ລັດຖະມົນຕີກະຊວງປ້ອງກັນປະເທດຫວຽດນາມພົບປະເຈລະຈາກັບລັດຖະມົນຕີກະຊວງປ້ອງກັນປະເທດອິນເດຍ
(ການພົບປະເຈລະຈາ ກັບຄະນະຜູ້ແທນການທະຫານຂັ້ນສູງ ອິນເດຍ)
(vovworld) – ໃນຕອນບ່າຍ ວັນທີ 5/6, ທີ່ສຳນັກງານ ກະຊວງປ້ອງກັນປະເທດ, ທ່ານ ພົນເອກ ໂງຊວນລິກ, ລັດຖະມົນຕີກະຊວງປ້ອງກັນປະເທດຫວຽດນາມ ເປັນປະທານພິທີຕ້ອນຮັບຢ່າງເປັນທາງການ ແລະ ດຳເນີນການພົບປະເຈລະຈາ ກັບຄະນະຜູ້ແທນການທະຫານຂັ້ນສູງອິນເດຍ ໂດຍ ທ່ານ Manohar Parrika ລັດຖະມົນຕີກະຊວງປ້ອງກັນປະເທດອິນເດຍ ເປັນຫົວໜ້າຄະນະ. ທີ່ການພົບປະເຈລະຈາ, ທ່ານ Manohar Parrika ລັດຖະມົນຕີກະຊວງປ້ອງກັນປະເທດອິນເດຍ ຢືນຢັນວ່າ ຫວຽດນາມ ເປັນຄູ່ຮ່ວມມື ທີ່ສຳຄັນ ຂອງອິນເດຍ ຢູ່ພາກພື້ນ. ອິນເດຍ ປາດຖະໜາຢາກ ພັດທະນາການພົວພັນຮ່ວມມືມິດຕະພາບ ກັບຫວຽດນາມ ແລະ ຮັບປະກັນຜົນປະໂຫຍດ ຂອງປະຊາຊົນສອງປະເທດ. ທ່ານ ໂງຊວນລິກ, ລັດຖະມົນຕີກະຊວງປ້ອງກັນປະເທດ ເນັ້ນໜັກວ່າ ອິນເດຍ ເປັນຄູ່ຮ່ວມມືທີ່ສຳຄັນ, ຫວຽດນາມ ຍາມໃດກໍ່ໃຫ້ບຸລິມະສິດ ໃນການພົວພັນຮອບດ້ານ ກັບອິນເດຍ. ສອງຝ່າຍ ເຫັນດີເປັນເອກະພາບນຳກັນ ຕີລາຄາການພົວພັນດ້ານປ້ອງກັນຊາດ ລະຫວ່າງ ສອງປະເທດໄລຍະຜ່ານມາ ໄດ້ຮັບການພັດທະນາຢ່າງຕັ້ງໜ້າ ຕາມຂໍ້ຕົກລົງທີ່ໄດ້ເຊັນກັນ, ພິເສດແມ່ນ ໃນການແລກປ່ຽນຄະນະຜູ້ແທນ ແລະ ແລກປ່ຽນບົດຮຽນ. ສອງຝ່າຍເຫັນດີເປັນເອກະພາບ ຮ່ວມມືດ້ານປ້ອງກັນຊາດ ລະຫວ່າງ ສອງປະເທດ ຈຳເປັນຕ້ອງເຂົ້າສູ່ລວງເລິກ, ຕາມຂໍ້ຕົກລົງການຮ່ວມມືດ້ານປ້ອງກັນຊາດ ແລະ ຂໍ້ຕົກລົງກ່ຽວກັບວິໄສທັດ ທີ່ລະບຸໄວ້ໃນ “ຖະແຫຼງການວິໄສທັດລວມ ກ່ຽວກັບການພົວພັນດ້ານປ້ອງກັນຊາດ ຫວຽດນາມ-ອິນເດຍ ໄລຍະ 2015-2020”.