(ພາບປະກອບ)
(vovworld) - ວາລະເຈລະຈາຂັ້ນຫົວໜ້າຄະນະບັນດາປະເທດເຂົ້າຮ່ວມສັນຍາຄູ່ຮ່ວມມືຂ້າມປາຊີຝິກ (TPP) ດຳເນີນໃນລະຫວ່າງວັນທີ 1-10/9 ໄດ້ສິ້ນສຸດລົງດ້ວຍຜົນງານນັ້ນແມ່ນທຸກປະເທດບັນລຸໄດ້ຄວາມກ້າວໜ້າສຳຄັນໃນຫຼາຍຂົງເຂດ, ສ້າງທ່າມຸ່ງໄປເຖິງຈຸດໝາຍສຳເລັດສັນຍາຢ່າງ ຮອບດ້ານ.
ທີ່ວາລະເຈລະຈາຄັ້ງນີ້, ບັນດາປະເທດເຂົ້າຮ່ວມ TPP ລວມມີ: ອົດສະຕາລີ, ບຮູໄນ, ການາດາ, ຈີເລ, ຍີ່ປຸ່ນ, ມາເລເຊຍ, ເມກຊີໂກ, ນິວຊີແລນ, ເປຮູ, ສິງກະໂປ, ອາເມລິກາ ແລະ ຫວຽດນາມ ໄດ້ແກ້ໄຂສຳເລັດຫຼາຍບັນຫາທີ່ຄົງຄ້າງແຕ່ກ່ອນມານີ້ ແລະ ຮັດແຄບຊ່ອງຫວ່າງໃນຫຼາຍຂົງເຂດ. ບັນດາເນື້ອໃນທີ່ບັນລຸຄວາມກ້າວໜ້າພໍສົມຄວນຄື ລັດວິສາຫະກິດ, ຊັບສິນທາງປັນຍາ, ການລົງທຶນ, ຕ້ານການສໍ້ລາດບັງຫຼວງ…ບັນດາປະເທດກໍ່ສະຫງວນເວລາພົບປະສອງຝ່າຍເພື່ອສ້າງຄຳໝັ້ນສັນຍາກ່ຽວກັບການເປີດຕະຫຼາດສິນຄ້າ, ການບໍລິການ, ການລົງທຶນ, ການບໍລິການການເງິນ ແລະ ການຊື້ເຄື່ອງຂອງຂອງລັດຖະບານ.
ບັນດາປະເທດ TPP ຕັດສິນໃຈແກ້ໄຂບັນດາບັນຫາທີ່ຍັງຄົງຄ້າງ ແລະ ເຫັນດີເປັນເອກະພາບຈະມີການເຈລະຈາຂັ້ນຫົວໜ້າຄະນະຕື່ມອີກໃນໄລຍະຈະມາເຖິງ ເພື່ອສືບຕໍ່ຊຸກຍູ້ ແລະ ສິນສຸດການເຈລະຈາ.