(ພາບປະກອບ: AFP/TTXVN)

ຕາມເວັບໄຊສະຖິຕິ worldometers.info ແລ້ວ, ໄລ່ຮອດເວລາ 18 ໂມງຂອງວັນທີ 18 ກັນຍາ, ທົ່ວໂລກມີຜູ້ຕິດເຊື້ອພະຍາດໂຄວິດ-19 ກວ່າ 30,3 ລ້ານຄົນ, ໃນນັ້ນມີຜູ້ເສຍຊີວິດ 950.000 ຄົນ. ອາເມລິກາ ຍັງແມ່ນປະເທດຖືກຜົນສະທ້ອນຢ່າງໜັກໜ່ວງທີ່ສຸດຈາກໂລກລະບາດໂຄວິດ-19, ຖັດຈາກນັ້ນແມ່ນອິນເດຍ ແລະ ບຣາຊິນ.

          ອາເມລິກາລາຕິງ ແມ່ນໜຶ່ງໃນບັນດາພາກພື້ນທີ່ຖືກຜົນສະທ້ອນຢ່າງໜັກໜ່ວງທີ່ສຸດຈາກໂລກລະບາດໂຄວິດ-19, ດ້ວຍຜູ້ຕິດເຊື້ອພະຍາດໂຄວິດ-19 ກວ່າ 8 ລ້ານຄົນ, ໃນນັ້ນມີຜູ້ເສຍຊີວິດກວ່າ 300.000 ຄົນ.

          ສຳລັບພາກພື້ນເອີລົບ, ວັນທີ 17 ກັນຍາ, ທ່ານ Hans Kluge, ຜູ້ອຳນວຍການອົງການອະນາໄມໂລກ (WHO) ປະຈຳເອີລົບ ໄດ້ສະແດງຄວາມວິຕົກກັງວົນກ່ຽວກັບອັດຕາການຕິດແປດເຊື້ອໂຄວິດ-19 ທີ່ເປັນໜ້າເຕືອນໄພຢູ່ພາກພື້ນນີ້. ຕາມທ່ານແລ້ວ, ຈຳນວນຜູ້ຕິດເຊື້ອໂຄວິດ-19 ຢູ່ເອີລົບ ໄດ້ເພີ່ມຂຶ້ນຢ່າງໄວໃນເດືອນກັນຍາ 2020 ເປັນການສະແດງໃຫ້ເຫັນວ່າ ອັດຕາຜູ້ຕິດແປດເປັນໜ້າເຕືອນໄພໃນທົ່ວພາກພື້ນ.

          ໃນເຫດການທີ່ກ່ຽວຂ້ອງ, ດ້ວຍອັດຕາບັດເຫັນດີ 243 ບັດ ແລະ ບັດຄ້ານ 164 ບັດ, ວັນທີ 17 ກັນຍາ, ສະພາຕ່ຳອາເມລິກາ ໄດ້ຮັບຮອງເອົາຮ່າງກົດໝາຍໂດຍທ່ານສະມາຊິກສະພາຕ່ຳພັກປະຊາທິປະໄຕອາເມລິກາ Grace Meng ສະເໜີ ດ້ວຍເນື້ອໃນກ່າວປະນາມ “ທຸກຮູບການສະແດງທັດສະນະຈຳແນກການປະພຶດຕໍ່ຊາວອາຊີ  ທີ່ກ່ຽວຂ້ອງເຖິງໂລກລະບາດໂຄວິດ-19”. ບັນດາຜູ້ສະໜັບສະໜູນຖືນີ້ແມ່ນເອກະສານມີຄວາມຈຳເປັນ ເມື່ອເກີດຄວາມວຸ້ນວາຍ ແລະ ການໃຊ້ຄວາມຮຸນແຮງແນໃສ່ປະຊາຄົມຊາວອາຊີ ໄດ້ເພີ່ມຂຶ້ນຫຼາຍພໍສົມຄວນ ນັບແຕ່ໂລກລະບາດໂຄວິດ-19 ແຜ່ລະບາດ.