ຜູ້ຕາງໜ້າຊາວຫວຽດນາມອາໄສຢູ່ຕ່າງປະເທດທີ່ດີເດັນເຂົ້າຮ່ວມລາຍການ “ລະດູບານໃໝ່ແຫ່ງບ້ານເກີດເມືອງນອນ”
ທ່ານປະທານ ຫງວຽນທ້ຽນເຍີນ
ພົບປະກັບຄະນະຜູ້ຕາງໜ້າຊາວຫວຽດນາມ ອາໄສຢູ່ຕ່າງປະເທດ
(ພາບ: .chinhphu.vn)
(vovworld) – ວັນທີ 10/02, ທີ່ການພົບປະກັບຄະນະຜູ້ຕາງໜ້າຊາວຫວຽດນາມ ອາໄສຢູ່ຕ່າງປະເທດກັບເມືອປະເທດເຂົ້າຮ່ວມລາຍການລະດູບານໃໝ່ແຫ່ງບ້ານເກີດເມືອງນອນ ປີ 2015. ທ່ານປະທານຄະນະກຳມະການສູນກາງແນວໂຮມປະເທດຊາດຫວຽດນາມ ຫງວຽນທ້ຽນເຍີນ ເນັ້ນໜັກວ່າ, ແນວໂຮມປະເທດຊາດ ຈະສືບຕໍ່ພ້ອມກັບພັກ, ລັດ ເບິ່ງແຍງດູແລຊີວິດການເປັນຢູ່ຂອງພໍ່ແມ່ປະຊາຊົນໃຫ້ໝັ້ນຄົງກວ່າ, ພັດທະນາເສດຖະກິດໃຫ້ດີກວ່າ, ຕອບສະໜອງຄວາມຮຽກຮ້ອງ ແລະ ຄວາມມຸ່ງມາດປາດຖະໜາອັນເປັນທຳຂອງພໍ່ແມ່ປະຊາຊົນ. ທ່ານປະທານ ຫງວຽນທ້ຽນເຍີນ ໄດ້ຕີລາຄາສູງບັນດາຂໍ້ສະເໜີຂອງພໍ່ແມ່ປະຊາຊົນຊາວຫວຽດນາມ ອາໄສຢູ່ຕ່າງປະເທດ ໃນການເຊື່ອມຕໍ່ບັນດາປັນຍາຢູ່ພາຍໃນ ກັບຕ່າງປະເທດ ໃຫ້ກາຍເປັນເຄືອຂ່າຍຊ່ຽວຊານປະກອບພູມປັນຍາເພື່ອສ້າງສາ ແລະ ພັດທະນາປະເທດຊາດ…
ແລະກໍ່ໃນວັນດຽວກັນ, ທີ່ການຕ້ອນຮັບຄະນະ, ທ່ານນາງຮອງປະທານປະເທດ ຫງວຽນທິຢວານ ປາດຖະໜາວ່າ, ໃນໄລຍະຈະມາເຖິງຄະນະກຳມະການແຫ່ງລັດກ່ຽວກັບຊາວຫວຽດນາມ ອາໄສຢູ່ຕ່າງປະເທດຈະສືບຕໍ່ເສີມຂະຫຍາຍບົດບາດຂອງຕົນ, ສ້າງເງື່ອນໄຂສະດວກກວ່າອີກເພື່ອໃຫ້ພໍ່ແມ່ປະຊາຊົນອາໄສຢູ່ຕ່າງປະເທດ ກັບເມືອປະເທດໃຫ້ຫຼາຍກວ່າ. ພ້ອມກັນນັ້ນ, ຍູ້ແຮງບັນດານະໂຍບາຍດຶງດູດຊາວຫວຽດນາມ ອາໄສຢູ່ຕ່າງປະເທດເຂົ້າຮ່ວມການສ້າງສາປະເທດຊາດໃນປະຈຸບັນ, ໜູນຊ່ວຍຈັດຕັ້ງລາຍການຕ່າງໆເພື່ອໃຫ້ລຸ້ນໜຸ່ມກັບເມື່ອປະເທດ, ຮັກສາພື້ນຖານວັດທະນະທຳ, ການສຶກສາ, ສອນພາສາຫວຽດ ໃຫ້ລູກຫຼານຊາວຫວຽດນາມ ອາໄສຢູ່ຕ່າງປະເທດ…
ຕໍ່ຈາກນັ້ນ, ຄະນະຜູ້ແທນຊາວຫວຽດນາມ ອາໄສຢູ່ຕ່າງປະເທດໄດ້ມີການພົບປະກັບຜູ້ຕາງໜ້າການນຳຄະນະກຳມະການປະຊາຊົນນະຄອນຮ່າໂນ້ຍ. ຢູ່ທີ່ນີ້, ທ່ານຮອງປະທານຄະນະກຳມະການປະຊາຊົນນະຄອນຮ່າໂນ້ຍ ເລຮົ່ງເຊີນ ຢືນຢັນວ່າ, ນະຄອນຮ່າໂນ້ຍ ຈະເຮັດຈົນສຸດຄວາມສາມາດຂອງຕົນເພື່ອໜູນຊ່ວຍພໍ່ແມ່ປະຊາຊົນພັດທະນາເສດຖະກິດ, ເສີມຂະຫຍາຍບົດບາດເປັນຂົວຕໍ່ພັດທະນາການພົວພັນຮ່ວມມືມິດຕະພາບກັບປະຊາຊົນປະເທດອື່ນໃນໂລກ.