(ພາບປະກອບ)

ໜັງສືພິມຂອງ ອັກຊັງຕີນ ໄດ້ລົງພິມບັນດາບົດກະວີ “ບັນທຶກປະຈຳວັນໃນຄຸກ“ ແລະ ບົດທີ່ຍ້ອງຍໍແນວຄິດປະຕິວັດຂອງປະທານ ໂຮ່ຈີມິນ, ເຊິ່ງໄດ້ຊ່ວຍປະຊາຊົນ ຫວຽດນາມ ຍາດເອົາໄຊຊະນະອັນສະຫງ່າລາສີ ໃນພາລະກິດຕໍ່ສູ້ປົດປ່ອຍຊາດ, ທ້ອນໂຮມປະເທດຊາດເປັນເອກະພາບ.

ດ້ວຍຫົວຂໍ້ວ່າ “ການຊີ້ນຳນຳພາຂອງປະທານ ໂຮ່ຈີມິນ, ມໍລະດົກຂອງ ຫວຽດນາມ ແລະ ໂລກ“ ເວັບໄຊ Medium.com ໃຫ້ຂໍ້ສັງເກດວ່າ, ໃນປະຫວັດສາດຍຸກປະຈຸບັນຂອງຊາດ ຫວຽດນາມ, ຊີວິດ ແລະ ພາລະກິດຂອງປະທານ ໂຮ່ຈີມິນ, ຍາມໃດກໍ່ຕິດພັນກັບບັນດາເຫດການສຳຄັນຍິ່ງຂອງປະເທດ. ສ່ວນເວັງໄຊ acercandonacions.com ກໍ່ໄດ້ອັບຮູບພາບປະທານ ໂຮ່ຈີມິນ ພ້ອມກັບຄຳພິໄນກຳຂອງເພິ່ນທີ່ວ່າ: “ຄວາມປາຖະໜາສຸດທ້າຍຂອງຂ້າພະເຈົ້າແມ່ນ: ທົ່ວພັກ, ທົ່ວປວງຊົນເຮົາສາມັກຄີກັນສູ້ຊົນສ້າງປະເທດ ຫວຽດນາມ ສັນຕິພາບ, ເອກະພາບ, ເອກະລາດ, ປະຊາທິປະໄຕ ແລະ ຮັ່ງມີເຂັ້ມແຂງ, ປະກອບສ່ວນຢ່າງເໝາະສົມເຂົ້າໃນພາລະກິດປະຕິວັດໂລກ“ ໃນໜ້າສຳຄັນ. ຜູ້ຂຽນບົດໄດ້ຍ້ອງຍໍປະທານ ໂຮ່ຈີມິນ ປຽບເໝືອນຜູ້ນຳທີ່ຍິ່ງໃຫຍ່, ນຳພາເສັ້ນທາງປະຕິວັດ, ຊ່ວຍປະຊາຊົນ ຫວຽດນາມ ຍາດໄດ້ໄຊຊະນະອັນພິລະອາດຫານໃນການຕໍ່ຕ້ານຍາດເອົາເອກະລາດແຫ່ງຊາດ. ສ່ວນວາລະສານສັງລວມ ອາເມລິກາລາຕີນ ກໍ່ເນັ້ນໜັກວ່າ, ໃນເກືອບ 50 ປີຜ່ານມາ, ໂດຍປະຕິບັດຕາມຄຳພິໄນກຳຂອງປະທານ ໂຮ່ຈີມິນ, ພັກ, ລັດ ແລະ ປະຊາຊົນ ຫວຽດນາມ ໄດ້ຮັບບັນດາຜົນງານອັນໃຫຍ່ຫຼວງ ແລະ ໜ້າເອກອ້າງທະນົງໃຈ.