ຫາດດ່ອນຈືເທີບ
ພາບ:vnexpress.net
|
(vovworld)- ວັນທີ 6/11, ໂຄສົກກະຊວງການຕ່າງປະເທດຫວຽດນາມ ເລຫາຍບີງ ຊີ້ແຈ້ງວ່າ: ຫວຽດນາມ ມີພະຍານຫລັກຖານດ້ານກົດໝາຍ ແລະ ປະຫວັດສາດຢ່າງພຽງພໍ ເພື່ອຢັ້ງຢືນອະທິປະໄຕຂອງຕົນ ສຳລັບ ໝູ່ເກາະຮ່ວາງຊາ ແລະ ເຈື່ອງຊາ. ການກະທຳບູລະນະກໍ່ສ້າງກິດຈະກຳຢ່າງຜິດກົດໝາຍ ຂອງຈີນ ຢູ່ຫາດດອນຈືເທີບ ໄດ້ລ່ວງລ້ຳອະທິປະໄຕຂອງຫວຽດນາມ ສຳລັບ ໝູ່ເກາະເຈື່ອງຊາ, ລະເມີດກົດໝາຍສາກົນ, ໄປຝືນກັບຖະແຫລງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ(DOC) ກໍຄື ຂໍ້ຕົກລົງກ່ຽວກັບບັນດາຫລັກການພື້ນຖານຊີ້ນຳການແກ້ໄຂບັນດາບັນຫາບົນທະເລຫວຽດນາມ - ຈີນ, ເຮັດໃຫ້ປ່ຽນແປງສະພາບເດີມ, ກໍ່ຄວາມເຄັ່ງຕຶງ, ເຮັດໃຫ້ສະພາບການສັບສົນຂຶ້ນຕື່ມ, ບໍ່ນຳມາເຖິງຜົນປະໂຫຍດແກ່ສັນຕິພາບ ແລະ ສະຖຽນລະພາບໃນພາກພື້ນ.
ຫວຽດນາມ ເດັດດ່ຽວຄັດຄ້ານການກະທຳຢ່າງຜິດກົດໝາຍດັ່ງກ່າວຂອງຈີນ, ຮຽກຮ້ອງຈີນ ເຄົາລົບອະທິປະໄຕຂອງຫວຽດນາມ, ປະຕິບັດ DOC ຢ່າງເຂັ້ມງວດ, ຢຸດຕິການບູລະນະ, ກໍ່ສ້າງກິດຈະກຳ, ເຮັດໃຫ້ປ່ຽນແປງສະພາບເດີມຢູ່ໝູ່ເກາະເຈື່ອງຊາ ແລະ ບໍ່ປະໃຫ້ເກີດໄດ້ມີການກະທຳຜິດພາດຄືດັ່ງກ່າວ. ໃນວັນດຽວກັນ, ຜູ້ຕາງຫນ້າກະຊວງການຕ່າງປະເທດ ຫວຽດນາມ ໄດ້ພົບປະກັບຜູ້ຕາງຫນ້າສະຖານທູດຈີນ ປະຈຳຮ່າໂນ້ຍ ເພື່ອມອບຈົດໝາຍການທູດຄັດຄ້ານການກະທຳຂອງຈີນ.