(ພາບປະກອບ)
(vovworld) - ວັນທີ 19 ສິງຫາ, ອາເມລິກາ ແລະ ຈີນ ເຫັນດີຈະເພີ່ມທະວີບັນດາການພົບປະແລກປ່ຽນ ແລະ ຊ້ອມຮົບດ້ານການທະຫານຮ່ວມ, ຖືນີ້ແມ່ນສ່ວນໜຶ່ງໃນຄວາມມານະພະຍາຍາມສ້າງການພົວພັນເປັນປົກກະຕິ ລະຫວ່າງ 2 ພື້ນຖານເສດຖະກິດໃຫຍ່ກວ່າໝູ່ໃນໂລກ, ໂດຍບໍ່ຫົວຊາຕໍ່ບັນດາຄວາມບໍ່ລົງລອຍກັນໃນບັນຫາຄວາມປອດໄພທາງດ້ານອີນເຕີແນດ ແລະ ບັນດາການພິພາດອະທິປະໄຕຢູ່ພາກພື້ນອາຊີຕາເວັນອອກ. ກ່າວຄຳເຫັນໃນການປະຊຸມຂ່າວຮ່ວມ, ພາຍຫຼັງການເຈລະຈາກັບທ່ານລັດຖະມົນຕີກະຊວງປ້ອງກັນປະເທດຈີນ ຈາງວານກວານ ທີ່ທຳນຽບ 5 ແຈ, ທ່ານລັດຖະມົນຕີກະຊວງປ້ອງກັນປະເທດອາເມລິກາ Chuck Hagel ໃຫ້ຮູ້ວ່າ, ອາເມລິກາ ໃຫ້ຄຳໝັ້ນສັນຍາສ້າງການພົວພັນຢ່າງຕັ້ງໜ້າ ແລະ ມີລັກສະນະສ້າງສັນກັບຈີນ ຍ້ອນການພົວພັນລະຫວ່າງອາເມລິກາ - ຈີນ ແມ່ນສຳຄັນສຳລັບສະຖຽນລະພາບ ແລະ ຄວາມສະຫງົບປອດໄພຂອງພາກພື້ນອາຊີ - ປາຊີຝີກ. ທ່ານ Hagel ໃຫ້ຮູ້ວ່າ ຈຸດໝາຍຂອງການເຈລະຈາດັ່ງກ່າວ ແມ່ນເພື່ອເນັ້ນໜັກວ່າ ການພົວພັນດ້ານການທະຫານ - ທະຫານ ທີ່ແທດຈິງ ແລະ ໝັ້ນຄົງລະຫວ່າງອາເມລິກາ - ຈິນ ແມ່ນເສົາຄ້ຳທີ່ສຳຄັນໃຫ້ແກ່ການພົວພັນ 2 ຝ່າຍ. ທ່ານ Hagel ໃຫ້ຮູ້ວ່າ 2 ຝ່າຍໄດ້ເຫັນດີສືບຕໍ່ເພີ່ມທະວີບັນດາການພົບປະແລກປ່ຽນ ແລະ ຊ້ອມຮົບຮ່ວມ; ຊົມເຊີຍເລື່ອງ 2 ປະເທດສ້າງຕັ້ງກຸ່ມປະຕິບັດງານລວມກ່ຽວກັບຄວາມປອດໄພທາງດ້ານອີນເຕີແນດ, ຖືນີ້ແມ່ນເວທີປາໄສເພື່ອໃຫ້ 2 ປະເທດປຶກສາຫາລື ແລະ ແກ້ໄຂບັນດາບັນຫາຂຶ້ນກັບຄວາມປອດໄພທາງດ້ານອີນເຕີແນດ. ທ່ານ Hagel ຊີ້ແຈ້ງວ່າ ໃນການເຈລະຈາທີ່ທຳນຽບ 5 ແຈ, 2 ຝ່າຍໄດ້ປຶກສາຫາລືກ່ຽວກັບສະພາບການໃນແຫຼມເກົາຫຼີ, ບັນດາການພິພາດອະທິປະໄຕຢູ່ທະເລຮວາຕຸງ ແລະ ທະເລຕາເວັນອອກ.