(vovworld)- ປີ 2015, ຫວຽດນາມ ວາງຄາດໝາຍສົ່ງຄົນງານ 100.000 ຄົນໄປເຮັດວຽກຢູ່ຕ່າງປະເທດ. ເພື່ອບັນລຸໄດ້ຄາດໝາຍດັ່ງກ່າວ, ກະຊວງແຮງງານ, ທະຫານເສຍອົງຄະ ແລະ ສັງຄົມ ຫວຽດນາມໃຫ້ຮູ້ວ່າ: ວຽກງານສົ່ງຄົນງານໄປເຮັດວຽກຢູ່ຕ່າງປະເທດ ບໍ່ພຽງແຕ່ສຸມໃສ່ເຂົ້າບັນດາຕະຫລາດເກົ່າຄື: ໄຕ້ຫວັນ, ຈີນ, ຍີ່ປຸ່ນ, ສເກົາຫລີ, ມາເລເຊຍ ຫລື ຕາເວັນອອກກາງ ເທົ່ານັ້ນ, ຫາກຈະເອົາໃຈໃສ່ເຖິງບັນດາຕະຫລາດແຮງງານຕ້ອງການຄຸນນະພາບສູງຄື: ເຢຍລະມັນ ແລະ ເອີລົບ. ທ່ານ ຕົງຫາຍນາມ, ຮອງຫົວຫນ້າກົມຄຸ້ມຄອງຄົນງານໄປເຮັດວຽກຢູ່ຕ່າງປະເທດ, ສັງກັດກະຊວງແຮງງານ ທະຫານເສຍອົງຄະ ແລະ ສັງຄົມ ຫວຽດນາມໃຫ້ຮູ້ວ່າ:
“ປີນີ້, ກົມຄຸ້ມຄອງຄົນງານໄປເຮັດວຽກຢູ່ຕ່າງປະເທດ ສືບຕໍ່ຜັນຂະຫຍາຍສົ່ງຄົນງານໄປເຮັດວຽກຢູ່ ເຢຍລະມັນ ແລະ ຍີ່ປຸ່ນ. ພວກຂ້າພະເຈົ້າຜັນຂະຫຍາຍໂຄງການຫນູນຊ່ວຍການສົ່ງຄົນງານໄປເຮັດວຽກຢູ່ຕ່າງປະເທດ ຂຶ້ນກັບໂຄງການຈຸດໝາຍແຫ່ງຊາດກ່ຽວກັບວຽກເຮັດງານທຳ, ໃນນັ້ນ ຫນູນຊ່ວຍວິສາຫະກິດບຳລຸງສ້າງແຮງງານເຕັກນິກສູງໄປເຮັດວຽກຢູ່ຕ່າງປະເທດ.”
ແລະໃນປີ 2015, ດ້ວຍການສ້າງປະຊາຄົມເສດຖະກິດ ອາຊຽນ ສຳເລັດ ຈະມີ 8 ຂະແຫນງອາຊີບໃນບັນດາປະເທດ ອາຊຽນ ມີຄວາມເສລີໃນການຍົກຍ້າຍ ຜ່ານບັນດາຂໍ້ຕົກລົງຮັບຮອງສີມື. ນອກນັ້ນ, ຊັບພະຍາກອນມະນຸດໄດ້ຮັບການບຳລຸງສ້າງວິຊາສະເພາະ ຫລື ລະດັບຄວາມຮູ້ຊັ້ນມະຫາວິທະຍາໄລຂຶ້ນໄປ, ຮູ້ພາສາຕ່າງປະເທດ, ພິເສດ ແມ່ນພາສາອັງກິດ ກໍມີຄວາມເສລີກວ່າໃນການຍົກຍ້າຍ. ນີ້ແມ່ນກາລະໂອກາດໃຫ້ຄົນງານມີລະດັບຄວາມຮູ້ສູງ ຫວຽດນາມ ມີໂອກາດໄດ້ໄປເຮັດວຽກຢູ່ບັນດາປະເທດໃນປະຊາຄົມເສດຖະກິດ ອາຊຽນ ໃນປີ 2015.