(vovworld) – ວັນທີ 22/1, ທ່ານເລຂາທິການໃຫຍ່ຄະນະບໍລິຫານງານສູນກາງພັກ ກອມມູນິດ ຫວຽດນາມ ຫງວຽນຟູ໋ຈ້ອງ ແລະ ທ່ານເລຂາທິການໃຫຍ່ພັກກອມມູນິດ ຈີນ, ປະທານປະເທດ ສປ ຈີນ ສື່ຈິ້ນຜິງ ໄດ້ມີການໂອ້ລົມທາງໂທລະສັບ, ເນື່ອງໃນໂອກາດ 2 ປະເທດສະເຫຼີມສະຫຼອງ 64 ປີແຫ່ງວັນສ້າງຕັ້ງການພົວພັນທາງການທູດ ແລະ ປະຊາຊົນ 2 ປະເທດກະກຽມຕ້ອນຮັບບຸນປີໃໝ່ປະຈຳຊາດ ປີມະເມຍ 2014. ທ່ານເລຂາທິການໃຫຍ່ ຫງວຽນຟູ໋ຈ້ອງ ອວຍພອນໃຫ້ພັກ, ລັດ ແລະ ປະຊາຊົນ ຈີນ ໄດ້ບັນລຸບັນດາຜົນງານໃນການປະຕິຮູບ, ການພັດທະນາເສດຖະກິດ, ການປັບປຸງ, ຍົກສູງຊີວິດການເປັນຢູ່ຂອງປະຊາຊົນ, ການກໍ່ສ້າງພັກ ແລະ ອຳນາດການປົກຄອງສັດຊື່ບໍລິສຸດໃນຊຸມປີຜ່ານມາ, ອວຍພອນໃຫ້ປະຊາຊົນ ຈີນ ເນື່ອງໃນໂອກາດປີໃໝ່ປີມະເມຍ ແລະ ອວຍພອນໃຫ້ປະຊາຊົນ ຈີນ ພາຍໃຕ້ການຊີ້ນຳ, ນຳພາຂອງພັກກອມມູນິດ ຈີນ ສືບຕໍ່ຍາດໄດ້ບັນດາໄຊຊະນະໃໝ່ໃນພາລະກິດກໍ່ສ້າງສັງຄົມນິຍົມທີ່ມີສີສັນ ຈີນ.
ໂດຍຕາງໜ້າໃຫ້ພັກ, ລັດ ແລະ ປະຊາຊົນ ຈີນ, ທ່ານເລຂາທິການໃຫຍ່, ປະທານປະເທດ ຈີນ ສື່ຈີ້ນຜິງ ອວຍພອນໃຫ້ປະຊາຊົນ ຫວຽດນາມ ເນື່ອງໃນໂອກາດປີໃໝ່ປະຈຳຊາດ, ຢືນຢັນ ພັກ, ລັດ ແລະ ປະຊາຊົນ ຈີນ ຖືເປັນສຳຄັນການພົວພັນຖານບ້ານໃກ້ເຮືອນຄຽງມິດຕະພາບທີ່ເປັນມູນເຊື້ອກັບ ຫວຽດນາມ, ອວຍພອນໃຫ້ບັນດາຜົນງານເຊິ່ງ ປະຊາຊົນ ຫວຽດນາມ ບັນລຸໄດ້ໃນປີຜ່ານມາ. ທ່ານເລຂາທິການໃຫຍ່, ປະທານປະເທດ ສື່ຈີ້ນຜິງ ກໍ່ໄດ້ແຈ້ງໃຫ້ທ່ານເລຂາທິການໃຫຍ່ ຫງວຽນຟູ໋ຈ້ອງ ໄດ້ຮັບຊາບ ກ່ຽວກັບບາງເນື້ອໃນສຳຄັນຂອງກອງປະຊຸມສູນກາງຄັ້ງທີ 3 ຂອງພັກກອມມູນິດ ຈີນ ທີ່ຜ່ານມາ.
ການນຳ 2 ທ່ານໄດ້ຕີລາຄາສູງບັນດາຄວາມຄືບໜ້າໃນການພົວພັນ ຫວຽດນາມ - ຈີນ ໃນປີ 2013, ເຫັນດີເປັນເອກະສັນກ່ຽວກັບບັນດາທິດທາງໃຫຍ່ເພື່ອແນໃສ່ຮັກສາ ແລະ ສືບຕໍ່ຊຸກຍູ້ທ່າພັດທະນາເປັນປົກກະຕິ, ແທດຈິງ ແລະ ປອດໃສຂອງການພົວພັນ 2 ປະເທດໃນໄລຍະຈະມາເຖິງເຊິ່ງລວມມີການເພີ່ມທະວີການແລກປ່ຽນ, ພົບປະຂັ້ນສູງ, ລົງເລິກເຂົ້າໃນການແລກປ່ຽນບົດຮຽນພັດທະນາປະເທດຊາດ, ເພີ່ມທະວີການປະສານການຮ່ວມມືຜ່ານຄະນະກຳມະການຊີ້ນຳການຮ່ວມມື 2 ຝ່າຍ, ຊຸກຍູ້ ແລະ ຍົກສູງປະສິດທິຜົນບັນດາຂົງເຂດ ແລະ ກົນໄກຮ່ວມມື, ຍູ້ແຮງການພົວພັນແລກປ່ຽນປະຊາຊົນ, ພິເສດແມ່ນລຸ້ນໜຸ່ມ, ຢືດໝັ້ນສົມທົບກັນຮັກສາສັນຕິພາບ, ສະຖຽນລະພາບໃນທະເລຕາເວັນອອກຖືກກັບບັນດາຄວາມຮັບຮູ້ ແລະ ຂໍ້ຕົກລົງລວມຂອງການນຳຂັ້ນສູງ 2 ປະເທດ.