ວົງການນັກໄຈ້ແຍກໄດ້ຖືວ່າ ຂໍ້ຕົກລົງຂອງວໍຊິງຕັນ ແມ່ນເປີດສາກໃຫ້ສົງຄາມການຄ້າກັບບັນດາພັນທະມິດແຖວໜ້າຂອງອາເມລິກາ ຢູ່ເອີລົບ.

      ກ່າວຄຳເຫັນຕໍ່ວົງການນັກຂ່າວຜ່ານທາງໂທລະສັບ, ທ່ານລັດຖະມົນຕີກະຊວງການຄ້າອາເມລິກາ Wilbur Ross ຢືນຢັນວ່າ, ແຜນການຈັດວາງອັດຕາພາສີ 25% ສຳລັບຜະລິດຕະພັນເຫຼັກກ້ານຳເຂົ້າ ແລະ ອັດຕາພາສີ 10% ສຳລັບອາລູມີນຽມ ທີ່ນຳເຂົ້າຈາກອີຢູ, ການາດາ ແລະ ເມັກຊີໂກ ຈະມີຜົນສັກສິດນັບແຕ່ເວລາ 4 ໂມງ GMT ວັນທີ 01 ມິຖຸນາ. ທ່ານ Wilbur Ross ກ່າວວ່າ “ດ້ານໜຶ່ງ, ພວກຂ້າພະເຈົ້າລໍຄວຍສືບຕໍ່ເຈລະຈາ, ກັບທັງ ການາດາ ແລະ ເມັກຊີໂກ, ດ້ານໜຶ່ງແມ່ນເຈລະຈາກັບອີຢູ ຍ້ອນຍັງມີບັນຫາຄ້າງຄາຫຼາຍຢ່າງຄວນໄດ້ຮັບການແກ້ໄຂ”.

      ສ່ວນທ່ານນາງນາຍົກລັດຖະມົນຕີເຢຍລະມັນ Angela Merkel ຢືນຢັນວ່າ, ບັນດາປະເທດສະມາຊິກອີຢູ ຈະມີການໂຕ້ຕອບ “ຢ່າງເດັດດ່ຽວ ແລະ ເປັນເອກະພາບ” ຕໍ່ເລື່ອງອາເມລິກາ ຈັດວາງອັດຕາພາສີນຳເຂົ້າສຳລັບເຫຼັກກ້າ ແລະ ອາລູມີນຽມ ຂອງບັນດານັກຜະລິດເອີລົບ.

      ແລະກໍ່ໃນວັນທີ 31 ພຶດສະພາ, ພາຍຫຼັງທີ່ທ່ານປະທານາທິບໍດີອາເມລິກາ ແຈ້ງວ່າ ຈະຈັດວາງອັດຕາພາສີນຳເຂົ້າສຳລັບບັນດາຜະລິດຕະດັ່ງກ່າວຂອງບັນດາປະເທດເອີລົບ, ການາດາ ແລະ ເມັກຊີໂກ ນັ້ນ, ທ່ານປະທານຄະນະກຳມະການເອີລົບ (EC) Jean Claude  Juncker ກໍ່ຖະແຫຼງວ່າ, ຂໍ້ຕົກລົງຂອງວໍຊິງຕັນ ແມ່ນບໍ່ສາມາດຮັບຮູ້ໄດ້ ແລະ ອີຢູ ຈະຈັດວາງບັນດາມາດຕະການໂຕ້ຕອບ.