ທ່ານຮອງນາຍົກລັດຖະມົນຕີ ຫວຽດນາມ ເຈິ່ນຮົ່ງຮ່າ  ແລະ ທ່ານ Josep Borrell ຮອງປະທານຄະນະກຳມະການເອີລົບ (EC) (ພາບ: TTXVN)

ວັນທີ 26 ຕຸລາ, ຢູ່ Brussels (ແບນຊິກ), ເນື່ອງໃນໂອກາດເຂົ້າຮ່ວມເວທີປາໄສປະຕູສູ່ທົ່ວໂລກ ຢູ່ ແບນຊິກ, ທ່ານຮອງນາຍົກລັດຖະມົນຕີ ຫວຽດນາມ ເຈິ່ນຮົ່ງຮ່າ ໄດ້ມີການເຮັດວຽກ ກັບທ່ານ Josep Borrell ຮອງປະທານຄະນະກຳມະການເອີລົບ (EC) ທັງເປັນຜູ້ຕາງໜ້າຂັ້ນສູງຂອງ ສະຫະພາບ ເອີລົບ ທີ່ຮັບຜິດຊອບນະໂຍບາຍຄວາມໝັ້ນຄົງ ແລະ ການຕ່າງປະເທດ; ໃຫ້ການຕ້ອນຮັບທ່ານ Wopke Hoeskstra ຂ້າຫຼວງໃຫຍ່ ຮັບຜິດຊອບດ້ານ ດິນຟ້າອາກາດ EU.

ທີ່ການພົບປະກັບທ່ານ Josep Borrell ຮອງປະທານ EC, ທ່ານຮອງນາຍົກລັດຖະມົນຕີ ຫວຽດນາມ ເຈິ່ນຮົ່ງຮ່າ ໄດ້ສະເໜີໃຫ້ສອງຝ່າຍເຮັດໃຫ້ເສົາຄ້ຳລົງທຶນການຄ້າ ເລິກເຊິ່ງກ່ວາອີກ ໂດຍຜ່ານການຜັນຂະຫຍາຍສັນຍາການຄ້າເສລີ ຫວຽດນາມ - EU (EVFTA) ແລະ ບັນດາ ປະເທດສະມາຊິກ EU ໃຫ້ສັດຕະຍາບັນສັນຍາອາລັກຂາການລົງທຶນ ຫວຽດນາມ ແລະ EU (EVIPA) ແລະ EC ຍົກເລີກບັດເຫຼືອງ IUU ໃຫ້ ຫວຽດນາມ ໂດຍໄວ.

ສ່ວນທ່ານ Josep Borrell ຢັ້ງຢືນວ່າ ຫວຽດນາມ ແມ່ນຄູ່ຮ່ວມມືສຳຄັນຂອງ EU ຢູ່ພາກພື້ນ ອາຊີ, ທ່ານຕີລາຄາວ່າ ການພົວພັນ ຫວຽດນາມ -EU ມີການພັດທະນາຢ່າງຮອບດ້ານ, ເປັນຕົ້ນແມ່ນເສດຖະກິດ - ການຄ້າ ດ້ວຍເລື່ອງເສີມຂະຫຍາຍສັນຍາ EVFTA ເປັນຢ່າງດີທີ່ສຸດນັ້ນ ໄດ້ຊ່ວຍໃຫ້ວົງເງິນການຄ້າສອງຝ່າຍເພີ່ມຂຶ້ນ 20%ໃນປີ 2022. ກ່ຽວກັບ IUU, ທ່ານ Josep Borrell ໄດ້ຮັບຮູ້ ບັນດາຄວາມມານະພະຍາຍາມຢ່າງຕັ້ງໜ້າ ຂອງ ຫວຽດນາມ ໃນໄລຍະຜ່ານມາ ແລະ ສະເໜີໃຫ້ ຫວຽດນາມ ສົມທົບກັນຢ່າງແໜ້ນແຟ້ນ, ປະຕິບັດຢ່າງຄົບຖ້ວນບັນດາຂໍ້ສະເໜີແນະຂອງ EC ເພື່ອອາດສາມາດຍົກເລີກບັດເຫຼືອງໂດຍໄວ.