ທ່ານພົນເອກ ໂງຊວນລິກ ພົບປະເຈລະຈາກັບທ່ານ ພົນໂທ
(vovworld) – ຕອນເຊົ້າວັນທີ 13/01 ຢູ່ ບັກກີງ ທ່ານພົນເອກ ໂງຊວນລິກ ລັດຖະມົນຕີກະຊວງປ້ອງກັນປະເທດ ຫວຽດນາມ ມີການພົບປະເຈລະຈາກັບທ່ານ ພົນໂທ ລັດຖະມົນຕີກະຊວງປ້ອງກັນປະເທດ ຈີນ ຈ໋າງກວານຈ໋ວານ. ທ່ານພົນເອກ ໂງຊວນລິກ ຕີລາຄາສູງ ປີ 2016 ແມ່ນປີທີ່ການພົວພັນ 2 ປະເທດ ຫວຽດນາມ - ຈີນ ບັນລຸໄດ້ບັນດາຜົນງານອັນດີງາມ, ໂດຍສະແດງໃຫ້ເຫັນດ້ວຍບັນດາການຢ້ຽມຢາມເຊິ່ງກັນ ແລະ ກັນຂອງການນຳພັກ, ລັດ ແລະ ກະຊວງປ້ອງກັນປະເທດ 2 ປະເທດ. ເລື່ອງການນຳຂັ້ນສູງ 2 ພັກ, 2 ລັດ ແລະ ກອງທັບ 2 ປະເທດພົບປະເປັນປະຈຳ ສະແດງໃຫ້ເຫັນການພົວພັນ 2 ປະເທດນັບມື້ນັບໄດ້ຮັບການປັບປຸງຢ່າງໝັ້ນຄົງເຂັ້ມແຂງ, ພັດທະນາຢ່າງຕັ້ງໜ້າ ຕອບສະໜອງຜົນປະໂຫຍກ ແລະ ຄວາມມຸ່ງມາດປາດຖະໜາຂອງປະຊາຊົນ 2 ປະເທດ ແລະ ແມ່ນການສະແດງໃຫ້ເຫັນມູນເຊື້ອອັນດີງາມລະຫວ່າງ 2 ພັກ, 2 ລັດ, 2 ກອງທັບ ຫວຽດນາມ ແລະ ຈີນ. ຕາມທ່ານລັດຖະມົນຕີ ໂງຊວນລິກ ແລ້ວ ປີ 2017 ແມ່ນປີສຳຄັນສຳລັບ 2 ປະເທດ ຫວຽດນາມ - ຈີນ. ສຳລັບກອງທັບ 2 ປະເທດ, ການຢ້ຽມຢາມຂອງການນຳ ຄະນະພັກການທະຫານສູນກາງ ແລະ ກະຊວງປ້ອງກັນປະເທດຈີນ ມາ ຫວຽດນາມ ຈະແມ່ນພະຍານຫລັກຖານ ແລະ ແມ່ນພື້ນຖານໝັ້ນຄົງເພື່ອໃຫ້ການພົວພັນປ້ອງກັນຊາດ 2 ປະເທດ ສືບຕໍ່ກ້າວເຂົ້າສູ່ລວງເລິກ, ບັນລຸປະສິດທິຜົນແທດຈິງ.
ສ່ວນທ່ານ ພົນໂທ ລັດຖະມົນຕີກະຊວງປ້ອງກັນປະເທດ ຈີນ ຈ໋າງກວານຈ໋ວານ ຖືວ່າ: 2 ຝ່າຍຄວນເຄົາລົບຄວາມຮັບຮູ້ລວມຂອງການນຳຂັ້ນສູງ 2 ປະເທດທີ່ໄດ້ລະບຸໄວ້ໃນ “ຖະແຫຼງການວິໄສທັດລວມກ່ຽວກັບການຮ່ວມມືດ້ານປ້ອງກັນຊາດເຖິງປີ 2025” ລະຫວ່າງ 2 ກະຊວງປ້ອງກັນປະເທດ, ນຳການພົວພັນ 2 ປະເທດ ຫວຽດນາມ - ຈີນ ຂຶ້ນສູ່ລະດັບສູງໃໝ່.