“ເດືອນເຄື່ອນໄຫວມະນຸດສະທຳ 2021” ດ້ວຍຫົວຂໍ້ “ເພື່ອວົງຄະນະຍາດທີ່ປອດໄພ”
(VOVWORLD) - ປີ 2021 ແມ່ນປີທຳອິດທີ່ ສະພາກາແດງ ຫວຽດນາມ ຜັນຂະຫຍາຍລາຍການ “ເດືອນເຄື່ອນໄຫວມະນຸດສະທຳ” ຢ່າງເປັນທາງການໃນທົ່ວລະບົບຂອງສະພາ ພາຍຫຼັງທີ່ຜັນຂະຫຍາຍທົດລອງມາເປັນເວລາ 3 ປີ.
 ໃນເດືອນເຄື່ອນໄຫວມະນຸດສະທຳນີ້, ສະພາກາແດງທຸກຂັ້ນ ຈະດຳເນີນບັນດາການເຄື່ອນໄຫວເບິ່ງແຍງດູແລສຸຂະພາບໃຫ້ແກ່ປະຊາຊົນ (ພາບ: TTXVN) |
ປີ 2021, ລາຍການ “ເດືອນເຄື່ອນໄຫວມະນຸດສະທຳ” ມີຫົວຂໍ້ວ່າ “ເພື່ອວົງຄະນະຍາດທີ່ປອດໄພ”.
ລາຍການ “ເດືອນເຄື່ອນໄຫວມະນຸດສະທຳ 2021” ຈະດຳເນີນໃນເດືອນພຶດສະພາ, ໃນນັ້ນ, ແຕ່ວັນທີ 8 ຫາວັນທີ 19 ພຶດສະພາ ແມ່ນ 2 ສັບປະດາເຄື່ອນໄຫວເປັນຈຸດສຸມ ສະເຫຼີມສະຫຼອງວັນຂະບວນການກາແດງ ແລະ ຊີກວົງເດືອນແດງສາກົນ ແລະ ວັນຄ້າຍວັນເກີດປະທານໂຮ່ຈີມິນ - ຜູ້ກໍ່ຕັ້ງ ແລະ ເປັນປະທານກິດຕິມະສັກຄົນທຳອິດຂອງສະພາກາແດງ ຫວຽດນາມ.
ໃນເດືອນເຄື່ອນໄຫວມະນຸດສະທຳນີ້, ສະພາກາແດງທຸກຂັ້ນ ຈະດຳເນີນບັນດາການເຄື່ອນໄຫວເບິ່ງແຍງດູແລສຸຂະພາບໃຫ້ແກ່ປະຊາຊົນ, ສືບຕໍ່ຍົກສູງຄວາມຮັບຮູ້ຂອງປະຊາຊົນກ່ຽວກັບບັນດາມາດຕະການປ້ອງກັນ, ສະກັດກັ້ນໂລກລະບາດໂຄວິດ - 19; ເພີ່ມທະວີການລະດົມທຸກແຫຼ່ງກຳລັງ ຮ່ວມແຮງຮ່ວມໃຈປ້ອງກັນ, ສະກັດກັ້ນໂລກລະບາດໂຄວິດ - 19 ໃນສະພາບການໃໝ່, ໜູນຊ່ວຍບັນດາເປົ້າໝາຍທີ່ປະສົບກັບຄວາມຫຍຸ້ງຍາກ, ໂດຍສະເພາະແມ່ນບັນດາເປົ້າໝາຍທີ່ຖືກຜົນສະທ້ອນຈາກໂລກລະບາດ.