(vovworld) - ວັນທີ 18/04, ຄະນະຜູ້ແທນຂັ້ນສູງລັດຖະບານຫວຽດນາມ ໂດຍທ່ານຮອງນາຍົກລັດຖະມົນຕີ ຫວູວັນນິງ ນຳໜ້າ ໄດ້ສິ້ນສຸດການຢ້ຽມຢາມຊູແອດ, ລາຊະອານາຈັກອັງກິດ ແລະ ອາຍແລນເໜືອ. ເມື່ອຕອບສຳພາດຕໍ່ສື່ມວນຊົນ, ທ່ານນາງຮອງລັດຖະມົນຕີການຕ່າງປະເທດ ຮ່າກິມຫງອກ, ຢືນຢັນວ່າ ການຢ້ຽມຢາມຄັ້ງນີ້ມີຄວາມໝາຍສຳຄັນ ໃນການສ້າງບາດກ້າວຫັນປ່ຽນ, ປະກອບສ່ວນຊຸກຍູ້ການພົວພັນ 2 ຝ່າຍລະຫວ່າງຫວຽດນາມ ກັບຊູແອດ ແລະ ອັງກິດໃນຫຼາຍຂົງເຂດ.
ທີ່ຊູແອດ, 2 ຝ່າຍໄດ້ເຫັນດີຍູ້ແຮງການຮ່ວມມືໃນບັນດາຂົງເຂດເຊິ່ງຊູແອດ ມີທ່າແຮງ ແລະ ຫວຽດນາມ ມີຄວາມຕ້ອງການຄື: ພະລັງງານຜະລິດຄືນໃໝ່, ໂທລະຄົມ, ເຕັກໂນໂລຊີສູງ, ບຳລຸງສ້າງແຫຼ່ງຊັບພະຍາກອນມະນຸດ... ທ່ານນາງ ຮ່າກິມຫງອກ ໃຫ້ຮູ້ວ່າ, ຫວຽດນາມ ສະເໜີໃຫ້ຊູແອດ ຮັບຮູ້ກົນໄກການຕະຫຼາດຂອງຫວຽດນາມ ກໍ່ຄືຍູ້ແຮງວິວັດການເຈລະຈາສັນຍາການຄ້າເສລີ (FTA) ລະຫວ່າງຫວຽດນາມ ແລະ ສະຫະພາບເອີລົບ. ຊູແອດ ໄດ້ຮັບຄຳເຊີນເຂົ້າຮ່ວມກອງປະຊຸມໃຫຍ່ລັດຖະສະພາລະຫວ່າງຊາດໂລກຄັ້ງທີ 132 ເຊິ່ງຈະຈັດຂຶ້ນຢູ່ຫວຽດນາມ ໃນປີ 2015. ຄຽງຂ້າງນັ້ນ, ຊູແອດ ກໍ່ສະແດງການສະໜັບສະໜູນຫຼັກໝັ້ນຂອງຫວຽດນາມ ໃນການແກ້ໄຂບັນດາການພິພາດຢູ່ທະເລຕາເວັນອອກ ໂດຍສັນຕິວິທີ ບົນພື້ນຖານກົດໝາຍສາກົນ.
ກ່ຽວກັບການຢ້ຽມຢາມຂອງຄະນະຜູ້ແທນຂັ້ນສູງຫວຽດນາມ ຢູ່ລາຊະອານາຈັກອັງກິດ ແລະ ອາຍແລນເໜືອ, ທ່ານນາງ ຮ່າກິມຫງອກ ໃຫ້ຮູ້ວ່າ, ເວທີປາໄສຫວຽດນາມ - ອັງກິດ ດ້ວຍການເຂົ້າຮ່ວມຂອງວິສາຫະກິດ ອັງກິດ 100 ແຫ່ງ, ຖືກຈັດຂຶ້ນໃນຂອບເຂດການຢ້ຽມຢາມຂອງທ່ານຮອງນາຍົກລັດຖະມົນຕີ ຫວູວັນນິງ, ພ້ອມກັບບັນດາການເຮັດວຽກຂອງທ່ານຮອງນາຍົກລັດຖະມົນຕີ ຫວູວັນນິງ ກັບບັນດາວິສາຫະກິດ, ບັນດານັກລົງທຶນ ແລະ ກອງທຶນຄຸ້ມຄອງຊັບສິນອັນດັບໜຶ່ງຂອງອັງກິດ, ໄດ້ສະແດງໃຫ້ເຫັນຄວາມເອົາໃຈໃສ່ຂອງວົງການວິສາຫະກິດອັງກິດ ກັບຫວຽດນາມ. ນີ້ແມ່ນກາລະໂອກາດທີ່ດີເພື່ອໃຫ້ 2 ປະເທດຍູ້ແຮງການຮ່ວມມືຢ່າງເໝາະສົມກັບຄວາມສາມາດບົ່ມຊ້ອນ.