(vovworld) - ໂດຍໄດ້ຮັບຄຳເຊີນຂອງທ່ານນາຍົກລັດຖະມົນຕີ ຫງວຽນເຕີນຢູ້ງ, ວັນທີ 27/11, ທ່ານນາຍົກລັດຖະມົນຕີລາຊະອານາຈັກ ໄທ ປຣາຢຸດ ຈັນໂອຈາ ພ້ອມກັບພັນລະຍາ ແລະ ຄະນະຜູ້ແທນຂັ້ນສູງລາຊະອານາຈັກ ໄທ ຢ້ຽມຢາມ ຫວຽດນາມ ຢ່າງເປັນທາງການ. ທີ່ການເຈລະຈາພາຍຫຼັງພິທີຕ້ອນຮັບ, ທ່ານນາຍົກລັດຖະມົນຕີ ຫງວຽນເຕີນຢູ້ງ ຕີລາຄາສູງເລື່ອງທ່ານນາຍົກລັດຖະມົນຕີ ປຣາຢຸດ ຈັນໂອຈາ ໄດ້ເລືອກ ຫວຽດນາມ ແມ່ນປະເທດຢ້ຽມຢາມທາງການພາຍຫຼັງດຳລົງຕຳແໜ່ງ, ຖືນີ້ແມ່ນປະກົດການທີ່ມີຊີວິດຊີວາຂອງການພົວພັນຄູ່ຮ່ວມມືຍຸດທະສາດລະຫວ່າງ ຫວຽດນາມ - ໄທ ແລະ ເຊື່ອໝັ້ນວ່າ: ການຢ້ຽມຢາມຈະປະກອບສ່ວນສຳຄັນ ແລະ ແທດຈິງ ເພື່ອແນໃສ່ຮັດແໜ້ນການພົວພັນມິດຕະພາບ ແລະ ການຮ່ວມມືຮອບດ້ານລະຫວ່າງ ຫວຽດນາມ ແລະ ໄທ ກ່ວາອີກ. ນາຍົກລັດຖະມົນຕີ 2 ທ່ານເຫັນດີເປັນເອກະສັນຈະສົມທົບກັນຢ່າງແໜ້ນແຟ້ນ, ສືບຕໍ່ເພີ່ມທະວີການແລກປ່ຽນຄະນະຜູ້ແທນຂັ້ນສູງ, ກໍ່ຄືຜັນຂະຫຍາຍບັນດາກົນໄກຮ່ວມມື 2 ຝ່າຍສຳຄັນຄືກອງປະຊຸມຄະນະລັດຖະບານລວມ, ຄະນະກຳມະການຮ່ວມມື 2 ຝ່າຍ ຫວຽດນາມ - ໄທ, ເຫັນດີເປັນເອກະສັນຊີ້ນຳໃຫ້ບັນດາກະຊວງ, ຂະແໜງ, ທ້ອງຖີ່ນ 2 ຝ່າຍປະຕິບັດບັນດາຂໍ້ຕົກລົງຮ່ວມມືຂອງການນຳຂັ້ນສູງ 2 ປະເທດ, ສູ້ຊົນນຳວົງເງິນການຄ້າ 2 ສົ້ນໃຫ້ບັນລຸ 15 ຕື້ USD ໃນປີ 2020….
ພາຍຫຼັງການເຈລະຈາ, ນາຍົກລັດຖະມົນຕີ 2 ທ່ານເປັນສັກຂີພິຍານພິທີເຊັນເອກະສານຮ່ວມມື 3 ສະບັບ.
ແລະກໍ່ໃນຕອນບ່າຍວັນດຽວກັນ, ທີ່ສຳນັກງານປະທານປະເທດ, ທ່ານປະທານປະເທດ ເຈືອງເຕີນຊາງ ໄດ້ໃຫ້ການຕ້ອນຮັບທ່ານນາຍົກລັດຖະມົນຕີ ໄທ ປຣາຢຸດ ຈັນໂອຈາ. ທີ່ການຕ້ອນຮັບ, ທ່ານປະທານປະເທດ ເຈືອງເຕີນຊາງ ຢືນຢັນວ່າ: ຫວຽດນາມ ຖືເປັນສຳຄັນ ແລະ ກຽມພ້ອມເພີ່ມທະວີການຮ່ວມມືກັບ ໄທ, ຫວຽດນາມ ຈະສ້າງເງື່ອນໄຂເພື່ອໃຫ້ບັນດາໂຄງການຮ່ວມມືລະຫວ່າງບັນດາກະຊວງ, ຂະແໜງການ ແລະ ວິສາຫະກິດ 2 ປະເທດບັນລຸປະສິດທິຜົນ.
ທ່ານນາຍົກລັດຖະມົນຕີ ໄທ ປຣາຢຸດ ຈັນໂອຈາ ເນັ້ນໜັກວ່າ: ໄທ ແລະ ຫວຽດນາມ ຄວນສົມທົບກັນຢ່າງແໜ້ນແຟ້ນ, ສ້າງຕັ້ງບັນດາລາຍການທ່ອງທ່ຽວລະຫວ່າງ 2 ປະເທດ. ນາຍົກລັດຖະມົນຕີ ໄທ ສະເໜີ 2 ປະເທດເພີ່ມທະວີການເຊື່ອມຕໍ່ບັນດາເສັ້ນທາງບົກ, ທາງທະເລທີ່ມີຢູ່ແລ້ວເພື່ອຂຸດຄົ້ນຢ່າງມີປະສິດທິຜົນ.
ແລະກໍ່ໃນຕອນບ່າຍວັນທີ 27/11, ທີ່ສຳນັກງານສະພາແຫ່ງຊາດ, ທ່ານປະທານສະພາແຫ່ງຊາດ ຫງວຽນຊີງຮູ່ງ ຕ້ອນຮັບທ່ານນາຍົກລັດຖະມົນຕີ ໄທ ປຣາຢຸດ ຈັນໂອຈາ. ທ່ານປະທານສະພາແຫ່ງຊາດ ເຊື່ອໝັ້ນວ່າ: ການຢ້ຽມຢາມ ຂອງທ່ານນາຍົກລັດຖະມົນຕີ ໄທ ເຖິງ ຫວຽດນາມ ຄັ້ງນີ້ຈະປະກອບສ່ວນຊຸກຍູ້ການພົວພັນ 2 ຝ່າຍຢ່າງແຮງ. ໃນການຮ່ວມມືລັດຖະສະພາ, ທ່ານປະທານສະພາແຫ່ງຊາດ ຫງວຽນຊິງຮູ່ງ ແລະ ທ່ານນາຍົກລັດຖະມົນຕີ ໄທ ປຣາຢຸດ ຈັນໂອຈາ ເຫັນດີເປັນເອກະສັນຈະເພີ່ມທະວີການຮ່ວມມືແລກປ່ຽນຄະນະຜູ້ແທນທຸກຂັ້ນ, ກໍ່ຄືແບ່ງປັນບົດຮຽນໃນການສ້າງກົດໝາຍ ແລະ ຕິດຕາມກວດກາ.