ທີ່ກອງປະຊຸມທົ່ວປະເທດຄົ້ນຄ້ວາ, ຊາບຊຶມ ແລະ ຜັນຂະຫຍາຍການປະຕິບັດມະຕິກອງປະຊຸມສູນກາງພັກຄັ້ງທີ 9 ຊຸດທີ 11
(ພາບ: hanoimoi.com.vn)
(vovworld) – ທີ່ກອງປະຊຸມທົ່ວປະເທດຄົ້ນຄ້ວາ, ຊາບຊຶມ ແລະ ຜັນຂະຫຍາຍການປະຕິບັດມະຕິກອງປະຊຸມສູນກາງພັກຄັ້ງທີ 9 ຊຸດທີ 11, ຖືກຈັດຂຶ້ນໃນວັນທີ 3/7, ຢູ່ ຮ່າໂນ້ຍ, ທ່ານ ເລຮົ່ງແອງ, ຜູ້ປະຈຳການຄະນະເລຂາ ເນັ້ນໜັກວ່າ: ໃນສະພາບການທີ່ ຈີນ ຕັ້ງຮ້ານເຈາະນ້ຳມັນ ໄຮຢາງ 981 ຢ່າງຜິດກົດໝາຍໃນເຂດເສດຖະກິດຈຳເພາະ ແລະ ໄຫຼ່ທະວີບຂອງ ຫວຽດນາມ, ທົ່ວພັກ, ທົ່ວປວງຊົນ, ທົ່ວກອງທັບຕ້ອງເພີ່ມທະວີຄວາມສາມັກຄີ, ທົ່ວປະເທດເປັນຈິດໜຶ່ງໃນດຽວ ເດັດດ່ຽວປົກປັກຮັກສາເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດຊາດ, ພ້ອມທັງຮັກສາສະພາບແວດລ້ອມສັນຕິພາບ, ສະຖຽນລະພາບເພື່ອສ້າງສາ ແລະ ພັດທະນາປະເທດຊາດ. ຜູ້ປະຈຳການຄະນະເລຂາ ເລຮົ່ງແອງ, ສະເໜີວ່າ:
“ຕ້ອງສະໜອງຂໍ້ມູນຂ່າວທີ່ມີການກຳນົດທິດໃຫ້ບັນດາອົງການການເມືອງ - ສັງຄົມ, ອົງການຈັດຕັ້ງມະຫາຊົນຢູ່ທ້ອງຖີ່ນເປັນປະຈຳ, ປະກອບສ່ວນສ້າງຄວາມເຫັນດີເຫັນພ້ອມ, ຄວາມເຊື່ອໝັ້ນເຂົ້າໃນບັນດາແຜນນະໂຍບາຍ, ນະໂຍບາຍສະເໝີຕົ້ນສະເໝີປາຍຂອງພັກ ແລະ ລັດພວກເຮົາ. ເຖິງຢ່າງໃດກໍ່ຕາມ, ຕ້ອງມີສະຕິຕື່ນຕົວຕໍ່ບັນດາກົນອຸບາຍ, ຄຳເວົ້າ ແລະ ການກະທຳທີ່ມີທັດສະນະກະຕຸກຊຸກຍູ້ສວຍໃຊ້ໃນນາມຜູ້ຮັກຊາດເພື່ອຕ້ານພັກ, ລັດ”
ກ່າວຄຳເຫັນສະຫລຸບກອງປະຊຸມ, ທ່ານ ດິງເທ໋ຮິງ, ຫົວໜ້າຄະນະໂຄສະນາສຶກສາສູນກາງ ເນັ້ນໜັກບັນດາເນື້ອໃນພື້ນຖານຂອງກອງປະຊຸມສູນກາງຄັ້ງທີ 9 ມີຄວາມໝາຍສຳຄັນໃນການສຳເລັດໜ້າທີ່ການເມືອງຂອງຄະນະບໍລິຫານງານສູນກາງພັກຊຸດທີ 11 ແລະ ວຽກງານກະກຽມກອງປະຊຸມໃຫຍ່ຂອງພັກທຸກຂັ້ນເພື່ອມຸ່ງໄປເຖິງກອງປະຊຸມໃຫຍ່ຄັ້ງທີ 12 ຂອງພັກ, ດັ່ງນັ້ນ ບັນດາຜູ້ແທນຕ້ອງຕັ້ງໜ້າເຜີຍແຜ່, ຊາບຊຶມບັນດາເນື້ອໃນຂອງມະຕິ, ຕາມພາລະໜ້າທີ່, ໜ້າທີ່ຂອງຕົນຄະນະໂຄສະນາສຶກສາທຸກຂັ້ນ, ຕັ້ງໜ້າ, ເປັນເຈົ້າການໃນການເປັນເສນາທິການໃຫ້ເພື່ອນຳຄະນະພັກທຸກຂັ້ນເພື່ອນຳບັນດາທັດສະນະ, ແຜນນະໂຍບາຍຂອງກອງປະຊຸມສູນກາງຄັ້ງທີ 9 ເຂົ້າໃນຊີວິດຕົວຈິງ.