ທ່ານ ຮວ່າງບິນກວັນ, ຫົວໜ້າຄະນະພົວພັນຕ່າງປະເທດສູນກາງພັກ ແຈ້ງໝາກຜົນກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຂອງ ພັກ ກອມມູນິດ ຫວຽດນາມ (ພາບ: ກະຊວງການຕ່າງປະເທດ)

ທ່ານ ຮວ່າງບິນກວັນ, ຫົວໜ້າຄະນະພົວພັນຕ່າງປະເທດສູນກາງພັກ ໃຫ້ຮູ້ວ່າ ກອງປະຊຸມໃຫຍ່ ໄດ້ກຳນົດທັດສະນະຊີ້ນຳພື້ນຖານ 4 ປະການ. ໃນນັ້ນ, ທັດສະນະຊີ້ນຳລຸລ່ວງ ແມ່ນຢຶດໝັ້ນ, ໝູນໃຊ້, ພັດທະນາຢ່າງມີຫົວຄິດປະດິດສ້າງ ລັດທິ ມາກ - ເລນິນ, ແນວຄິດໂຮ່ຈີມິນ ທີ່ວ່າ: ຢຶດໝັ້ນເປົ້າໝາຍເອກະລາດແຫ່ງຊາດ ແລະ ສັງຄົມນິຍົມ; ຢຶດໝັ້ນແນວທາງການປ່ຽນແປງໃໝ່ຂອງພັກ; ຢຶດໝັ້ນບັນດາຫຼັກການກໍ່ສ້າງພັກ; ຮັບປະກັນຜົນປະໂຫຍດສູງສຸດໃຫ້ແກ່ປະເທດຊາດ ບົນພື້ນຖານບັນດາຫຼັກການພື້ນຖານຂອງກົດໝາຍສາກົນ, ຄວາມສະເໝີພາບ, ການຮ່ວມມື ແລະ ຕ່າງຝ່າຍຕ່າງມີຜົນປະໂຫຍດ.

        ພ້ອມກັນນັ້ນ, ຍຸດທະສາດພັດທະນາສັງລວມຂອງ ຫວຽດນາມ ແມ່ນຍູ້ແຮງພາລະກິດປ່ຽນແປງໃໝ່ຢ່າງຮອບດ້ານ ແລະ ຄົບຊຸດ, ພັດທະນາປະເທດຊາດຢ່າງວ່ອງໄວ ແລະ ຍືນຍົງ; ຖືການພັດທະນາເສດຖະກິດ - ສັງຄົມ ເປັນໃຈກາງ; ການກໍ່ສ້າງພັກແມ່ນແກ່ນສານ; ການພັດທະນາວັດທະນະທຳແມ່ນພື້ນຖານທາງດ້ານຈິດໃຈ; ການຮັບປະກັນການປ້ອງກັນຊາດ, ປ້ອງກັນຄວາມສະຫງົບແມ່ນໜ້າທີ່ຈຸດສຸມ ແລະ ປະຕິບັດເປັນປະຈຳ.

        ທ່ານ ຮວ່າງບິ່ງກວັນ ກໍ ແຈ້ງໃຫ້ຊາບວ່າ: ວຽກງານບຸກຄະລາກອນ ຂອງກອງປະຊຸມໃຫຍ່ຄັ້ງທີ 13 ຂອງ ພັກ ຖືກດຳເນີນຢ່າງເປີດເຜີຍ, ປະຊາທິປະໄຕ, ຮັດກຸ່ມ ແລະ ມີວິທະຍາສາດ. ກອງປະຊຸມໃຫຍ່ກໍໄດ້ເລືອກຕັ້ງ ຄະນະບໍລິຫານງານສູນກາງພັກຊຸດທີ 13 ລວມມີກຳມະການສົມບູນ 180 ສະຫາຍ ແລະ ກຳມະການສຳຮອງ 20 ສະຫາຍ. ໃນນັ້ນເພດຍິງມີ 19 ສະຫາຍ. ທ່ານເລຂາທິການໃຫຍ່, ປະທານປະເທດ ຫງວຽນຝູຈ້ອງ ໄດ້ຮັບການເລືອກຕັ້ງເປັນເລຂາທິການໃຫຍ່ ຄະນະບໍລິຫານງານສູນກາງພັກຊຸດທີ 13 ດ້ວຍຄວາມໄວ້ວາງໃຈສູງ.