແລະ ສະຫະພັນລັດເຊຍໃຫ້ນັບມື້ນັບໄດ້ຮັບການປັບປຸງ ແລະ ພັດທະນາ.