ເພີ່ມທະວີການຊີ້ນຳນຳພາຂອງພັກສຳລັບວຽກງານຄົ້ນພົບ,ແກ້ໄຂເຫດການ,ຄະດີສໍ້ລາດບັງຫຼວງ
(ພາບປະກອບ)
(vovworld) - ກົມການເມືອງຫາກໍປະກາດຄຳສັ່ງກ່ຽວກັບເລື່ອງເພີ່ມທະວີການຊີ້ນຳນຳພາຂອງພັກ ສຳລັບວຽກງານຄົ້ນພົບ, ແກ້ໄຂເຫດການ, ຄະດີສໍ້ລາດບັງຫຼວງ. ຄຳສັ່ງໄດ້ຍົກອອກ 8 ໜ້າທີ່, ມາດຕະການແກ້ໄຂເພື່ອແນໃສ່ຍົກສູງປະສິດທິຜົນວຽກງານປ້ອງກັນ, ຕ້ານການສໍ້ລາດບັງຫຼວງ. ໃນນັ້ນ, ກົມການເມືອງຮຽກຮ້ອງອົງຄະນະພັກ, ອົງການຈັດຕັ້ງພັກທຸກຂັ້ນ ຄົ້ນຄວ້າ, ປັບປຸງກົດໝາຍກ່ຽວກັບການຄົ້ນພົບ, ແກ້ໄຂເຫດການ, ຄະດີສໍ້ລາດບັງຫຼວງ ໃຫ້ໃກ້ສິດຕິດແທດພຶດຕິກຳຕົວຈິງຂອງຫວຽດນາມ ແລະ ເໝາະສົມກັບບັນດາສົນທິສັນຍາສາກົນ ເຊິ່ງຫວຽດນາມ ເປັນສະມາຊິກ. ພ້ອມກັນນັ້ນ, ເພີ່ມທະວີການຮ່ວມມືກັບບັນດາປະເທດ, ອົງການຈັດຕັ້ງສາກົນໃນການປັບໄໝລົງໂທດອາຊະຍາກຳການສໍ້ລາດບັງຫຼວງຢ່າງມີປະສິດທິຜົນ. ເປັນເຈົ້າການເຈລະຈາ, ລົງນາມໃນສັນຍາໜູນຊ່ວຍດ້ານຕຸລາການກັບປະເທດຕ່າງໆ; ປະຕິບັດສົນທິສັນຍາຂອງສະຫະປະຊາຊາດ ກ່ຽວກັບການຕ້ານການສໍ້ລາດບັງຫຼວງ ໃຫ້ຖືກຕາມຂັ້ນຕອນ, ເໝາະສົມກັບເງື່ອນໄຂ, ຂໍ້ກຳນົດຂອງກົດໝາຍຫວຽດນາມ. ບັນດາອົງການຄວນຄົ້ນຄວ້າປັບປຸງ, ເພີ່ມເຕີມກົດໝາຍວ່າດ້ວຍການຮ້ອງຟ້ອງ, ຮັບປະກັນບັນດາການຮ້ອງຟ້ອງກ່ຽວກັບການສໍ້ລາດບັງຫຼວງຕ້ອງໄດ້ຮັບການແກ້ໄຂຢ່າງທັນການ, ຖືກຕ້ອງຕາມຂໍ້ກຳນົດຂອງກົດໝາຍ. ຍູ້ແຮງວຽກງານໂຄສະນາກ່ຽວກັບວຽກງານຄົ້ນພົບ, ແກ້ໄຂເຫດການ, ຄະດີສໍ້ລາດບັງຫຼວງ… ແລະ ຜົນແຫ່ງການແກ້ໄຂບັນດາກໍລະນີສໍ້ລາດບັງຫຼວງ.