ເພີ່ມທະວີການຮ່ວມມືກັບອັງກິດໃນການສະກັດກັ້ນການຄ້າຂາຍພືດ,ສັດປ່າຢ່າງຜິດກົດໝາຍ
(ພາບປະກອບ)
(vovworld) – ວັນທີ 03/02, ທ່ານ Giles Lever, ເອກອັກຄະລັດຖະທູດອັງກິດປະຈຳຫວຽດນາມ, ໄດ້ກ່າວຄຳເຫັນໃນການປະຊຸມຂ່າວໃນວັນທີ 03/02 ວ່າ, ລັດຖະບານ 2 ປະເທດຫວຽດນາມ ແລະ ອັງກິດ ຈະເພີ່ມທະວີການຮ່ວມມືໃນຄວາມມານະພະຍາຍາມທົ່ວໂລກ ເພື່ອສະກັດກັ້ນໄພຄ້າຂາຍພືດ, ສັດປ່າຢ່າງຜິດກົດໝາຍ.
ຫວຽດນາມ, ອັງກິດ ແລະ 44 ປະເທດອື່ນ ກໍພ້ອມກັນລົງນາມໃນຖະແຫຼງການລອນດອນ ປີ 2014 ກ່ຽວກັບເລື່ອງເພີ່ມທະວີກອບກົດໝາຍ ເພື່ອສະກັດກັ້ນການຄ້າຂາຍພືດ, ສັດປ່າຢ່າງຜິດກົດໝາຍ. ແລະ ຫວຽດນາມ ຈະເປັນເຈົ້າພາບຈັດຕັ້ງກອງປະຊຸມຄັ້ງທີ 3 ກ່ຽວກັບການຄ້າຂາຍພືດ, ສັດປ່າຢ່າງຜິດກົດໝາຍ ໃນເດືອນ 11 ຈະມາເຖິງ. ທ່ານ Giles Lever ໄດ້ເວົ້າວ່າ.
“ລັດຖະບານຫວຽດນາມ ໄດ້ສ້າງກອບກົດໝາຍຜ່ານບັນດາດຳລັດຂອງລັດຖະບານ ໃນການຄວບຄຸມສະພາບຄ້າຂາຍບັນດາຜະລິດຕະພັນຈາກພືດ, ສັດປ່າ ເພື່ອແນໃສ່ປົກປັກຮັກສາບັນດາປະເພດສັດພວມຖືກນາບຂູ່ ກໍຄືຊີວະນາໆພັນ. ລັດຖະບານອັງກິດ ຈະຮ່ວມມືກັບລັດຖະບານຫວຽດນາມ, ພິເສດແມ່ນກະຊວງກະສິກຳ ແລະ ພັດທະນາຊົນນະບົດ ເພື່ອຊ່ວຍຫວຽດນາມ ປະຕິບັດສຳເລັດກອງປະຊຸມຈະມາເຖິງ, ຊີ້ໃຫ້ເຫັນຄຳໝັ້ນສັນຍາຂອງຫວຽດນາມ ໃນການແກ້ໄຂບັນຫານີ້”.