ສະພາແຫ່ງຊາດປຶກ ສາຫາລືຮ່າງກົດໝາຍປ້ອງກັນ ແລະ ຕ້ານສໍ້ລາດບັງຫຼວງ (ສະບັບປັບປຸງ)
ທ່ານຈູເຊີນຮ່າ ສະມາຊິກສະພາແຫ່ງຊາດນະຄອນຮ່າໂນ້ຍ
(ພາບ:sggp.org.vn)
(vovworld) - ຕອນບ່າຍວັນທີ 26/10, ໃນວາລະປຶກສາຫາລືຢູ່ຕາມໜ່ວຍ, ບັນດາສະມາຊິກສະພາແຫ່ງຊາດ (ສສຊ) ສຸມໃສ່ປຶກສາຫາລືກ່ຽວກັບຮ່າງກົດໝາຍວ່າດ້ວຍປ້ອງກັນ ແລະ ຕ້ານສໍ້ລາດບັງຫຼວງ (ສະບັບປັບປຸງ) ເຊິ່ງຈະຮັບຮອງເອົາທີ່ກອງປະຊຸມສະໄໝສາມັນເທື່ອທີ 4 ສະພາແຫ່ງຊາດຊຸດທີ 13 ນີ້. ບັນດາຄວາມເຫັນໄດ້ເປັນເອກະພາບຄວນປັບປຸງຕາມທິດປະຊາທິປະໄຕ, ເປີດເຜີຍ, ໂປ່ງໄສ ໃນວຽກງານພະນັກງານ, ພິເສດແມ່ນໃນການຮັບສະໝັກ, ການວາງແຜນ, ແຕ່ງຕັ້ງ, ຍົກຍ້າຍ ແລະ ຜັດປ່ຽນພະນັກງານ… ພ້ອມນັ້ນແມ່ນການເປີດເຜີຍຊັບສົມບັດ, ລາຍຮັບຂອງພະນັກງານ, ລັດຖະກອນ, ພາລະກອນ; ກຳນົດຄວາມຮັບຜິດຊອບຂອງຫົວໜ້າອົງການ, ອົງການຈັດຕັ້ງ, ຫົວໜ່ວຍຢ່າງຈະແຈ້ງ. ທ່ານ Le Nam ສສຊ ແຂວງແທງຮ໋ວາ, ຖືວ່າ:
”ການຈັດຕັ້ງລະບົບປ້ອງກັນ, ຕ້ານສໍ້ລາດບັງຫຼວງແມ່ນມີຄວາມໝາຍຕັດສິນຊີ້ຂາດໃນການຕໍ່ສູ້ປ້ອງກັນ, ຕ້ານສໍ້ລາດບັງຫຼວງ. ປະຈຸບັນ, ສູນກາງໄດ້ຈັດອົງການປ້ອງກັນ, ຕ້ານສໍ້ລາດບັງຫຼວງເຂົ້າໃນອົງການສູນກາງພັກ ໂດຍທ່ານເລຂາທິການໃຫຍ່ເປັນຫົວໜ້າຄະນະຊີ້ນຳ, ຂ້າພະເຈົ້າເຫັນດີທີ່ສຸດ. ຂ້າພະເຈົ້າເຫັນວ່າຄວນມີການປ່ຽນໃໝ່ໃນການສ້າງກົດໝາຍວ່າດ້ວຍການປ້ອງກັນ, ຕ້ານສໍ້ລາດບັງຫຼວງ”
ກ່ອນໜ້ານັ້ນ, ຕອນເຊົ້າວັນທີ 26/10, ບັນດາ ສສຊ ໄດ້ສຸມໃສ່ກວດກາຮ່າງກົດໝາຍວ່າດ້ວຍນະຄອນຫຼວງ. ຮ່າງກົດໝາຍວ່າດ້ວຍນະຄອນຫຼວງພາຍຫຼັງໄດ້ຮັບການປັບປຸງ, ເພີ່ມເຕີມໄດ້ກຳນົດ 16 ນະໂຍບາຍ, ກົນໄກພິເສດສະເພາະເພື່ອສ້າງພື້ນຖານດ້ານກົດໝາຍຢ່າງໝັ້ນຄົງເພື່ອໃຫ້ນະຄອນ ຫຼວງພັດທະນາສົມກັບຂອບຂະໜາດໃນອະນາຄົດ. ທ່ານ Chu Son Ha ສະມາຊິກສະພາແຫ່ງຊາດນະຄອນຮ່າໂນ້ຍ ຖືວ່າ:
“ຂ້າພະເຈົ້າຖືວ່າ, ຮ່າງກົດໝາຍວ່າດ້ວຍນະຄອນຫຼວງໄດ້ຮັບການປັບປຸງ, ເພີ່ມເຕີມຢ່າງຖືກຕ້ອງຕາມເນື້ອໃນຈິດໃຈຂອງມະຕິເລກທີ 11 ຂອງກົມການເມືອງ. ນັ້ນແມ່ນສະພາແຫ່ງຊາດໄດ້ຫັນມະຕິຂອງກົມການເມືອງກ່ຽວກັບນະຄອນຫຼວງເປັນຂໍ້ກຳນົດກົດລະບຽບ, ເພີ່ມແຫຼ່ງກຳລັງໃຫ້ແກ່ນະຄອນຫຼວງ ແລະ ຮັບປະກັນໃຫ້ນະຄອນຫຼວງພັດທະນາໃນໄລຍະຈະມາເຖິງ. ພົນລະເມືອງຫວຽດນາມ ທຸກຄົນຕ້ອງມີຄວາມຮັບຜິດຊອບເອົາໃຈໃສ່ຕໍ່ການພັດທະນານະຄອນຫຼວງ“.