ວັດທະນະທຳວິສາຫະກິດແມ່ນຈິດວິນຍານຂອງເຄື່ອງໝາຍການຄ້າ
(ພິທີປຸກລະດົມບັ້ນຂົນຂວາຍ “ກໍ່ສ້າງວັດທະນະທຳວິສາຫະກິດຫວຽດນາມ”)
(vovworld) - ເຂົ້າຮ່ວມພິທີປຸກລະດົມບັ້ນຂົນຂວາຍ “ກໍ່ສ້າງວັດທະນະທຳວິສາຫະກິດຫວຽດນາມ”, ໃນຕອນຄ່ຳວັນທີ 07/11, ໂດຍສະຫະສະມາຄົມພັດທະນາວັດທະນະທຳວິສາຫະກິດຫວຽດນາມ (VNABC) ຈັດຕັ້ງ, ທ່ານນາຍົກລັດຖະມົນຕີ ຫງວຽນຊວນຟຸກ ເນັ້ນໜັກວ່າ, ວັດທະນະທຳວິສາຫະກິດແມ່ນຈິດວິນຍານຂອງເຄື່ອງໝາຍການຄ້າ, ແມ່ນປັດໃຈແຕກໂຕນກັນຢ່າງໝັ້ນຄົງຂອງວິສາຫະກິດ ປະຈຸບັນ, ລັດຖະບານເອົາໃຈໃສ່ທີ່ສຸດເຖິງວັດທະນະທຳວິສາຫະກິດ, ວັດທະນະທຳໃນການດຳເນີນທຸລະກິດ ແລະ ຄຸນສົມບັດນັກທຸລະກິດ. ທ່ານນາຍົກລັດຖະມົນຕີຊີ້ແຈ້ງວ່າ, ວັດທະນະທຳວິສາຫະກິດບໍ່ພຽງແຕ່ແມ່ນຮູບພາບຂອງວິສາຫະກິດເທົ່ານັ້ນ, ຫາກຍັງແມ່ນພາບພົດຂອງປະເທດຊາດອີກດ້ວຍ, ໂດຍສະເພາະແມ່ນເມື່ອຫວຽດນາມ ເຂົ້າຮ່ວມບັນດາສັນຍາ 2 ຝ່າຍ, ຫຼາຍຝ່າຍ. ທ່ານນາຍົກລັດຖະມົນຕີ ເນັ້ນໜັກວ່າ.
“ຂ້າພະເຈົ້າຖືວ່າ, ບັນດາຫຼັກການພື້ນຖານ, ຫຼືເວົ້າແນວອື່ນແມ່ນບັນດາຄຸນຄ່າຕົ້ນຕໍ, ເປັນພື້ນຖານ, ເປັນກຳລັງຊີວິດຂອງວັດທະນະທຳວິສາຫະກິດ. ບັນດາຫຼັກການ ຫຼື ຄຸນຄ່ານັ້ນ ອາດຈະແມ່ນຄວາມສັດຊື່ບໍລິສຸດ, ຫົວຄິດປະດິດສ້າງ, ວິຊາການ, ຄວາມສຸດຈິດສຸດໃຈ ຫຼື ມີຄວາມຮັບຜິດຊອບຕໍ່ສິ່ງແວດລ້ອມ… ຍາມໃດສັງຄົມ, ລູກຄ້າມີຄວາມເຊື່ອໝັ້ນເຂົ້າບັນດາຄຸນຄ່າ ແລະ ຫຼັກການນີ້ຂອງວິສາຫະກິດ, ວິສາຫະກິດຈຶ່ງມີໂອກາດພັດທະນາໃຫ້ເຕີບໃຫຍ່. ຂາດວັດທະນະທຳເວົ້າລວມ, ຂາດວັດທະນະທຳວິສາຫະກິດເວົ້າສະເພາະແມ່ນເສຍຕົນເອງ. ບໍ່ມີຄວາມເສຍຫາຍໃດໃຫຍ່ກວ່າ ແລະ ແກ້ໄຂຫຍຸ້ງຍາກກວ່າຄວາມເສຍຫາຍນັ້ນ”.
ທີ່ພິທີ, ຄະນະຈັດຕັ້ງກໍ່ປະກາດຂໍ້ຕົກລົງຂອງນາຍົກລັດຖະມົນຕີ ຖືເອົາວັນທີ 10/11 ຂອງທຸກປີແມ່ນ “ວັນວັດທະນະທຳວິສາຫະກິດຫວຽດນາມ”. ທີ່ພິທີປຸກລະດົມ, ສະຫະສະມາຄົມພັດທະນາວັດທະນະທຳວິສາຫະກິດຫວຽດນາມ ໄດ້ລົງນາມກັບສະຫະສະມາຄົມນັກທຸລະກິດຍິງຫວຽດນາມ, ວິທະຍຸກະຈາຍສຽງຫວຽດນາມ ເພື່ອແນໃສ່ສົ່ງເສີມການປະຕິບັດບັ້ນຂົນຂວາຍ “ສ້າງວັດທະນະທຳວິສາຫະກິດຫວຽດນາມ”.