ອັດກອງປະຊຸມສຸດຍອດ ຄວາມໝັ້ນຄົງ, ປອດໄພ ນິວເຄຼຍຄັ້ງທີ 3
ການນຳບັນດາປະເທດເຂົ້າຮ່ວມກອງປະຊຸມ
(ພາບ: VGP/Nhật Bắc)
(vovworld) – ຕອນຄຳ່ວັນທີ 25/3, ຕາມເວລາ ຫວຽດນາມ, ຢູ່ສູນຈັດຕັ້ງກອງປະຊຸມເວທີປາໄສໂລກ ລາໄຮ ( ໂຮນລັງ), ກອງປະຊຸມສຸດຍອດຄວາມໝັ້ນຄົງ, ປອດໄພນິວເຄຼຍຄັ້ງທີ 3 ຖືກອັດລົງດ້ວຍເລື່ອງຮັບຮອງເອົາຖະແຫຼງການຮ່ວມຂອງກອງປະຊຸມ. ບັນດາການນຳມີຄວາມເພິ່ງພໍໃຈຮັບຮູ້ບັນດາຄຳໝັ້ນສັນຍາເກືອບທັງໝົດໂດຍບັນດາສະມາຊິກຍົກອອກມາທີ່ບັນດາກອງປະຊຸມຄັ້ງກ່ອນລ້ວນແຕ່ໄດ້ຮັບການປະຕິບັດ. ບັນດາປະເທດຢືນຢັນຄຳໝັ້ນສັນຍາຂອງຕົນກ່ຽວກັບບັນຫາຈຸດໝາຍລວມປອດອາວຸດນິວເຄຼຍ, ບໍ່ແຜ່ຂະຫຍາຍນິວເຄຼຍ ແລະ ນຳໃຊ້ພະລັງງານນິວເຄຼຍເພື່ອຈຸດປະສົງສັນຕິພາບ, ເພີ່ມທະວີຄວາມໝັ້ນຄົງ ປອດໄພດ້ານນິວເຄຼຍ, ຫລຸດຜ່ອນໄພກໍ່ການຮ້າຍ, ຍົກສູງຄວາມຮັບຜິດຊອບໂດຍພື້ນຖານຂອງບັນດາປະເທດໃນການຮັບປະກັນຄວາມໝັ້ນຄົງ ປອດໄພດ້ານນິວເຄຼຍ. ອາເມລິກາຈະແມ່ນປະເທດຈັດຕັ້ງກອງປະຊຸມສຸດຍອດຄວາມໝັ້ນຄົງ, ປອດໄພນິວເຄຼຍຄັ້ງທີ 4.
ທ່ານນາຍົກລັດຖະມົນຕີ ຫງວຽນເຕີນຢູ້ງ ພ້ອມກັບຄະນະຜູ້ແທນຂັ້ນສູງ ຫວຽດນາມ ເຂົ້າຮ່ວມ ແລະ ປະກອບສ່ວນຕັ້ງໜ້າເຂົ້າໃນທຸກການເຄື່ອນໄຫວຂອງໂຄງການດຳເນີນງານ. ພິເສດ, ບົດປະກອບຄຳເຫັນທີ່ວາລະປະຊຸມຄົບຄະນະ ກໍ່ຄືບົດກ່າວປາໄສຂອງທ່ານນາຍົກລັດຖະມົນຕີ ຫງວຽນເຕີນຢູ້ງ ໃນວາລະປຶກສາຫາລືຕ່າງໆໄດ້ສ້າງຄວາມປະທັບໃຈຢ່າງເລິກເຊິ່ງ, ໄດ້ຮັບຄວາມເຫັນດີ ແລະ ການຕີລາຄາສູງຂອງບັນດາການນຳເຂົ້າຮ່ວມກອງປະຊຸມ. ຜ່ານນັ້ນ, ສະແດງບົດບາດຂອງຫວຽດນາມ ດ້ວຍຖານະເປັນສະມາຊິກທີ່ມີຄວາມຮັບຜິດຊອບ, ເປັນເຈົ້າການ ແລະ ຕັ້ງໜ້າປະກອບສ່ວນເຂົ້າໃນຄວາມມານະພະຍາຍາມລວມຂອງມວນມະນຸດໃນການຮັບປະກັນຄວາມປອດໄພ ແລະ ຄວາມໝັ້ນຄົງນິວເຄຼຍ.
ກ່ອນໜ້ານັ້ນ, ໃນຂອບເຂດແຜນການເຂົ້າຮ່ວມກອງປະຊຸມສຸດຍອດຄວາມໝັ້ນຄົງ, ປອດໄພນິວເຄຼຍຄັ້ງທີ 3, ທ່ານນາຍົກລັດຖະມົນຕີ ຫງວຽນເຕີນຢູ້ງ ໄດ້ດຳເນີນການພົບປະ 2 ຝ່າຍກັບບັນດາການນຳບາງປະເທດເຂົ້າຮ່ວມກອງປະຊຸມ. ໃນນັ້ນມີທ່ານນາຍົກລັດຖະມົນຕີ ສິງກາໂປ ຫຼີຊຽນຫຼູງ, ທ່ານນາງນາຍົກລັດຖະມົນຕີ ເຢຍລະມັນ Angela Merkel, ທ່ານນາຍົກລັດຖະມົນຕີ ມາເລເຊຍ Muhyiddin Yassin.
ທ່ານນາຍົກລັດຖະມົນຕີ ຫງວຽນເຕີນຢູ້ງ ກໍ່ມີການພົບປະກັບປະທານຄະນະກຳມະການເອີລົບ ( EC) Jose Manuel Barroso. 2 ຝ່າຍໄດ້ແລກປ່ຽນກ່ຽວກັບວິວັດທະນາການເຈລະຈາສັນຍາການຄ້າເສລີ ຫວຽດນາມ - ອີຢູ (EVFTA). 2 ຝ່າຍລ້ວນແຕ່ສຸມໃສ່ແຫຼ່ງກຳລັງເພື່ອອາດສາມາດສຳເລັດການເຈລະຈາ ກ່ອນທີ່ຈັດກອງປະຊຸມຂັ້ນສູງເວທີປາໄສຮ່ວມມື ອາຊີ - ເອີລົບ ຄັ້ງທີ 10 (ASEM – 10) ໃນເດືອນ 10 ຈະມາເຖິງກໍ່ຄືຈຸດໝາຍເຊິ່ງ 2 ຝ່າຍປາດຖະໜາ.