(vovworld) – ໃນການຢ້ຽມຢາມ ແລະ ເຮັດວຽກຢູ່ ສ ເກົາຫຼີ (ແຕ່ວັນທີ 25 – 28/8), ວັນທີ 26/8, ທ່ານຮອງນາຍົກລັດຖະມົນຕີ ຫວຽດນາມ ຫງວຽນທ້ຽນເຍີນ ມີການພົບປະກັບທ່ານ ລັດຖະມົນຕີກະຊວງວິທະຍາສາດເຕັກໂນໂລຢີ, ປະດິດສ້າງ ແລະ ອະນາຄົດ, ກະຊວງແຮງງານ ແລະ ວຽກເຮັດງານທຳ ແລະ ກະຊວງປ້ອງກັນຄວາມສະຫງົບ ແລະ ບໍລິຫານລັດຂອງ ສ ເກົາຫຼີ. ກ່າວຄຳເຫັນທີ່ການພົບປະຄັ້ງຕ່າງໆ, ທ່ານຮອງນາຍົກລັດຖະມົນຕີ ຫງວຽນທ້ຽນເຍີນ ຢືນຢັນວ່າ ສາຍພົວພັນມິດຕະພາບ ຫວຽດນາມ - ສ ເກົາຫຼີ ໄດ້ຮັບການພັດທະນາຢ່າງຂະຫຍັນຂັນເຄື່ອນ ແລະ ມີປະສິດທິຜົນຢ່າງແທ້ຈິງ ໃນຕະຫຼອດ 20 ປີຜ່ານມາ, ເຊິ່ງສະແດງອອກໃນທຸກຂົງເຂດຮ່ວມມືຄື: ການເມືອງ ແລະ ເສດຖະກິດ, ວັດທະນະທຳ ແລະ ສັງຄົມ, ການປ້ອງກັນຊາດ ແລະ ປ້ອງກັນຄວາມສະຫງົບ, ການສຶກສາ ແລະ ບຳລຸງສ້າງ, ວິທະຍາສາດ ແລະ ເຕັກໂນໂລຢີ ກໍ່ຄືການພົວພັນລະຫວ່າງປະຊາຊົນ 2 ປະເທດ.
ທີ່ການພົບປະກັບ ທ່ານ Choi Mun – kee, ລັດຖະມົນຕີກະຊວງວິທະຍາສາດເຕັກໂນໂລຢີ, ປະດິດສ້າງ ແລະ ອະນາຄົດ ສ ເກົາຫຼີ, ທ່ານຮອງນາຍົກລັດຖະມົນຕີ ຫງວຽນທ້ຽນເຍີນ ສະເໜີໃຫ້ຝ່າຍ ສ ເກົາຫຼີ ໜູນຊ່ວຍ ຫວຽດນາມ ໃນການຄົ້ນຄ້ວາຄວາມເປັນໄປໄດ້ຂອງໂຄງການກໍ່ສ້າງສະຖາບັນຄົ້ນຄ້ວານຳໃຊ້ຕາມຮູບແບບຂອງ ສະຖາບັນວິທະຍາສາດ ແລະ ເຕັກໂນໂລຢີ ສ ເກົາຫຼີ (V - KIST). ໃນການເຮັດວຽກກັບທ່ານ ລັດຖະມົນຕີກະຊວງແຮງງານ ສ ເກົາຫຼີ Phang Ha – nam, ທ່ານຮອງນາຍົກລັດຖະມົນຕີ ຫງວຽນທ້ຽນເຍີນ ເນັ້ນໜັກວ່າ: ຍາມໃດລັດຖະບານ ຫວຽດນາມ ກໍ່ຕີລາຄາສູງ ແລະ ຖືການຮ່ວມມືແຮງງານແມ່ນໜຶ່ງໃນບັນດາຂົງເຂດຮ່ວມມືສຳຄັນ ແລະ ນຳມາເຊິ່ງປະສິດທິຜົນອັນແທດຈິງໃຫ້ທັງ 2 ຝ່າຍ, ຊ່ວຍໃຫ້ຄົນງານ ຫວຽດນາມ ມີເງື່ອນໄຂເຮັດວຽກໃນສະພາບອຸດສາຫະກຳພັດທະນາ ເພື່ອຍົກສູງສີມືການຊ່າງ ແລະ ປັບປຸງຊີວິດການເປັນຢູ່.
ກ່ອນໜ້ານັ້ນ, ທ່ານຮອງນາຍົກລັດຖະມົນຕີ ຫງວຽນທ້ຽນເຍີນ ແລະ ຄະນະຜູ້ແທນລັດຖະບານ ຫວຽດນາມ ໄດ້ເຂົ້າຮ່ວມພິທີຕັດແຖບຜ້າ, ເປີດສະຫຼອງຫ້ອງການຕາງໜ້າກະຊວງວິທະຍາສາດ ແລະ ເຕັກໂນໂລຢີ ຫວຽດນາມ ປະຈຳນະຄອນຫຼວງ ເຊີອູນ.